ក្រសួងការបរទេសកម្ពុជាព្រមានពលករខ្មែរ កុំឲ្យពាក់ព័ន្ធបាតុកម្មនៅថៃ
ខណៈមហាបាតុកម្មបិទក្រុងបាងកក អូសបន្លាយចូលដល់ថ្ងៃទី៤ ហើយកំពុងមានភាពរំជើបរំជួល កាន់តែខ្លាំងឡើងនោះ ក្រសួងការបរទេសកម្ពុជា តាមរយៈស្ថានទូតរបស់ខ្លួនប្រចាំក្រុងបាងកក បានធ្វើការអំពាវនាវដល់ពលរដ្ឋ ឬពលករកម្ពុជាទាំងអស់ ដែលស្ថិតនៅប្រទេសថៃ មិនត្រូវធ្វើសកម្មភាពណាមួយ ដែលជាប់ពាក់ព័ន្ធជម្លោះនយោបាយផ្ទៃក្នុង របស់ប្រទេសថៃនោះទេ។
លោក កុយ គួង អ្នកនាំពាក្យក្រសួងការបរទេសកម្ពុជា។ (រូបថត MONOROOM.info/ D.Rith)
ការទូត - លោក កុយ គួង អ្នកនាំពាក្យក្រសួងការបរទេសកម្ពុជា បានថ្លែងប្រាប់អ្នកសារព័ត៌មាននៅថ្ងៃទី១៦ ខែមករា ឆ្នាំ២០១៤ នេះថា ក្នុងពេលដែលទីក្រុងបាងកក ពោរពេញដោយបាតុកម្មយ៉ាងរំពើតរំពើង អស់រយៈពេលប៉ុន្មានថ្ងៃមកនេះ ស្ថានទូតកម្ពុជាប្រចាំទីក្រុងបាងកក ប្រទេសថៃ បានពន្យល់ដល់ប្រជាពលរដ្ឋ ព្រមទាំងពលករកម្ពុជា នៅប្រទេសថៃ ជាពិសេសនៅទីក្រុងបាងកក កុំឲ្យទៅចូលរួមការជួបជុំតវ៉ា ឬក៏បាតុកម្មណាមួយ ទាំងជាមួយក្រុមគាំទ្រអាវក្រហម និងទាំងជាមួយក្រុមប្រឆាំងអាវលឿង។
អ្នកនាំពាក្យរូបនេះបន្តថា ស្ថានទូតកម្ពុជា និងក្រុមហ៊ុននាំពលករ ក៏បានណែនាំប្រជាពលរដ្ឋ និងពលករកម្ពុជា ថាកន្លែងណាដែលពួកគេគួរទៅ និងកន្លែងណាដែលពួកគេមិនគួរទៅ ហើយចំណុចសំខាន់នោះ ពលករកម្ពុជាត្រូវខិត ខំធ្វើការងារ ដើម្បីរកចំណូលផ្គត់ផ្គង់គ្រួសារជាប្រក្រតី។
ដោយឡែក ការរំលឹកទៅដល់ពលរដ្ឋខ្មែរនេះ ក៏ធ្លាប់ត្រូវបានទំព័រហ្វេសប៊ុកមួយ ដាក់ឈ្មោះលោក ហ៊ុន សែន នាយករដ្ឋមន្ត្រីកម្ពុជា យកមកបកស្រាយពីថ្ងៃទី ១២ ខែមករាកន្លងទៅដែរ។ ទំព័រ Samdech Hun Sen, Cambodian Prime Minister បានសរសេរនៅលើ«ជញ្ជាំង»របស់ខ្លួនថា «កន្លងទៅមានការចោទប្រកាន់ លើពលករខ្មែរមួយចំនួនថា ត្រូវបានគេជួលមកបង្ករអំពើហិង្សា ក្នុងរង្វង់បាតុកម្ម។ សូមប្រជាពលរដ្ឋខ្មែរទាំងអស់ ទាំងពលរដ្ឋទេសចរណ៍ និងពលករដែលទៅធ្វើការនៅប្រទេសថៃ ថែរក្សាសុវត្ថិភាពផ្ទាល់ខ្លួនអោយបានល្អ និងត្រូវជៀសចេញអោយឆ្ងាយពីកន្លែងបាតុកម្មនានា។»
គួររម្លឹកថាវិបត្តិនយោបាយរបស់ប្រទេសថៃ ត្រូវបានគេមើលឃើញថាកំពុងមានភាពធ្ងន់ធ្ងរ ព្រោះលោកស្រីនាយករដ្ឋមន្រ្តី យីងឡាក់ ស៊ីណាវ៉ាត្រា នៅតែពង្រឹងគោលជំហរដោយ មិនព្រមចុះចេញពីតំណែង រហូតដល់ថ្ងៃបោះឆ្នោត ទី២ ខែកុម្ភះ ឆ្នាំ២០១៤ ខណៈក្រុមបាតុករអាវលឿងរាប់ម៉ឺននាក់ ឡោមព័ទ្ធបិទក្រុងបាងកក និងគ្រប់គ្រងអាគាររដ្ឋាភិបាល ដើម្បីបង្ខំឲ្យលោកស្រី យីង ឡាក់ស៊ីណាវ៉ាត្រា ចុះចេញពីតំណែង។ ទន្ទឹមនឹងនេះកងនគរបាល និងទ័ពថៃរាប់ម៉ឺននាក់ ក៏ត្រូវបានគេដាក់ពង្រាយ ដើម្បីគ្រប់គ្រងស្ថានការណ៍ដ៏ស្មុគស្មាញនោះ ផងដែរ៕
--------------------------------------
ដោយ អ៊ុំ បូរី (ទំនាក់ទំនង៖ [email protected]) - ភ្នំពេញ ថ្ងៃទី១៦ ខែមករា ឆ្នាំ២០១៤