ក្រោយការអនុម័តជាផ្លូវការ ក្រោមសម្លេង ៤៤លើ៤៤ សម្លេង មកពីគណបក្សប្រជាជនកម្ពុជា តែមួយនោះ លោក ម៉ម ប៊ុននាង អ្នកនាំពាក្យព្រឹទ្ធសភា បានលើកឡើងថា ការដែលព្រឹទ្ធសភា យល់ព្រមអនុម័ត លើ​សេចក្ដីព្រាងច្បាប់​ ស្ដីពីសមាគម និងអង្គការក្រៅរដ្ឋាភិបាលនេះ  ព្រោះតែចង់បាន នូវការការពារអង្គការ សមាគម និងសង្គមស៊ីវិលទាំងនោះ ដោយរដ្ឋាភិបាល តាមរយៈការគ្រប់គ្រង លើប្រាក់ចំណូល និង​ចំណាយ ដែលបានទទួលជំនួយពីបរទេស។

នាវិមានព្រឹទ្ធសភា នាព្រឹកថ្ងៃទី២៤ ខែកក្កដានេះ អ្នកនាំពាក្យព្រឹទ្ធសភា លោក ម៉ម ប៊ុននាង បានថ្លែងថា មក​ទល់ពេលនេះ អង្គកការសង្គមស៊ីវិល មានរហូតដល់ជាង ៥០០០ទៅហើយ។ ហើយគ្មានច្បាប់គ្រប់គ្រងនោះ វាមិនអាចទៅរួចទេ។ តើការព្រួយបារម្ភ របស់រដ្ឋាភិបាល និងសង្គមជាតិ មានការបារម្ភណាស់។ លោកថា រដ្ឋាភិបាលត្រូវការចាំបាច់ នូវអង្គការសង្គមស៊ីវិលទាំងនោះ ដែលបានមកជួយប្រជាពលរដ្ឋខ្មែរ នូវប្រាក់​រាប់​រយ​លាន ពីបរទេស។

លោក ប៊ុននាង បានលើកឡើងទៀតថា ការបង្កើតច្បាប់នេះ ដើម្បីជួយពួកគាត់ ឲ្យទទួលប្រាក់ទាំងនោះ ដោយ​ស្របច្បាប់។ លោកបានថ្លែងថា៖ «ការដែលជួយមកហ្នឹង (ប្រាក់) យកទៅថ្វើអ្វីខ្លះ? ជួយដល់ពលរដ្ឋក្រីក្រ នៅ​កន្លែងណាខ្លះ? មានសារៈសំខាន់បែបម៉េចខ្លះ? ដើម្បីការពារគាត់ ដោយមានច្បាប់ការពារគាត់។ (...) ច្បាប់​ការពារ​គាត់ ដើម្បីកុំឲ្យគេចោទថា ការប្រើប្រាស់លុយមិនល្អ ការលាងលុយ ឬការប្រើប្រាសល់លុយគាត់​មិន​ល្អ យើងមានរបាយការណ៍គ្រប់គ្រាន់ មានច្បាប់ការពារឲ្យគាត់។ នេះជាចំណុចល្អ ក្នុងច្បាប់របស់យើង។»

បរទេសគាំទ្រច្បាប់នេះ?

ជាចុងក្រោយ លោកបានបញ្ជាក់ថា អង្គការដែលគេធ្វើការពិតប្រាករដ ត្រឹមត្រូវ គ្មានការបន្លំ ដូចជាអង្គការ​ក្រៅ​រដ្ឋាភិបាល មក​ពីអាមេរិកជាដើម គេមិនមានការព្រួយបារម្ភអ្វីទេ លើច្បាប់នេះ។ គាត់មកជួយដល់​ប្រទេស​កម្ពុជា ហើយប្រទេសកម្ពុជាមានច្បាប់ការពារពួកគាត់ ពួកគាត់រិតតែសប្បាយចិត្ត។ លោកបញ្ជាក់ថា៖ «មិន​មែន​បាត់បង់ទេ គឺគាត់ចង់បានទៅវិញទេ។ តែបុគ្គលមួយចំនួន ដែលអនុវត្តទៅមានការមិនច្បាស់លាស់ បន្លំ នោះទើបមានការព្រួយបារម្ភ។ តែម្ចាស់ជំនួយដូចជាអាមេរិក និងប្រទេសនានា គេចង់បាននូវច្បាប់នេះ។»

ការថ្លែងរបស់លោក ម៉ម ប៊ុននាង ខាងលើនេះ មានលក្ខណៈផ្ទុយ ពីសេចក្ដីថ្លែងការណ៍ របស់សភាអ៊ឺរ៉ុប ដែល​បានចេញផ្សាយ កាលពីថ្ងៃទី៩ ខែកក្កដា កន្លងមកនេះ។ តាមរយៈ សេចក្ដីថ្លែងការណ៍នោះ សភាអ៊ឺរ៉ុប ដែល​តំណាងឲ្យប្រទេសម្ចាស់ជំនួយ ជិត៣០ នៅក្នុងទ្វីបអ៊ឺរ៉ុប បានហៅច្បាប់ ដ៏ចម្រូងចម្រាស់ខាងលើ ថាមាន​លក្ខណៈ ជួយពង្រឹងការត្រួតពិនិត្យ រឹតបណ្ដឹង ពីសំណាក់​អាជ្ញាធរ ទៅលើអង្គការសង្គមស៊ីវិល នៅកម្ពុជា ហើយ​ច្បាប់នេះ អាច​ធ្វើ​ឲ្យ​ខាតបង់ ដល់ប្រទេសកម្ពុជា នូវទឹកប្រាក់ជំនួយ ប្រមាណពី ៦០០ ទៅ ៧០០លាន​ដុល្លា ក្នុងមួយឆ្នាំៗ ដែល​​ត្រូវ​បានផ្ដល់ ទៅឲ្យអង្គការសង្គមស៊ីវិលទាំងនោះ តាមរយៈគម្រោងអភិវឌ្ឍន៍នានា។

សភាអ៊ឺរ៉ុប បាន​បន្ថែម​នៅ​ក្នុងសេចក្ដីថ្លែងការណ៍ របស់ខ្លួនទៀតថា៖ «ច្បាប់ថ្មីរបស់កម្ពុជានេះ នឹងធ្វើឲ្យថម​ថយ នូវលទ្ធភាព របស់​អង្គការ​ក្រៅរដ្ឋាភិបាលបរទេស មិនឲ្យធ្វើការងាររបស់ពួកគេ ប្រកបដោយប្រសិទ្ធភាព​បាន។»៕