ប្រជុំពីរថ្ងៃ ដើម្បីសម្រេចបានពីរចំណុច។ នេះ បើតាមសេចក្ដីប្រកាសព័ត៌មាន របស់គណបក្សសង្គ្រោះជាតិ ដែលទស្សនាវដ្ដី​មនោរម្យ.អាំងហ្វូ ទើបនឹងទទួលបាន នៅមុននេះ។ 

សេចក្ដីប្រកាសព័ត៌មាន បានសរសេរថា គណៈកម្មការចំពោះកិច្ច របស់គណបក្ស បានជួបប្រជុំគ្នា ជាលើកទី២ នៅថ្ងៃទី៤-៥ ខែមិថុនានេះ ក្នុងរដ្ឋធានី វ៉ាស៊ីនតោន សហរដ្ឋអាមេរិក ដើម្បីរៀបចំផែនការសកម្មភាព យុទ្ធនាការមិនទទួលស្គាល់ «ការបោះឆ្នោតក្លែងក្លាយ នៅថ្ងៃទី២៩ ខែកក្កដា ឆ្នាំ២០១៨»​ខាងមុខ។

រីឯការសម្រេចចំនួនពីរចំណុច រួមមាន៖ (១) រៀបចំជំរុញ និងលើកទឹកចិត្តពលរដ្ឋ ទាំងក្នុងនិងក្រៅប្រទេស ធ្វើយុទ្ធនាការមិនទទួលស្គាល់ «ការបោះឆ្នោតក្លែងក្លាយ» និង(២) ពង្រីកសកម្មភាពការទូត។

មិនមានការពន្យល់បន្ថែម ត្រូវបានទម្លាយចេញ ពីអង្គប្រជុំខាងលើនេះទេ ខណៈមន្ត្រីគណបក្សមួយចំនួន ប្រចាំនៅទ្វីបអ៊ឺរ៉ុប បដិសេធន៍មិនធ្វើអត្ថាធិប្បាយ។

ប៉ុន្តែ លោក អេង ឆៃអ៊ាង អនុប្រធាន​គណបក្ស​សង្គ្រោះជាតិ និង​លោក យ៉ែម ប៉ុញ្ញឫទ្ធិ ជា​អ្នកនាំពាក្យ នឹង​​ចូលរួមក្នុង​កម្មវិធី​ នាទី​វេទិកា​អ្នក​ស្ដាប់​អាស៊ីសេរី នៅ​រាត្រី​ថ្ងៃ​ពុធ​ទី​៦ ខែ​មិថុនា នេះ​ ​ចាប់ពី​ម៉ោង​៧​កន្លះ ដល់​ម៉ោង​៨​កន្លះ​យប់ ម៉ោង​នៅ​កម្ពុជា ដើម្បី «ប្រកាស​ប្រាប់ អំពី​លទ្ធផល​នៃ​កិច្ចប្រជុំ​» ខាងលើ។ នេះ បើតាមការប្រកាសឲ្យដឹង ពីកម្មវិធីរបស់វិទ្យុមួយនេះ ផ្សាយ​ចេញពី​រដ្ឋធានីវ៉ាស៊ីនតោន។

វិទ្យុអាស៊ីសេរី បានបង្ហើបខ្លះៗដែរថា អង្គប្រជុំ«ពិសេស» នៃគណៈកម្មការចំពោះកិច្ច ដែលរួមមាន គណៈកម្មាធិការ​អចិន្ត្រៃយ៍ ​នៃ​គណបក្ស​សង្គ្រោះ​ជាតិ និង​តំណាងរាស្ត្រ​មួយចំនួននោះ បាន​ជជែក​ពី​យុទ្ធសាស្ត្រ និង​ការ​ស្វែងរក​ដំណោះស្រាយ ដើម្បី​ឲ្យ​ប្រទេស​កម្ពុជា មាន​ការ​បោះឆ្នោត​មួយ តាម​លទ្ធិប្រជាធិបតេយ្យ សេរី ត្រឹមត្រូវ និង​យុត្តិធម៌ នៅ​ពេល​ខាងមុខ៕