កាលពីថ្ងៃទី១០ ខែវិច្ឆិកា ម្សិលម៉ិញនេះ លោក ញ៉យ ចំរើន តំណាងរាស្រ្តមណ្ឌល និងលោក គង់ សភា តំណាង​រាស្រ្តមណ្ឌលស្វាយរៀង មកពីគណបក្សសង្គ្រោះជាតិ បានដាក់ពាក្យបណ្តឹង ទៅកាន់សាលា​ដំបូង​រាជធានី​ភ្នំពេញ ដោយចោទប្រកាន់ លើបាតុករមួយក្រុម ពីបទប៉ុនប៉ងឃាតកម្ម គិតទុកជាមុន និងធ្វើឲ្យខូច​ខាត​ដោយ​ចេតនា មានស្ថានទំងន់ទោស។

សូមរំលឹកថា កាលពីថ្ងៃទីទី៤ ខែវិច្ឆិកា ឆ្នាំ២០១៥ ជនសង្ស័យបីនាក់ បានចេញមុខដំណាលគ្នា មកសារភាព ដោយ​អះអាងថា ពួកខ្កួនពិតជាបានព្រួត វាយតំណាងរាស្រ្តទាំងនោះមែន ក៏ព្រោះតែតំណាងរាស្រ្តនោះ បាន​ជេរ​ពួក​ខ្លួន​ដែរ។ យ៉ាងណា ជនទាំងបីនាក់នេះ ត្រូវបានតុលាការចោទប្រកាន់ត្រឹមបទ «បង្កហិង្សាដោយ​ចេតនា និង​ធ្វើ​ឲ្យ​ខូចខាតទ្រព្យសម្បត្តិដោយចេតនា មានស្ថានទម្ងន់ទោស» ប៉ុណ្ណោះ។

កាលពីថ្ងៃទី២៦ ខែតុលា ឆ្នាំ២០១៥ វេលាថ្ងៃត្រង់ តំណាងរាស្រ្តទាំងពីររូបខាងលើ ត្រូវបានបាតុករមួយក្រុម ទាញ​ចេញពីក្នុងរថយន្ដផងខ្លួន មកវាយប្រហារយ៉ាងចាស់ដៃ បន្ទាប់ពីបាតុកម្ម ដែលមាន​និន្នាការ​គាំទ្រ​គណបក្ស​ប្រជាជនកម្ពុជា ត្រូវបានរៀបចំធ្វើពីព្រឹក ថ្ងៃដដែល នៅមុខវិមានរដ្ឋសភា ដើម្បី​ទាម​ទារ​ឲ្យ​ទម្លាក់​លោក កឹម សុខា ចេញពីតំណែង ជាអនុប្រធានទីមួយ នៃរដ្ឋសភា។

តាមពាក្យបណ្តឹង របស់តំណាងរាស្រ្តខាងលើ ក្រៅពីប្តឹង ពីបទប៉ុនប៉ងធ្វើឃាត ដោយគិតទុកជាមុន និង​ធ្វើ​ខូចខាត​ដោយចេតនា មានស្ថានទម្ងន់ទោស ជាមួយនឹងការទាមទារ សំណងជំងឺចិត្ តជាប្រាក់ចំនួន ១០០​លាន​រៀល​នោះ ក៏បានស្នើឲ្យតុលាការ ធ្វើការស្រាវជ្រាវ ចោទប្រកាន់ និងផ្តន្ទាទោសជនល្មើសទាំងនោះ ទៅ​តាម​ផ្លូវ​ច្បាប់។

«អំពើរបស់បាតុករទាំងនោះ គឺប៉ុនប៉ងវាយសម្លាប់រូបខ្ញុំ។ ដោយសារមានអ្នកសារព័ត៌មាន និងប្រជាពលរដ្ឋ ជួយ​ឃាត់ ប្រាកដ​ជា​ពួក​បាតុករ​ទាំងនោះ វាយសម្លាប់ខ្ញុំ ជាប្រាកដ។» នេះជាសំដីរួមគ្នា របស់លោក ញ៉យ ចំរើន និង​លោក គង់ សភា ក្នុង​ពាក្យ​បណ្តឹង​ពីរ ដាច់ដោយឡែកពីគ្នា ទៅកាន់សាលាដំបូងរាជធានីភ្នំពេញ កាល​ពី​ថ្ងៃ​ទី១០ ខែ​វិច្ឆិកា ឆ្នាំ​២០១៥នេះ។

ទស្សនាវដ្តីមនោរម្យ.អាំងហ្វូមិនអាចសុំការបញ្ជាក់ ពីលោក ខៀវ សុភ័គ អ្នកនាំពាក្យក្រសួងមហាផ្ទៃ ពាក់ព័ន្ធ​នឹងចំណាត់ការ នៃការតាមចាប់ជនដៃដល់ នៅក្នុងសំនុំរឿងខាងលើបាននៅឡើយទេ។ តែលោកធ្លាប់បាន​ធ្វើការ​អះអាងថា ក្រុមជំនាញនៃគណកម្មការស៊ើបអង្កេត ក្រសួងមហាផ្ទៃ បាននឹងកំពុងបន្តស្វែងរកចាប់ខ្លួន ជន​ដៃ​ដល់​ផ្សេងៗទៀត។

ការលើកឡើង របស់អ្នកនាំពាក្យ​ក្រសួងមហាផ្ទៃ​ខាងលើនេះ ត្រូវបានសង្គមស៊ីវិលមួយចំនួន បាន​ធ្វើការ​រិះគន់​ថា សមត្ថកិច្ចរបស់ប្រទេសកម្ពុជា អនុវត្តច្បាប់ តាមបែប «ពីរស្តង់ដា»។ សង្គមស៊ីវិលទាំងនោះថា បើ​ជន​សង្ស័យ ដែលគម្រាមសម្លាប់ មន្រ្តីរដ្ឋាភិបាល ឬវាយក្រុមសន្តិសុខ នាពេលកន្លងមក បើទោះជា​គ្មាន​អត្ថសញ្ញាណ ច្បាស់លាស់ក៏ដោយ ត្រូវបានចាប់ភ្លាមៗ ខណៈជនបង្កហិង្សា លើតំណាង​រាស្ត្រ​គណបក្ស​ប្រឆាំង មានអត្តសញ្ញាណ រូបថត និងវីដេអូច្បាស់លាស់ហើយ តែផ្ទុយទៅវិញ នៅតែអះអាងថា «ពិបាក»​ស្វែង​រក​ដែរ។

សូមបញ្ជាក់ថា កាលពីថ្ងៃទី៤ ខែវិច្ឆិកា ឆ្នាំ២០១៥ ព្រះរាជអាជ្ញារងអមសាលាដំបូង រាជធានីភ្នំពេញ លោក មាស ច័ន្ទពិសិដ្ឋ ដែលកាន់សំណុំរឿង ជនសង្ស័យទាំងបី ចូលខ្លួនសារភាពនោះ បានលើកឡើងថា ជន​ទាំង​បី​ត្រូវ​ជាប់​ចោទ ពីបទហិង្សាដោយចេតនា និងធ្វើឲ្យខូចខាតទ្រព្យសម្បត្តិ ដោយចេតនា មាន​ស្ថាន​ទម្ងន់​ទោស តាម​មាត្រា​២១៨ និងមាត្រា៤១១ នៃក្រមព្រហ្មទណ្ឌ។ ជនសង្ស័យទាំងបី អាចនឹងជាប់ពន្ធនាគារ រយៈពេល​ពី២ឆ្នាំ ទៅ៥ឆ្នាំ និងពិន័យជាប្រាក់ ពី៤លានរៀល ទៅ១០លានរៀល។

លោកនាយករដ្ឋមន្រ្តី ហ៊ុន សែន បានលើកឡើង កាលពីថ្ងៃទី៥ ខែវិច្ឆិកា ឆ្នាំ២០១៥ថា អ្នកវាយតំណាង​រាស្រ្​តនោះ មិនមែនជាក្រុមបាតុករ ដែលគាំទ្រគណបក្សលោកឡើយ។ បុរសខ្លាំងកម្ពុជា បានថ្លែងឲ្យដឹងថា​៖ «តាម​ដឹងអារឿងហិង្សាហ្នឹង... មិនមែនពួកបាតុករវាយណា។ អាហ្នឹងបើតាមការសិក្សា ពួកបាតុករ​រំសាយ​អស់​ហើយ។ (...) គេជេរ ឭគេផ្សាយអញ្ចឹង ល្ងាចមិញឃើញទូរទស្សន៍ផ្សាយ។ អ្នកមកសារភាពថា បើក​ឡាន​ជេរ​ខ្ញុំថា អាយ៉ងយួន។ (...) តែឲ្យតែវាយ ខុសហើយ។»៕