ជីវភាពតារា - លោក សុភ័ណ្ឌ ឡារី ដែលជាតារាសម្តែងដែលល្បីមួយរូបនៅកម្ពុជា បាននឹងកំពុងលះបង់​ការងារ​របស់លោក ជាសិល្បៈករបន្ដិចម្ដងៗ ដើម្បីងាកមកធ្វើសកម្មភាពសម្បុរសធម៌ ដើម្បីដល់ជនរងគ្រោះ និងជនងាយ រងគ្រោះមួយចំនួនទៀត។ តែអ្វីជាក្ដីសង្ឃឹមរបស់លោក សម្រាប់អនាគតនោះ គឺសង្គ្រោះសិល្បៈខ្មែរ ដែលលោកគិត​ថាមិន​មានពន្លឺអ្វីឡើយ នៅក្នុងបរិយាកាសសង្គមសព្វថ្ងៃ។

ជាដំបូង សន្ទុះចិត្តដែលធ្វើអោយលោកធ្វើសកម្មភាពសម្បុរសធម៌នេះ ដោយហេតុកាលពី​ប្រាំមួយឆ្នាំមុន នៅមុន​ពេល​ដែលលោកក្លាយជា​សិល្បៈករ​នោះ លោកធ្លាប់ជាអ្នកសុំទាន ជាអ្នកកម្មករសំណង់ លីប៉ាវស៊ីម៉ង់ និងដេក​នៅ​តាមចិញ្ចើមថ្នល់។ មូលហេតុ​ទាំងនេះហើយ ដែលធ្វើអោយលោកមិនអាចភ្លេចដើមកំណើតរបស់ខ្លួន។ លោក ឡាវី បានថ្លែងឲ្យដឹងថា «អ្វីដែលជា​ភាពលំបាក ដែលខ្ញុំ​ធ្លាប់ជួបពីមុនមក ខ្ញុំនឹងជួយដល់អ្នកដែលធ្លាប់ពិបាកដូចខ្ញុំ ហើយ​សកម្មភាពសម្បុធម៌នេះ​ ខ្ញុំក៏​នៅតែបន្ត។»

បើតាមការបង្ហោះរូបភាព និងវីដេអូមយយចំនួន នៅក្នុងទំព័ររបស់ខ្លួននោះ ឃើញថាលោកសុភ័ណ្ឌ ឡារី បាន​ចូល​រួមសកម្មភាពសម្បុរសធម៌ជាច្រើន ជាពិសេសគឺការជួយស្វែងរកជំនួយពីសប្បុរសធម៌ពីក្រៅប្រទេស មកជួយ​ជន​រងគ្រោះពីការបង្រ្កាប នៅសួនកាណាឌីយ៉ាលើផ្លូវវេងស្រេង កាលពីថ្ងៃទី៣ មករា ឆ្នាំ២០១៤កន្លងទៅ។

ក្នុងកិច្ចសម្ភាសន៍មួយជាមួយទស្សនាវដ្ដីមនោរម្យព័ងអាំងហ្វូ តារាសម្តែងរូបនេះបាន​អោយដឹងទៀតថា «តាំងពី​បាន​ចូលរួមហែរក្បួន ជាមួយគណបក្សសង្រ្គោះជាតិមក គេបានបញ្ឈប់ការសម្តែងរបស់ខ្ញុំ មួយសារហើយ។ ហើយកាល​ពី២អាទិត្យមុន គេបានចេញក្រដាសមួយមក គេហាមខ្ញុំម្តងទៀត ជាមួយនឹងសិស្សប្អូនជាសិល្បៈករ៦នាក់ទៀត។»

តារាសម្តែង ដែលអតីតជាកម្មករសំណង់រូបនេះ ក៏បានអោយដឹងទៀតថា «ក្រោយពីគេបានផ្អាកការសម្តែងរបស់ខ្ញុំ ឥលូវនេះខ្ញុំទាន់មានមុខរបរអីប្រកបនៅឡើយទេ។ ហើយវាពិតប្រកដណាស់ វាធ្វើអោយជីវភាពរបស់ខ្ញុំកាន់តែពិបាក ព្រោះខ្ញុំជាកូនអ្នកក្រ ម្តាយរបស់ខ្ញុំក៏ពិការ ហើយខ្ញុំត្រូវទទួលបន្ទុកមើលប្អូន មើលក្មួយ និងម៉ាក់ខ្ញុំផង។»

បើទោះបីជាត្រូវបាន គេផ្អាកការសម្តែងមួយរយះក៏ដោយ ក៏តារាសម្តែងរូបនៅតែរក្សាទឹកចិត្តស្រលាញ់សិល្បះ និង​ចង់វប្បធម៌សិល្បះខ្មែររីកចំរើន «ខ្ញុំចង់អោយសិល្បះដែលខ្ញុំស្រលាញ់ហ្នឹង រីកចំរើនដូចប្រទេសគេដែរ។ លើសពីនេះ​ ទៅទៀត ចង់អោយជីវភាពអ្នកសិល្បះដូចខ្ញុំ ពេលចាស់ទៅ អាចមានជីវភាពសមរម្យ មិនមែនអត់ស៊ីអត់ឃ្លាន​អញ្ចឹង​ទេ។ ហើយក៏មិនចង់អោយគេ មើលងាយអ្នកសិល្បះដែរ។»

ចំពោះចម្លើយ ដែលឆ្លើយនឹងសំណួរដែលសួរថា តើលោកមានការស្តាយក្រោយដែរឬទេ ចំពោះការដែល​ត្រូវគេ​ផ្អាកមិនអោយសម្តែង? តារាសង្ហារាងខ្ពស់ស្រលះ និងដែលមិនបានឡើងសម្តែងអស់ជាច្រើនខែផងរូបនេះ បាន​អះអាងថា «ខ្ញុំមិនស្តាយក្រោយនោះទេ ទោះបីជាខ្ញុំមិនបានសម្តែងបន្តទៅទៀតក៏ដោយ ក៏ខ្ញុំនៅតែព្យាយាមអោយ​បានសម្រេច ក្នុងការសង្រ្គោះសិល្បៈវប្បធម៌ ដែលខ្ញុំស្រលាញ់។»

សន្តានចិត្ត និងសកម្មភាពរបស់តារាសម្តែងរូបនេះ ក៏ត្រូវបានក្រុមអ្នកប្រើប្រាស់បណ្តាញសង្គម​ហ្វេសប៊ុកជាច្រើន​សម្ដែងការកោតសសើរ ប៉ុន្តែមួយចំនួនទៀតបានរិះគន់ ដោយបានចោទតារារូបនេះថា យកសិល្បៈមកបម្រើ​ឲ្យ​នយោបាយ។ មិនមែនត្រឹមតែ លោក សោភ័ណ្ឌ ឡាវី ប៉ុណ្ណោះទេ តែអ្នកសិល្បៈមួយចំនួនទៀត ក៏បានចូលខ្លួន​ទៅ​បម្រើនយោបាយដែរ។ ការបង្ហាញពីនិន្នាការនយោបាយ របស់ក្រុមសិល្បៈករទាំងនេះ រងនូវការរិះគន់យ៉ាងខ្លាំង​ក្លា​ ពីសំណាក់ក្រុមអ្នកគាំទ្រគណបក្សនយោបាយតែរៀងខ្លួន។ ប៉ុន្តែ បើនិយាយពីសិទ្ធិនយោបាយរបស់ពលរដ្ឋ អ្នក​សិល្បៈករណាក៏ដោយ ក៏មានដូចគ្នា និងស្មើៗគ្នាទៅនឹងពលរដ្ឋធម្មតាដែរ គ្រាន់តែគេត្រូវមានគោលជំហរមួយ និង​គិតគូរឲ្យបានច្បាស់ពីក្រុមអ្នកនយោបាយនោះ ថាវាមិនមែនជាក្រុម«នយោបោកដើម្បីតែអំណាច»នោះឡើយ៕

-----------------------------------------------
ដោយ៖ក. ចាន់នីតា (ទំនាក់ទំនង៖ [email protected]) -ភ្នំពេញ ថ្ងៃទី១៥ ខែមករា ឆ្នាំ២០១៤