ប្រធានសហជីពសេរីកម្មករកម្ពុជា លោក ជា មុន្នី បានឡើកឡើងថា កម្ពុជាបច្ចុប្បន្ននេះ មិនមែនជាឋានសួគ៌សម្រាប់ សហជីព និងសង្គមស៊ីវិលនោះទេ ហើយបានចាត់ទុកការលើកឡើង របស់លោកនាយករដ្ឋមន្រ្តី ហ៊ុន សែន គឺគ្រាន់​តែជាការបិទបាំងកំហុសរបស់ខ្លួន និងជាបិទបាំងការរំលោភបំពាន របស់រដ្ឋាភិបាលមកលើកសហជីព និងអង្គការ​សង្គមស៊ីវិលតែប៉ុណ្ណោះ។

នាយករដ្ឋមន្ត្រីខ្មែរ លោក ហ៊ុន សែន។

វិបត្តិការងារ - លោក ជា មុន្នី បានបញ្ជាក់ប្រាប់ទស្សនាវដ្តីមនោរម្យ.អាំងហ្វូ នៅថ្ងៃទី០៤ មីនា នេះថា៖ «បុគ្គលមាន​អំណាចរបស់រដ្ឋាភិបាលមួយចំនួន ពាក់ព័ន្ធនឹងទ្រព្យសម្បត្តិសាធារណៈរបស់រដ្ឋ។ ឲ្យតែមន្រ្តីធំៗរបស់​រដ្ឋាភិបាល​ម្នាក់ៗ មានលុយរាប់លានដុល្លារ។ បញ្ហាអស់នឹងសង្គមស៊ីវិល និងសហជីព គេរិះគន់។ អញ្ចឹងលោក ហ៊ុន សែន និយាយថា កម្ពុជា ជាឋានសួគ៌ មិនមែនទេ (...)។ ដូច្នេះបើរដ្ឋាភិបាល ឈប់ពុករលួយ នឹងមិនមានសហជីព និង​សង្គមស៊ីវិលណារិះគន់ទៀតទេ។»។

លោកនាយករដ្ឋមន្រ្តី ហ៊ុន សែន នៅក្នុងពិធីមួយ នៅថ្ងៃទី០៤ ខែមីនា នេះ បានអះអាងថា ប្រទេសកម្ពុជា គឺជា​ឋាន​សួគ៌​របស់ក្រុមអង្គការសង្គមស៊ីវិល និងសហជីព។ ក្នុងកម្មពិធីដដែលនោះ ក្រុមការងាររបស់ក្រសួងពាណិជ្ជកម្ម និង ក្រសួងការងារបណ្តុះបណ្តាលវិជ្ជាជីវៈ ក៏បានលើកឡើងពីផលលំបាកនានា ដែលបានកើតឡើងក្នុងវិស័យកាត់ដេរ ជាពិសេសបញ្ហាកូដកម្ម ដែលបានកើតឡើងជាញឹកញាប់ និង បង្កការខាតបង់។

តែការលើកឡើងនេះ ត្រូវបានលោក ជា មុន្នី ពន្យល់ថា បញ្ហាដែលកើតឡើង គឺដោយសារការចរចារវាងសហជីព និងក្រសួងរបស់រដ្ឋាភិបាល ដែលពាក់ព័ន្ធកន្លងមក មិនមានភាពស្អាតស្អំ និងតម្លាភាព។ ហើយបញ្ហានេះ ពាក់ព័ន្ធ​សំខាន់ដល់ ក្រសួងការងារ និងក្រសួងសង្គមកិច្ច។

ប្រធានសហជីពសេរីកម្មករកម្ពុជារូបនេះបញ្ជាក់ថា៖ «អ្នកវិនិយោគទុន មិនគួរឲ្យមានការភ័យខ្លាចនោះទេ ប្រសិនជា​គាត់បានគោរពច្បាប់រដ្ឋ ច្បាប់ការងារ ច្បាប់រដ្ឋធម្មនុញ្ញ កតិកាសញ្ញានានា។ មិនគួរព្រួយបារម្ភទេ ព្រោះសហជីព​នៅ​លើ​ពិភពលោកប្រទេសណាក៏មានដែរ វៀតណាម ចិន ក៏មាន។ គាត់មិនត្រូវភ័យរឿងសហជីពដើរញុះញង់នោះទេ ដោយគាត់គ្រាន់តែ កាត់បន្ថយសហជីពរដ្ឋាភិបាល ហើយគោរពច្បាប់ អ្វីៗនឹងរលូន»៕

--------------------------------------
ដោយ អ៊ុំ បូរី (ទំនាក់ទំនង៖ [email protected]) - ភ្នំពេញ ថ្ងៃទី០៤ មីនា ២០១៤