«ទីស្ដីការ​គណៈរដ្ឋមន្ត្រី ចាយ​លុយ​ជាតិ​លើស ១៤០%»

ហេតុអ្វីក្រសួងសំខាន់ ដូចជាក្រសួងអប់រំ សុខាភិបាល... ចាយលុយមិនអស់ តែសម្រាប់ក្រសួងមិនចាំបាច់ ដូច ទីស្ដីការ​គណៈរដ្ឋមន្ត្រី បែរជាចាយលុយមិនគ្រប់ ឬលើសទៅវិញ? នេះជាចម្ងល់ របស់តំណាងរាស្រ្តពីររូប មក​ពី​គណបក្ស​សង្គ្រោះ​ជាតិ។
Loading...
  • ដោយ: អ៊ុម វ៉ារី អត្ថបទ ៖ អ៊ុម វ៉ារី ([email protected]) - យកការណ៍៖ស្រ៊ុន ទិត្យ -ភ្នំពេញថ្ងៃទី៨ មិថុនា ២០១៥
  • កែប្រែចុងក្រោយ: June 09, 2015
  • ប្រធានបទ: ថវិកាជាតិ
  • អត្ថបទ: មានបញ្ហា?
  • មតិ-យោបល់

តាមបណ្តាក្រសួងស្ថាប័ននានា ធ្វើការចាយវាយថវិការមិនដែលអស់។ ដោយឡែកសម្រាប់ទីស្តីការ​គណៈ​រដ្ឋមន្ត្រី​វិញ បែរជាចាយមិនគ្រប់ ឬខ្វះទៅវិញ។ នេះជាប្រធានបទ ដែលសម័យប្រជុំលើកទី៤ ដើម្បី«ពិភាក្សា និង​អនុម័ត សេចក្តីព្រាងច្បាប់ ស្តីពីគ្រោះមហន្តរាយ និងសេចក្តីព្រាងច្បាប់ ស្តីពីការទូទាត់ថវិកាទូទៅរបស់រដ្ឋ សម្រាប់​ការ​គ្រប់គ្រងឆ្នាំ២០១៤» របស់រដ្ឋសភាកម្ពុជា បានជជែកដេញដោល កាលពីថ្ងៃទី៨ ខែមិថុនានេះ។ លោក សុន ឆ័យ តំណាងរាស្ត្រមកពីគណបក្សសង្គ្រោះជាតិ បានលើកជាសំនួរថា៖ «ក្រសួងផ្សេងៗ បាន​ចាយ​លុយតិច ហើយ​ចាយមិនអស់ទៀត។ (…) ខ្ញុំមិនដឹងថា ចាយមិនអស់លុយ ឬដោយសាររដ្ឋមិនឲ្យលុយ? (…) ហេតុអ្វី​វិស័យ​ចាំ​បាច់ បែរចំណាយតិចទៅវិញ? ចំណែកទីស្តីការគណៈរដ្ឋមន្ត្រី បែរជាចាយលើស ដល់ទៅ​១៤០​ភាគរយ។»

លោក សុន ឆ័យ ដែលជាអនុប្រធាន គណៈកម្មការសេដ្ឋកិច្ច ហិរញ្ញវត្ថុ និងសវនកម្មនៃរដ្ឋសភាផងនោះ បាន​លើក​ឡើងថា សេចក្ដីព្រាងច្បាប់ ស្ដីពីការគ្រប់គ្រងគ្រោះមហន្តរាយនេះ នៅមិនទាន់មានភាពច្បាស់លាស់ សម្រាប់​ការចាយវាយ ថវិការជាតិនោះឡើយ។ លោកបានលើក ពីមាត្រា៣៨ និយាយពីនីតិវិធីច្បាប់ នៃសិទ្ធិ​ទទួល​បាន ការចាត់ចែងលើថវិការ តាមនីតិធិធីច្បាប់ជាធរមាន។ លោកថា មាត្រានេះ ត្រូវធ្វើការបកស្រាយ ឲ្យ​បាន​ច្បាស់លាស់ នូវនីតិច្បាប់ទាំងនោះ តើនីតិវិធីទាំងនោះមានអ្វីខ្លះ? លោកថា បើគ្មានទេ ត្រូវធ្វើការរៀបចំ​បន្ថែម ធ្វើយ៉ាងណា មុននឹងច្បាប់នេះ ត្រូវដាក់ឲ្យរដ្ឋសភាអនុម័ត។

ករណីស្តីពីការចាយវាយថវិការជាតិនេះ ត្រូវបានលោក យឹម សុវណ្ណ តំណាងរាស្ត្រ និងជាអ្នកនាំពាក្យ គណបក្ស​សង្គ្រោះជាតិ ថ្លែងរិះគន់ចំៗ ក្នុងកិច្ចប្រជុំរដ្ឋសភា កាលពីថ្ងៃទី៤ ខែមិថុនា ថាការចាយវាយថវិកា របស់​ក្រសួង​នានា ពិសេសក្រសួងសុខាភិបាល និងក្រសួងអប់រំ និងក្រសួងសង្គមកិច្ច មានលក្ខណៈមិនសមស្រប។ លោក បានពន្យល់ថា ហេតុអ្វីបានជាក្រសួងសំខាន់ៗទាំងបីនេះ បែរជាចាយលុយមិនអស់ទៅវិញ? ដូចជា​ការ​ចាយ​វាយ របស់ក្រសួងក្រសួងសុខាភិបាល បានចាយវាយ ត្រឹមតែ៩៤ភាគរយ ក្រោមការអនុម័ត១០០​ភាគ​រយ​នោះ។

លោក យឹម សុវណ្ណ បានលើកជាចម្ងល់ថា «ខ្ញុំមិនដឹងថា តើក្រសួងហិរញ្ញវត្ថុ ក្រសួងសុខាភិបាល ធ្វើការ​ចំណាយ​ចាយវាយយ៉ាងម៉េចទេ?។ (…) ខ្ញុំបានពិនិត្យ នូវក្នុងសេចក្តីព្រាងច្បាប់ ស្តីពីការទូទាត់ថវិកា ឆ្នាំ២០១៣ ​ឃើញថា ក្រសួងសុខាភិបាលចាយលុយ អត់អស់។ អនុម័ត១០០ភាគរយ ចាយតែ៩៤ភាគរយ។ (…) ខ្ញុំ​មិន​ដឹង​ថា ក្រសួង​យល់ឃើញថាម៉េច អត់មានតម្រូវការ ឬមួយក៏ក្រសួងសុខាភិបាល មាន​អ្វីៗ​ចប់​សព្វ​គ្រប់​អស់​​ហើយ?»

លោកយឹម សុវណ្ណ បានស្នើឲ្យស្រសួងហិរញ្ញវត្ថុ ធ្វើការជម្រុញឲ្យក្រសួងសុខាភិបាល ចាយលុយ ឲ្យស្របទៅ​តាមគោលការណ៍ ដែលរដ្ឋសភាបានអនុម័ត។ លោកបានលើកឡើងបែបចំអកថា ក្រសួងមួយនេះ ចាយ​លុយ​មិនអស់ តែការតព្វកិច្ច ដែលត្រូវមើលថែអ្នកជម្ងឺ បែរជាមិនគ្រប់គ្រាន់ ឬមិនឆ្លើយតប តាមតម្រូវការជាក់​ស្តែង​ទៅ​វិញ។ លោក សុវណ្ណ បានថ្លែងឲ្យដឹងទៀតថា៖ «មន្ទីរពេទ្យខ្វះកន្លែង ថ្នាំពេទ្យខ្វះ ខ្វះគ្រូពេទ្យ។ សូម្បីតែ​ជូន​វេជ្ជបណ្ឌិត ទៅតាមខេត្ត មួយឆ្នាំបញ្ជូនបានត្រឹមតែពីរនាក់។ (…) បើគាត់មិនចេះចាយលុយទេ នោះជារឿងមួយ​ផ្សេងទៀត។ តម្រូវការនៅពេញផ្ទៃប្រទេស ហេតុអ្វីចាយលុយមិនអស់អញ្ចឹង? (…) តែយ៉ាងណា ឲ្យការ​ចាយ​វាយ​ថវិការនេះ ត្រូវតែមានតម្លាភាព និងកុំបំប៉ោងការចំណាយទាំងនោះ។»

តបនឹងការរិះគន់ខាងលើនេះ លោកនាយករដ្ឋមន្រ្តី ហ៊ុន សែន បានលើកឡើង នាវិមានរដ្ឋសភា កាលពីព្រឹក​ថ្ងៃទី៨ ខែមិថុនា នេះថា ការងារទាំងអស់ គេត្រូវធ្វើឡើងទៅតាមយន្តការ និងការចំណាយចាំបាច់របស់គេ។ លោក​បានលើកជាឧទាហរណ៍ថា បើមានការពាក់ព័ន្ថ ជាមួយប្រឡាយទឹក ឬទំនប់ទឹក ក្រសួងធនធានទឹក នឹង​ធ្វើការជួសជុល ក្នុងគម្រោងថវិការបស់គេដែលមាន។ លោកបន្តថា បើករណីនេះ«ផុត» នោះត្រូវស្នើសុំថវិកា​បន្ថែម។

នាយករដ្ឋមន្រ្តីកម្ពុជា បានឲ្យដឹងទៀតថា៖ «រឿងនេះ វាមិនមែនជារឿងថ្មី សម្រាប់រាជរដ្ឋាភិបាលទេ។ ហើយក៏​មិនមែនចាំបាច់ មានអ្នកតំណាងរាស្រ្តបក្សប្រឆាំង ស្នើសុំដែរ។ អានេះ គឺរាជរដ្ឋាភិបាល តែងធ្វើការ ជាមួយនឹង​ម្ចាស់មីក្រូហិរញ្ញវត្ថុរាល់ពេល។ (…) គេធ្វើការ មិនមែនត្រឹមតែនិយាយ នៅកន្លែងសភានោះទេ។»

កាលពីថ្ងៃទី២០ ខែឧសភា កន្លងមកលោក ហ៊ុន សែន ក៏ធ្លាប់បានលើកឡើង ក្នុងកិច្ចប្រជុំប្រចាំឆ្នាំ ស្ដីពី​កម្មវិធី​កំណែទម្រង់ ការគ្រប់គ្រងហិរញ្ញវត្ថុ សាធារណៈថា ការគ្រប់គ្រងហិរញ្ញវត្ថុសាធារណៈ មិនមែនមានតែ​មុខងារ សម្រាប់ស្វែងរកថវិកា និងធានានូវប្រសិទ្ធិភាព នៃការប្រើប្រាស់ថវិកានោះទេ គឺមាននាទី ធ្វើឲ្យមានស្ថិរភាព​សេដ្ឋកិច្ច និងជាឧបករណ៍ សម្រាប់បម្រើ ឲ្យគោលនយោបាយសាធារណៈជាតិ លើគ្រប់ផ្នែក និងគ្រប់វិស័យ​ទៀត។ លោកបានស្នើដល់ ក្រសួងស្ថាប័នរដ្ឋនានា ត្រូវពង្រឹងការគ្រប់គ្រង និងអនុវត្តន៍ ការចាយវាយ​ថវិកា​របស់ខ្លួន ឲ្យបានត្រឹមត្រូវ ហើយត្រូវមានការយកចិត្តទុកដាក់ ធ្វើយ៉ាងណា ត្រូវមានសុក្រឹតភាព ពីចំណូល និង​ចំណាយ។

សម្រាប់លោក យឹម សុវណ្ណ វិញ បានថ្លែងអះអាងថា៖ «ខ្ញុំគ្មានចេតនាណាមួយ ក្រៅពីការផ្តល់យោបល់ ក្នុង​ន័យ​ស្ថាបនា ទៅដល់រាជរដ្ឋាភិបាល ទៅដល់ស្ថាប័នពាក់ព័ន្ធ ដើម្បីគ្រប់គ្រងគ្រោះមហន្តរាយ ព្រោះនេះជារឿង​ទាំង​អស់​គ្នា ជារឿងរបស់ប្រជាពលរដ្ឋខ្មែរ»៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...