ហ៊ុន ម៉ាណែត រងបណ្ដឹងឧក្រិដ្ឋចំនួនពីរ នៅអាមេរិក
- ដោយ: សេក មនោរកុមារ អត្ថបទ និងយកការណ៍៖ សេក កុមារ ([email protected]) - បារីស ថ្ងៃទី១៥ មេសា ២០១៦
- កែប្រែចុងក្រោយ: April 15, 2016
- ប្រធានបទ: យុត្តិធម៌
- អត្ថបទ: មានបញ្ហា?
- មតិ-យោបល់
-
សង្គ្រាមយុត្តិធម៌បានចាប់ផ្ដើមហើយ នៅសហរដ្ឋអាមេរិក ដែលបានតទល់គ្នា រវាងរបបក្រុងភ្នំពេញ តំណាងក្នុងពេលនេះ ដោយលោក ហ៊ុន ម៉ាណែត និងក្រុមពលរដ្ឋ ដែលអះអាងថា ខ្លួនជាជនរងគ្រោះ។ យ៉ាងហោចណាស់ បណ្ដឹងចំនួនពីរត្រូវបានប្ដឹង ប្រឆាំងនឹងលោក ហ៊ុន ម៉ាណែត៖ បណ្ដឹងទីមួយ- ជាបណ្ដឹងរបស់អ្នកស្រី មាជ ចេមី ភរិយាលោក មាជ សុវណ្ណារា ធ្វើឡើងតាមរយៈមេធាវីលោក មូ័រតុន ក្លារ (Morton Sklar) និងបណ្ដឹងទីពីរ- ជាបណ្ដឹងរបស់មន្ត្រីស្មៀន បញ្ជូនដីការតុលាការមួយរូប ដែលទំនងជាបានរងការវាយប្រហារ ពីសំណាក់អង្គរក្ស របស់លោក ហ៊ុន ម៉ាណែត ធ្វើឡើងតាមរយៈអាជ្ញាធរក្រុង ឡូសអែនជឺឡេស។
តាមពិតទៅ លោក ហ៊ុន ម៉ាណែត បានរងបណ្ដឹងទាំងនេះ ជំនួសឲ្យរបបដឹកនាំរបស់ឪពុកលោក ដែលបានកាន់អំណាចជាង៣ទសវត្សន៍ នៅក្នុងប្រទេសកម្ពុជា ហើយលោក ហ៊ុន ម៉ាណែត ជាមន្ត្រីជាន់ខ្ពស់កម្ពុជា (និងជាកូនប្រុស របស់នាយករដ្ឋមន្ត្រីថែមទៀត) តែម្នាក់គត់ ដែលមានវត្តមានលើទឹកដីសហរដ្ឋអាមេរិក នៅក្នុងរយៈពេលនៃការដាក់ពាក្យបណ្ដឹងនេះ ទៅកាន់តុលាការក្រុង ឡូសអែនជឺឡេស។ នៅក្នុងបណ្ដឹងឧក្រិដ្ឋទីមួយ អ្នកស្រី មាជ ចេមី ភរិយាលោក មាជ សុវណ្ណារ៉ា ដែលជាមន្ត្រីជាន់ខ្ពស់ របស់គណបក្សសង្គ្រោះជាតិ បានប្ដឹងរដ្ឋាភិបាលក្រុងភ្នំពេញ ពីការរំលោភសិទ្ធមនុស្សធ្ងន់ធ្ងរ ក្នុងនោះមានបទចោទ ទាក់ទងនឹងការឃុំឃាំងមនុស្សខុសច្បាប់ ការធ្វើទុក្ខបុកម្នេញទៅលើមន្ត្រីរបស់គណបក្សប្រឆាំង និងអំពើភេរវកម្មអន្តរជាតិ។
លោក ហ៊ុន ម៉ាណែត ដែលមានពាក់ផ្កាយ ជាមន្ត្រីជាន់ខ្ពស់នៅក្រសួងការពារជាតិ មានយៈពេល៣០ថ្ងៃ ដើម្បីទៅឆ្លើយបំភ្លឺនៅតុលាការអាមេរិក ពាក់ព័ន្ធនឹងបណ្តឹងប្រឆាំងរូបលោក និងរដ្ឋាភិបាលឪពុករបស់លោក។ ថ្លែងតាមរយៈវិទ្យុអាស៊ីសេរី លោកមេធាវី ម័រតុន ក្លារ បានព្រមានថា លោក ហ៊ុន ម៉ាណែត អាចប្រឈមនឹងបញ្ហាច្បាប់ ប្រសិនបើលោកមិនបង្ហាញខ្លួន ឬជួលមេធាវីការពារក្តី។
រីឯបណ្តឹងឧក្រិដ្ឋទីពីរ ធ្វើឡើងដោយអាជ្ញាធរក្រុង ឡូសអែនជឺឡេស ពីបទបង្ករបួសស្នាម ទៅលើលោក ផូល ហាយ៉េស (Paul Hayes) ជាមន្ត្រីស្មៀនបញ្ជូនដីការតុលាការ ដែលទំនងជាបង្កឡើង ដោយអង្គរក្សរបស់លោក ហ៊ុន ម៉ាណែត។
សារព័ត៌មានជាច្រើននៅអាមេរិក បានរំលឹកហេតុការណ៍នោះ ឡើងវិញថា នៅយប់ថ្ងៃទី៩ ខែមេសា លោក ផូល ហាយ៉េស បានព្យាយាមហៅឈ្មោះលោក ហ៊ុន ម៉ាណែត នៅចំងាយ១ម៉ែត្រ មុននឹងចូលទៅហុចដីការកោះរបស់តុលាការទៅឲ្យលោក នៅក្នុងភោជនីយដ្ឋានមួយ។ សកម្មភាពហុចដីការ របស់លោក ហាយ៉េស បានធ្វើឡើង ដោយអនុលោមតាមច្បាប់អាមេរិក ដែលត្រូវផ្ដល់ឯកសារកោះ ទៅឲ្យភាគីចុងចោទ នៅក្នុងរយៈពេលយូរបំផុត ៥ថ្ងៃ បន្ទាប់ពីបានទទួលបានពាក្យបណ្ដឹង។ ប៉ុន្តែនៅទីនោះ លោក ផូល ហាយ៉េស ទំនងជាត្រូវបានអង្គរក្សរបស់លោក ហ៊ុន ម៉ាណែត ចាប់លើកឡើងលើ ហើយបោកទៅលើថ្ម បណ្ដាលឲ្យរងរបួសធ្ងន់ធ្ងរ។
នៅខណៈនេះ លោក ហាយ៉េស កំពុងសម្រាកព្យាបាលរបួសឆ្អឹងខ្នង នៅក្នុងមន្ទីរពេទ្យ។ ហើយនៅពេលដែលក្រុមអាជ្ញាធរ បានចូលទៅសម្ភាសលោក នៅក្នុងមន្ទីរពេទ្យ លោក ហាយ៉េស បានឆ្លើយយល់ព្រម ឲ្យអាជ្ញាធរបើកសំនុំរឿងឡើង ក្នុងនោះមានទាំងការស៊ើបអង្កេត និងទាំងការចោទប្រកាន់ ទៅលើករណីឧក្រិដ្ឋនេះ។ លោកមេធាវី ម័រតុន ក្លារ បានពន្យល់ថា ការចោទប្រកាន់លើអង្គរក្ស និងលោក ហ៊ុន ម៉ាណែត ទាក់ទងនឹងការប្រើប្រាស់អំពើហិង្សា អាចប្រើប្រាស់រយៈពេលយូរបន្តិច ហើយអ្នកទាំងពីរ (លោក ហ៊ុន ម៉ាណែត និងអង្គរក្ស)អាចនឹងមាន ឱកាសចាកចេញពីសហរដ្ឋអាមេរិក។
គេនៅមិនទាន់ឃើញ ប្រតិកម្ម ឬសេចក្ដីប្រកាសព័ត៌មានអ្វី ពីសំណាក់លោក ហ៊ុន ម៉ាណែត នៅឡើយ ចំពោះបណ្ដឹងឧក្រិដ្ឋទាំងពីរនេះ។ ដោយឡែកមន្ត្រីរដ្ឋាភិបាលកម្ពុជា បានប្រតិកម្មតបនឹងបណ្ដឹងនេះ ថាជាការលូកលាន់ចូលកិច្ចការផ្ទៃក្នុងរបស់កម្ពុជា ហើយបានចាត់ទុកការប្ដឹង ប្រឆាំងរដ្ឋាភិបាលកម្ពុជា នៅក្នុងតុលាការអាមេរិកជា«កំហុសឆ្គង»មួយ។
ប៉ុន្តែការលើកឡើង របស់មន្ត្រីរដ្ឋាភិបាលរូបនោះ ត្រូវបានលោកមេធាវី ក្លារ ច្រានចោលទាំងស្រុង។ លោក ម័រតុន ក្លារ បានបញ្ជាក់ថា៖ «វាគ្មានន័យអ្វីទាំងអស់សម្រាប់យើង ប្រសិនបើយើងប្តឹងរដ្ឋាភិបាលកម្ពុជា នៅក្នុងប្រទេសកម្ពុជានោះ។ អស់រយៈពេលជាច្រើនឆ្នាំហើយ ដែលរដ្ឋាភិបាលកម្ពុជា បានប្រើប្រាស់តុលាការដើម្បីគាបសង្កត់ គណបក្សប្រឆាំង។»។
លោក ម័រតុន ក្លារ ធ្លាប់កាន់សំនុំរឿងជាច្រើន ដែលដាក់ប្ដឹង ប្រឆាំងនឹងរដ្ឋាភិបាលកម្ពុជា និងលោក ហ៊ុន សែន ផ្ទាល់។ កាលពីឆ្នាំ២០០៥ លោក ក្លារ ជាមេធាវីការពាក្ដីឲ្យលោក សម រង្ស៊ី ក្នុងករណីគប់គ្រាប់បែក នៅមុខរដ្ឋសភាចាស់ ក្នុងឆ្នាំ១៩៩៧។ លោក ក្លារ បានអះអាងថា លោកទទួលបានជោគជ័យនៅពេលនោះ ដោយសារតែលោក ហ៊ុន សែន បានអវត្តមាននៅក្នុងសវនាការ។ ប៉ុន្តែករណីនេះ បានបិតបញ្ចប់ទៅវិញ ដោយសារមានការសម្របសម្រួល ផ្នែកនយោបាយនៅកម្ពុជា។ រីឯនៅឆ្នាំ២០១៤ លោក ក្លារ ដែលតំណាងឲ្យក្រុមអង្គការសិទ្ធិមនុស្ស និងជនរងគ្រោះ បានប្តឹងលោក ហ៊ុន សែន ដដែល ទៅកាន់តុលាការអន្តរជាតិ ទាក់ទងនឹងបទលាក់បាំងព័ត៌មានឧក្រិដ្ឋកម្ម ប្រព្រឹត្តឡើងក្នុងរបបខ្មែរក្រហម និងការរំលោភសិទ្ធិមនុស្ស មានលក្ខណៈជាប្រព័ន្ធទូលំទូលាយ ការសម្លាប់មនុស្ស ការបង្ខំបណ្ដេញពលរដ្ឋចេញពីផ្ទះសម្បែង និងការរំលោភបំពានផ្លូវភេទ លើអ្នកទោសជាស្ត្រី៕