ដូចអ្វីដែលបានគ្រោងទុក ទើបតែពីរថ្ងៃប៉ណ្ណោះ បន្ទាប់ពីមានការប្រកាសជាផ្លូវការ ដោយលោកនាយករដ្ឋមន្រ្តី ហ៊ុន សែន កាលពីថ្ងៃទីថ្ងៃទី១០ ខែមិថុនា ថានឹងផ្តល់អាជ្ញាប័ណ្ណទូរទស្សន៍ និងវិទ្យុសម្រាប់គណបក្សប្រឆាំង និងការដាក់​បញ្ចូលស្ថាប័នរៀបចំការបោះឆ្នោត គ.ជ.ប ទៅក្នុងរដ្ឋធម្មនុញ្ញ ក្រុមការងារបច្ចេកទេសមកពីគណបក្សទាំងពីរ បាន​មក​ជួបគ្នាជាថ្មី ដើម្បី​ទម្លាយភាពជាប់គាំងខាងនយោបាយ ដែលកើតមានជិតមួយឆ្នាំមកហើយ។

ជំនួបរវាងគណបក្សទាំងពីរ កាលពីថ្ងៃទី៣ ខែមីនា ឆ្នាំ២០១៤ នៅវិមានព្រឹទ្ធសភា។ (រូបថត MONOROOM.info/ O. Vary)

វិបត្តិនយោបាយ - ក្នុងវិមានសរ នៃវិមានព្រឹទ្ឋសភា ក្រុមការងារបច្ចេកទេសនៃគណបក្សប្រជាជនកម្ពុជា និង​គណបក្សសង្គ្រោះជាតិ ចូលតុចចារជាថ្មីពិភាក្សាពីកំណែទម្រង់ និងការដាក់បញ្ចូល គ.ជ.ប ទៅក្នុងច្បាប់រដ្ឋធម្មនុញ្ញ ។ ជំនួបត្រូវបានកើតឡើងភ្លាម បន្ទាប់ពីមានភ្លើង«ខៀវ» ពីនាយករដ្ឋមន្រ្តីហ៊ុន សែន និងក្រោយពេល​គណបក្ស​សង្គ្រោះជាតិ បានប្រជុំគណកម្មការផ្ទៃក្នុងរបស់ខ្លួន ក្នុងការចាត់តាំងតំណាង និងដាក់ពេលជំនួប ជាមួយគណបក្ស​ប្រជាជនកម្ពុជាភ្លាមៗ។

តាមសេចក្តីរាយការណ៍ផ្ទាល់ ពីអ្នកយកព័ត៌មានរបស់ទស្សនាវដ្តីមនោរម្យ.អាំងហ្វូ បានឲ្យដឹងថា វត្តមានសមាជិក​នៃកិច្ចប្រជំនួបក្រុមបច្ចេកទេស ចាប់ពីព្រឹកម៉ោង៩ថ្ងៃទី១២ ខែមិថុនា ឆ្នាំ២០១៤ នេះមានចំនួនប្រាំមួយនាក់ បីនាក់​ខាងគណបក្សប្រជាជនកម្ពុជារួមមាន លោក ព្រុំ សុខា , លោក សក់ សេដ្ឋា និងលោក កើត រិទ្ឋ ឯបីនាក់ទៀត​ខាង​គណបក្សសង្គ្រោះជាតិមាន លោក គួយ ប៊ុនរឿន, លោក យ៉ែម បុញ្ញប្ញទ្ឋិ និងលោក អេង ឆៃអ៊ាង។

ក្នុងកិច្ចសម្ភាសជាមួយទស្សនាវដ្តីមនោរម្យ.អាំងហ្វូ កាលពីថ្ងៃទី១១ ខែមិថុនា ឆ្នាំ២០១៤ ម្សិលម៉ិញនេះ លោកសុន ឆ័យ បានបញ្ជាក់ថាគោលជំហរ របស់គណបក្សសង្រ្គោះជាតិ ថាការកែទម្រង់ស្ថាប័នបោះឆ្នោត គឺត្រូវប្រើពេល​យូរ​ថែមទៀត ហើយទាល់តែមានការពិភាក្សាគ្នារវាងថ្នាក់ដឹកនាំកំពូល ទើបអាចបញ្ជាក់បាន។

ឯអនុប្រធានគណបក្សប្រជាជនកម្ពុជា លោក ហ៊ុន សែន នៅថ្ងៃទី១០ ខែមិថុនា ឆ្នាំ២០១៤ នេះបាន ឯកភាពឲ្យដាក់​ស្ថាប័នបោះឆ្នោត ចូលទៅក្នុងរដ្ឋធម្មនុញ្ញ តាមរយៈការធ្វើវិសោធនកម្ម ហើយក៏អនុញ្ញាតឲ្យគណបក្សសង្រ្គោះជាតិ សហការជាមួយក្រុមហ៊ុនឯកជន ដើម្បីបង្កើតស្ថានីយទូរទស្សន៍មួយផងដែរ។

ដូច្នេះការជួបគ្នាព្រឹកនេះ ដើម្បីដោះស្រាយពីការបញ្ចូលស្ថាប័នបោះឆ្នោត គ.ជ.ប ទៅក្នុងរដ្ឋធម្មនុញ្ញ និងការបង្កើត​ទូរទស្សន៍គណបក្សសង្គ្រោះជាតិ ព្រមទាំងដោះស្រាយបញ្ហានានា ពាក់ព័ន្ធនឹងការបោះឆ្នោតដែលនៅសេសសល់។

បើយោងតាមការបញ្ជាក់បន្ថែមពីមន្រ្តីមួយរូប របស់គណបក្សសង្គ្រោះជាតិ បានលើកឡើងថា ជំនួបលើកនេះ​នឹង​មានលទ្ធផលជាវិជ្ជមានច្រើន ព្រោះជាការជួបគ្នាដើម្បីសម្រេចលើអ្វី ដែលបានព្រមព្រាងគ្នានាពេលកន្លងមក។ ពិសេសការសម្រេចលើការលើកឡើង ដោយលោកនាយករដ្ឋមន្រ្តី ហ៊ុន សែន កាលពីថ្ងៃទី១០ នេះតែម្តង ព្រោះ​មិនចង់អូសបន្លាយពេលវេលាកាន់តែយូរ។ មន្ត្រីដែលនិយាយក្នុងល័ក្ខខ័ណ្ឌមិនបញ្ចេញឈ្មោះ បាននិយាយថា៖ «មិនមែនពិនិត្យពិភាក្សាផ្តោះប្ដូរយោបល់អ្វីទៀតទេ ជាការជួបដើម្បីពិនិយ្យ និងសម្រេចក្នុងការចុះហត្ថលេខា​តែ​ម្តង។»

មកទល់នឹងម៉ោងជិត១១ព្រឹកនេះ កិច្ចជំនួបប្រជុំដោយបិទទ្វា នៅមិនទាន់បង្ហាញនូវលទ្ធផលយ៉ាងណានោះទេ។ តែ​តាមការបញ្ជាក់​របស់មន្រ្តីពីធីការ នៃវិមានរដ្ឋសភា បានប្រាប់ថា បន្ទាប់ពីកិច្ចប្រជុំនេះចប់ នឹងមានសន្និសិទ​សារព័ត៌មាន​ពីរដោយឡែកពីគ្នា រវាងគណបក្សទាំងពីរនេះ៕