យន្ដហោះជាច្រើនគ្រឿង របស់កងទ័ពរ៉ូស្ស៊ី បានធ្វើការហោះហើរ «យ៉ាងព្រហើន» នៅពីលើនាវាសង្គ្រាម របស់​កងទ័ពអាមេរិក ក្នុងខណ:ដែលនាវានេះ  ស្ថិតក្នុងដែនទឹកអន្តរជាតិ នៃសមុទ្របាល់ទិក (Baltique)។ នេះ​បើតាម​ការប្រកាសឱ្យដឹង របស់អ្នកទទួលខុសត្រូវមួយរូប មកពីក្រសួងការពារជាតិអាមេរិក ដែល​បាន​ថ្លែង ក្នុងលក្ខខណ្ឌមិនបញ្ចេញឈ្មោះ។

ហេតុការណ៍ នៃករណីហោះហើរ របស់យន្ដហោះរ៉ូស្ស៊ី រំលងពីលើនាវាសង្គ្រាម ធុន «USS Donald Cook» របស់​អាមេរិក បានកើតឡើងជាច្រើនដង នៅថ្ងៃចន្ទ និងថ្ងៃអង្គារ។ អ្នកទទួលខុសត្រូវអាមេរិកដដែល បាន​បញ្ជាក់​បន្ថែមថា ជាពិសេសនៅថ្ងៃពុធ យន្ដហោះប្រដេញរ៉ូស្ស៊ី ធុន «Su-24» បានហោះរំលង នៅកំពស់​ប្រមាណ ជា៩ម៉ែត្រ ពីលើនាវាចម្បាំងអាមេរិកប៉ុណ្ណោះ។ មន្ត្រីរូបនេះបានហៅទង្វើខាងលើ ថាមាន​សណ្ឋាន​ដូច ជា​ផែនការ​វាយប្រហារមួយ។

មន្ត្រីក្រសួងការពារជាតិអាមេរិក បានឲ្យដឹងទៀតថា៖ «គឺជាការបំពាន​ដ៏ខ្លាំងបំផុតមួយ បើប្រៀបធៀប​ទៅ​នឹង​ការបំពាន​លើកមុនៗ ដែលយើងបានឃើញ»។

ហេតុការណ៍ខាងលើ បានចាប់ផ្ដើមកើតឡើង ចាប់តាំងពីថ្ងៃចន្ទ បន្ទាប់ពីនាវាចម្បាំងអាមេរិក បានស្ថិត​នៅ​ចម្ងាយ​ប្រមាណ​ជា ១៣០គីឡូម៉ែត្រ ពីក្រុង កាលីនីហ្គ្រាត (Kaliningrad) ដែលជាទឹកដីដាច់ដោយឡែក របស់​ប្រទេស​រ៉ូស្ស៊ី (នៅភាគខាងលិចបំផុត)។ ខេត្តមួយនេះ មានទីតាំងនៅចន្លោះ រវាងសមុទ្របាល់ទិក ប្រទេស​ប៉ូឡូញ និងប្រទេសលីតួអានី តែមិនជាប់ជាមួយនឹងទឹកដី រ៉ូស្ស៊ី ធំនោះទេ។

«គ្រោះថ្នាក់ខ្លាំងណាស់...»

មន្ត្រីទទួលខុសត្រូវដដែល បានរៀបរាប់ថា យន្ដហោះប្រដេញធុន «Su-24» ចំនួនពីរគ្រឿង បាន​ហោះ​រំលង​ពីលើនាវា «USS Donald Cook» ចំនួន២០ដង ស្ថិតនៅកំពស់​ប្រមាណជា ៩០០ម៉ែត្រ និងបន្ទាប់មក នៅ​កំពស់ ៣០ម៉ែត្រ។ នៅថ្ងៃអង្គារ ឧទ្ធម្ភាគចក្រប្រឆាំងនាវាមុជទឹក​មួយគ្រឿង ធុន «Ka-27» របស់កងទ័ពរ៉ូស្ស៊ី បាន​ហោះ​រំលង​ពី​លើ​នាវា​អាមេរិក ចំនួន៧ដង ដោយបានថតយករូបភាព ទៅជាមួយផង។ បន្តិចក្រោយមក យន្ដហោះ​ប្រដេញ «Su-24» បាន​ហោះ​មក​ទៀត ហើយបានហោះពីលើនាវាអាមេរិក ដោយកំពស់មួយ​ជិត​មែន​ទែន។ លោក​បាន​ថ្លែង​ឲ្យ​ដឹង​ទៀត​ថា៖ «ហោះជិតនាវា រហូតសូម្បីតែទឹកសមុទ្រ ក៏រញ្ជួយដែរ»។ ប៉ុន្តែ​លោក​បាន​និយាយ​ថា យន្ដហោះ​នេះ ទំនង​ជា​មិនមានបំពាក់អាវុធ ឬកាំជ្រួចនោះទេ។

កងទ័ពអាមេរិក ដែលមានវត្តមាននៅលើនាវា បានព្យាយាមប្រកាសសញ្ញា ប្រាប់ទៅយន្ដហោះរ៉ូស្ស៊ី តាម​រលកអាកាសអន្តរជាតិ ប៉ុន្តែមិនទទួលបានចម្លើយ ពីយន្ដហោះទាំងនោះមកវិញទេ។ អ្នក​ទទួល​ខុស​ត្រូវ​ដដែល បានបន្ថែមទៀតថា៖ «បើតាមមេបញ្ជាការនាវា បានឲ្យដឹងថា ទង្វើនេះមានគ្រោះថ្នាក់ណាស់ ហើយ​ជា​ការ​ចំអក ដ៏ព្រហើនមួយ»។

សូមបញ្ជាក់ដែរថា ទំនាក់ទំនងរវាងក្រុងម៉ូស្គូ និងក្រុងវ៉ាស៊ីនតោន បានស្គាល់នូវភាពតានតឹងកាន់តែខ្លាំង បន្ទាប់​ពីវិបត្តិ​ជាច្រើន បានផ្ទុះឡើងជាបន្តបន្ទាប់ មានជាអាថ៌ វិបត្តិនៅក្នុងប្រទេសអ៊ុយក្រែន និងនៅក្នុង​ប្រទេស​ស៊ីរី៕

» វីដេអូ និងរូបភាព ដែលកងទ័ពអាមេរិក នៅលើនាវា «USS Donald Cook» ថតបាន ពីសកម្មភាព​របស់​យន្ដហោះ​រ៉ូស្ស៊ី៖