បើគិតពីថ្ងៃទី០១ ខែមិថុនា ឆ្នាំ២០១៤ រហូតមកដល់ពេលនេះ យ៉ាងហោចណាស់ កម្មករកម្ពុជាខុសច្បាប់ជិត​៨ពាន់​នាក់ ត្រូវរបបយោធាថ្មី ដែលកំពុងគ្រប់គ្រងប្រទេសថៃបច្ចុប្បន្ន ចាប់បញ្ជូនឲ្យត្រលប់មកប្រទេសកម្ពុជាវិញ តាម​ខេត្​តជាប់ព្រំដែន ជាបន្តបន្ទាប់និងយ៉ាងគំហុក។ មន្ត្រីសង្គមស៊ីវិល ដែលធ្វើការក្នុងផ្នែកនេះ បាននិយាយថា ការបញ្ជូន​ពលករខ្មែរត្រឡប់មកវិញ ត្រូវបានធ្វើដូច«សត្វ»។

ពលករកម្មករខ្មែរ នៅក្នុងរថយន្ដទ្រុងរបស់ថៃ។ (រូបថត សហការី)

វិបត្តិការងារ - លោក យ៉ា ណាវុធ ប្រធានអង្គការការ៉ាមកម្ពុជា ជាអង្គការក្រៅរដ្ឋាភិបាលមួយដែលជួយជ្រោមជ្រែង និងជួយការពារសិទ្ធិរបស់ពលករចំណាកស្រុក បានវាយតម្លៃថា បើទោះជាសកម្មភាពបញ្ជូនកម្មករកម្ពុជា ពីប្រទេស​ថៃ មានលក្ខណៈស្របច្បាប់ប្រទេសថៃក៏ដោយ ក៏វាបានបំពានលក្ខខណ្ឌមនុស្សធម៌ដែរ។ លោក យ៉ា ណាវុធ បាន​ថ្លែងប្រាប់ទស្សនាវដ្តីមនោរម្យ.អាំងហ្វូ នៅថ្ងៃទី១១ ខែមិថុនា ឆ្នាំ២០១៤ នេះថា៖ «ខ្ញុំមើលទៅ រូបភាពដាក់ទ្រុង​ដែក​អញ្ចឹង វាជារូបភាពមិនល្អទេ។ ដូចឡានដឹកសត្វ ដឹកទំនិញ វាគួររៀបចំឲ្យបាន​ត្រឹមត្រូវ។»

តាមរបាយការណ៍របស់ក្រសួងការបរទេសកម្ពុជា បានបង្ហាញតួលេខ ក្នុងពេលចុងក្រោយនេះឲ្យដឹងថា ក្នុងរយៈ​ពេល​០៩ ថ្ងៃ គិតចាប់ពីថ្ងៃទី០១ ដល់ថ្ងៃទី០៩ ខែមិថុនា ឆ្នាំ២០១៤ អាជ្ញាធរថៃបានបញ្ជូនកម្មករខ្មែរខុសច្បាប់ ចំនួន​៧៥០៧នាក់ មកកម្ពុជាវិញ។ គេបានសង្កេតឃើញថា កម្មករខុសច្បាប់របស់កម្ពុជាទាំងនោះ ត្រូវបានភាគីថៃ​ចាប់​ញាត់​​បញ្ចូលក្នុង ប្រភេទឡានទ្រុង និងឡានបែនធុនធ្ងន់ យ៉ាងណែន ដឹកយកមកប្រគល់ឲ្យសមត្ថកិច្ចកម្ពុជា ជា​បន្ត​បន្ទាប់។

ប្រធានអង្គការការ៉ាមកម្ពុជា លោក យ៉ា ណាវុធ  បានលើកឡើងថា ស្ថានការណ៍សព្វថ្ងៃ ក្នុងប្រទេសថៃ ក្រោម​ការ​គ្រប់គ្រងរបស់របបសឹក នៅបន្តមានភាពស្មុគស្មាញនៅឡើយ។ ដូច្នេះរដ្ឋាភិបាលកម្ពុជា គម្បីសម្របសម្រួល​ឲ្យបាន​ល្អប្រសើរ ជាមួយរបបគ្រប់គ្រងប្រទេសថៃបច្ចុប្បន្ន ដើម្បីបង្កលក្ខណៈងាយស្រួលដល់កម្មករកម្ពុជា ដែលកំពុងស្ថិត​នៅប្រទេសថៃ។

តាមរយៈការបំភ្លឺរបស់លោក កុយ គួង អ្នកនាំពាក្យក្រសួងការបរទេសកម្ពុជា នៅថ្ងៃទី១១ ខែមិថុនា នេះ បាន​ឲ្យ​ដឹង​ថា ក្រសួងការបរទេស និងកិច្ចសហប្រតិបត្តិការអន្តរជាតិ តាមរយៈលោក អ៊ឹង ស៊ាន ជារដ្ឋលេខាធិការក្រសួង​ការ​បរទេសកម្ពុជា ក្នុងជំនួបជាមួយឯកអគ្គរាជទូតថៃប្រចាំកម្ពុជា កាលពីថ្ងៃទី១០ ខែមិថុនា ឆ្នាំ២០១៤ បានស្នើឲ្យ​ភាគី​ថៃ អនុវត្តការបញ្ជូនពលករ-កម្មករខែ្មរ ដែលចូលធ្វើការខុសច្បាប់ក្នុងប្រទេសថៃ មកកម្ពុជាវិញ តាមគោលការណ៍​មនុស្ស​ធម៌។

លោក កុយ គួង បានរម្លឹកថា នេះមិនមែនជាលើកទីមួយ ឬលើកទីពីរទេ ដែលប្រទេសថៃបានបញ្ជូនកម្មករខ្មែរខុស​ច្បាប់ ត្រលប់មកប្រទេសកម្ពុជាវិញ ហើយថាការបញ្ជូនមកកម្ពុជា យ៉ាងច្រើនសន្ធឹកសន្ធាប់ ក្នុងរយៈពេលចុង​ក្រោយ​នេះ ក៏ព្រោះរបបយោធាថៃ បានដាក់កំហិត ដល់បណ្តារោងចក្រ សហគ្រាស របស់ថៃ ត្រូវបញ្ឈប់ការប្រើប្រាស់​ពលករ​ខុសច្បាប់តទៅទៀត៕