ការប្រឈមមុខគ្នារយៈពេលខ្លី រវាងលោកស្រី មូរ សុខហួរ និងកងសន្តសុខថែរក្សាសណ្តាប់ធ្នាប់ខណ្ឌ បានកើត​ឡើងនៅព្រឹក​ថ្ងៃ​ទី១១ ខែមិថុនានេះទៀត ក្រោយពីសន្តិសុខម្នាក់ បានឆក់យកបដាក្រដាសពីលោកស្រី។ ទង្វើរបស់​សន្តិសុខ​​រូប​នោះ បេក្ខជនតំណាងរាស្រ្តជាប់ឆ្នោត មណ្ឌលបាត់ដំបង របស់គណបក្សសង្គ្រោះជាតិរូបនេះ បាន​ចោទសន្តិសុខ​ទាំងនោះ ថាជា«ចោរ»។

លោកស្រី មូរ សុខហួរ ថ្លែងទៅកាន់អ្នកសារព័ត៌មាន នៅថ្ងៃទី១១ ខែមិថុនា ឆ្នាំ២០១៤។ (រូបថត MONOROOM.info/ S. Tith)

សិទ្ធិ - នៅព្រឹកថ្ងៃទី១១ ខែមិថុនា ឆ្នាំ២០១៤នេះ បេក្ខជនតំណាងរាស្ត្រជាប់ឆ្នោត មកពីគណបក្សសង្រ្គោះជាតិ លោកស្រី មូរ សុខហួរ បានប៉ះទង្គិចគ្នាជាថ្មីទៀត ជាមួយក្រុមសន្តិសុខ ខណៈពេលលោកស្រីបានព្យាយាម​ទៅទី​លានប្រជាធិបតេយ្យ ដើម្បីឱ្យទីលានសេរីភាពមួយនេះ បើកបំរើសារធារណៈជនឡើងវិញ។

ក្នុងពេលដែលលោកស្រីកំពុងផ្តល់បទសម្ភាស ជាមួយអ្នកសារព័ត៌មានក្បែររបងបន្លាលួស ដែលកំពុងហ៊ំព័ទ្ធ​ទី​លាន​ប្រជាធិបតេយ្យ ក្រុមសន្តិសុខដែលជារឿយៗ តែងធ្វើការហាមឃាត់ អ្នកដែលមានបំណងចូលទីលាន​ប្រជាធិតេយ្យ​នោះ បានស្ទុះ បានឆក់យកបដាក្រដាស ដែលសរសេរសារថា៖ «សូមដោះលែង ទីលានប្រជាធិបតេយ្យ!» ពី​លោក​ស្រី។ បន្ទាប់ពីក្រុមសន្តិសុខបានឆក់យកបដា លោកស្រី មូរ សុខហួរ បានព្យាយាមរត់ដេញតាមពីក្រោយ ដោយ​ស្រែក​ឡើងថា៖ «នេះជារបស់ខ្ញុំៗ នេះជាកម្មសិទ្ធិរបស់ខ្ញុំៗ» និងមានការប្រទាញប្រទង់គ្នា ដណ្តើមគ្នាទៅវិញទៅ​មក​នោះផង។

មិនខុសពីសព្វមួយដងដែរ ការមកទីលានប្រជាធិបតេយ្យរបស់លោកស្រី គឺដើម្បីយកផ្កាឈូក ដែលតំណាងឱ្យធម៌​អហិង្សាមកដោតលើបន្លាលួស ក្រៅពីនេះ លោកស្រីបានយកក្រណាត់ពណ៌ទឹកក្រូច ដែលមានសរសេរជា​សារ​ផ្សេងៗ របស់ប្រជាពរដ្ឋ និងជាតំណាងឱ្យស្បង់ជីពរ ព្រះសង្ឃមកចង់ជាប់នឹងបន្លាលួស។

ក្នុងព្រឹត្តិការណ៍ដដែលនោះ ក៏មានការប៉ះពាក្យសម្តី​គ្នា រវាងក្រុមពលរដ្ឋដែលបានទៅធ្វើការជួបជុំគ្នានៅទីនោះ ជា​មួយក្រុម​សន្តិសុខនោះដែរ ដោយ​ប្រជា​ពលរដ្ឋទាំងនោះ បានចោទសន្តិសុខថាជាមនុស្សឈ្លើយ ប្រើសម្តីមិន​សមរម្យ​​ក្នុង​ការ​និយាយស្តី ជាមួយពួក​គាត់​ជា​មនុស្សចាស់។  ខាងក្រុមសន្តិសុខវិញ ធ្វើការឆ្លើយឆ្លងតបទៅវិញ ដោយមិនបង្អន់​សម្តី​ខ្លួនឡើយ និងបានចោទ​អ្នក​ដែលព្យាយាម មកសម្តែងមតិនៅទីលានប្រជាធិបតេយ្យថា បាន​ធ្វើឱ្យខូចសណ្តាប់ធ្នាប់ និងស្ទះចរាចរណ៍៕

សូមទស្សនាវីដេអូ ស្ដីពីព្រឹត្តិការណ៍នេះដូចតទៅ៖