ផ្លូវ​ក្រោម​ដី ដើម្បី​បញ្ជៀស​ការ​កក​ស្ទះ ឬ​បណ្ដោះ​ទឹក​ភ្លៀង​ជន់?

ទន្ទឹម​នឹងការរីករាយអបអរ ទៅនឹងការជូនដំណឹងរបស់សាលារាជធានីភ្នំពេញ ដែលប្រកាសឲ្យដឹង ពីការបើកឲ្យ​ប្រើ​ប្រាស់ នូវផ្លូវក្រោមដីនា​ទីតាំង​ស្ពាន​ស្ទឹងមានជ័យ​ ដើម្បីបញ្ជៀសការកកស្ទះនោះ ប្រជាពលរដ្ឋមួយចំនួន ដែលរស់​នៅក្នុងរាជធានី និងជាអ្នកប្រើប្រាស់ផ្លូវថ្នល់ បាននិយាយថា ការបើកផ្លូវក្រោមដីនឹងមិនមាន​ប្រយោជន៍អ្វីខ្លាំងក្លា​ឡើយ ដោយសារតែរដូវវស្សាបានឈានចូលមកដល់ ហើយផ្លូវថ្នល់ក្នុងរាជធានីដែលទាបៗ នឹងប្រាកដជាត្រូវលិច​លង់​ដោយទឹកភ្លៀងជន់ជាពុំខាន។
Loading...
  • ដោយ: ដារា រិទ្ធ
  • កែប្រែចុងក្រោយ: June 01, 2014
  • ប្រធានបទ:
  • អត្ថបទ: មានបញ្ហា?
  • មតិ-យោបល់

ទន្ទឹម​នឹងការរីករាយអបអរ ទៅនឹងការជូនដំណឹងរបស់សាលារាជធានីភ្នំពេញ ដែលប្រកាសឲ្យដឹង ពីការបើកឲ្យ​ប្រើ​ប្រាស់ នូវផ្លូវក្រោមដីនា​ទីតាំង​ស្ពាន​ស្ទឹងមានជ័យ​ ដើម្បីបញ្ជៀសការកកស្ទះនោះ ប្រជាពលរដ្ឋមួយចំនួន ដែលរស់​នៅក្នុងរាជធានី និងជាអ្នកប្រើប្រាស់ផ្លូវថ្នល់ បាននិយាយថា ការបើកផ្លូវក្រោមដីនឹងមិនមាន​ប្រយោជន៍អ្វីខ្លាំងក្លា​ឡើយ ដោយសារតែរដូវវស្សាបានឈានចូលមកដល់ ហើយផ្លូវថ្នល់ក្នុងរាជធានីដែលទាបៗ នឹងប្រាកដជាត្រូវលិច​លង់​ដោយទឹកភ្លៀងជន់ជាពុំខាន។


ស្ពានអាកាស ដែលសាងសង់ហើយមួយភាគធំហើយនេះ។ (រូបថត MONOROOM.info/ D. Rith)

ទឹកភ្លៀងជន់ - ពលរដ្ឋអ្នករត់ម៉ូតូឌុបមួយរូប លោក ផល បានថ្លែងប្រាប់ទស្សនាវដ្ដីមនោរម្យ.អាំងហ្វូ ពីម្ដុំគល់​ស្ពាន​ស្ទឹងមានជ័យថា «ធ្វើតែថ្នល់ តែលូកុំធ្វើ អញ្ចឹងអាផ្លូវក្រោមដីនេះ នឹងត្រូវលិចលង់ដោយទឹកភ្លៀងរហូត។ ហើយតែ​លិចហើយ អាផ្លូវនៅខាងលើ ក៏នៅតែកកស្ទះដដែលណ្នឹង។ ខ្ញុំមើលទៅមិនមានប្រយោជន៍អីប៉ុន្មានទេ។» រីឯពលរដ្ឋ​រួមអាជីព ជាមួយលោក ផល ម្នាក់ទៀតដែលឈរនៅក្បែរនោះ បានលូកមាត់ដែរថា «បើមិនធ្វើលូឲ្យហូរស្រួល​បួល​ទេ គេបើកផ្លូវក្រោមដីនេះ គឺដើម្បីឲ្យយើង ដឹកភ្ញៀវជិះជ្រមុជក្នុងទឹក»។

ការលើកឡើងរបស់ពលរដ្ឋខាងលើ ជាចម្លើយតបនឹងសំនួររបស់ទស្សនាវដ្ដី ទាក់ទងនឹងការប្រកាសថ្មីៗនេះ របស់​សាលារាជធានីភ្នំពេញ ដែលជូនដំណឹងថា នឹងដាក់​ឲ្យ​ប្រើប្រាស់​ជា​បណ្តោះអាសន្ន​ចាប់ពី​ព្រឹក​ថ្ងៃទី៤ ខែមិថុនា ឆ្នាំ​២០១៤ ខាងមុខនេះតទៅ នូវកំណាត់ផ្លូវ​ក្រោម​ដីមួយ ​ស្ថិតនៅ​ទីតាំង​ស្ពាន​ស្ទឹងមានជ័យ ​ក្នុងភូមិ​សាស្ត្រ​ព្រំប្រទល់​ខណ្ឌចំការមន ខណ្ឌទួលគោក និង​ខណ្ឌមានជ័យ។ សេចក្ដីជូនដំណឹង ដែលផ្សាយកាលពី​ថ្ងៃទី៣១ ខែឧសភា បាន​ឲ្យដឹងទៀតថា  ការអនុញ្ញាត​ឲ្យ​ប្រើប្រាស់​ផ្លូវ​ក្រោម​ដី​បណ្តោះអាសន្ន គឺ​ដើម្បី​បញ្ចៀស​ការកកស្ទះ​ចរាចរ ដោយ​សារ​តែ​ការដ្ឋាន​សាងសង់​ស្ពាន​អាកាស​ ស្ទឹងមានជ័យ បានបង្កឲ្យមានកកស្ទះនៅលើតំបន់នោះ ជាច្រើនម៉ោង និងជា​រៀង​រាល់ថ្ងៃ។

តែពលរដ្ឋមួយចំនួនទៀត បានថ្លែងអបអរ ដោយបាននិយាយថា យ៉ាងហោចណាស់ ក៏ការបើកផ្លូវក្រោមដី នឹងអាច​ជាជំនួយដល់ការធ្វើចរាចរ បានមួយកម្រិតដែរ។ អ្នកស្រី ផល្លា ដែលមានមុខរបរលក់ឈើ នៅក្បែរនោះ បាននិយាយ​ថា «មានប្រឡាយបណ្ដោះទឹកលូ នៅក្បែរនេះដែរ មើលទៅប្រហែលជាមិនអីទេ។ បើទោះជាលិច ក៏គេអាចនឹងធ្វើការ​បូមចេញភ្លាមៗ។»

ចរិកដូចកញ្ជើធ្លុះ ...

សាលា​រាជធានី​បានបញ្ជាក់ ​ក្នុងសេចក្ដីប្រកាសទៀតថា ស្ពាន​អាកាស​ស្ទឹងមានជ័យបានសម្រេចជារូបរាង ប្រមាណ​ជា៩៥ភាគរយ​នៃ​គម្រោង​ហើយ ខណៈ​ការសាងសង់​នឹងត្រូវ​បញ្ចប់​ទាំងស្រុង​នៅ​ថ្ងៃទី១៥ ខែកក្កដា ឆ្នាំ២០១៤ ខាង​មុខ។ លោក ប៊ុនថា ដែលអង្គុយនៅក្នុងរថយន្ដតូចរបស់លោក ចតនៅមុខវត្តសាមគ្គីរង្សី បាននិយាយដោយ​ក្ដី​សង្ឃឹម​ថា៖ «ការបើកផ្លូវក្រោមដីតែមួយរយៈនេះ ក៏វាគ្រាន់បើជាងអត់»។ តែលោកបានរិះគន់សាលារាជធានីថា គួរតែធ្វើផ្លូវ​ជំនួយនេះ ពីយូរមកហើយ មិនមែនជិតចប់ការដ្ឋានហើយ ទើបនឹងចេញសេចក្ដីប្រកាសឲ្យប្រើប្រាស់អញ្ចឹងនោះទេ។ លោកនិយាយថា៖ «សាលារាជធានីទាំងមូល តែចរិកដូចកញ្ជើធ្លុះ។ ទុកឲ្យកូន ទាល់តែមានជម្ងឺ ទើបនាំទៅរកថ្នាំ​ព្យាបាល។ អារឿងធ្វើលូនេះ ក៏អញ្ចឹងដែរ។»។

មិនទាន់អាចទាក់ទងមន្ត្រីអ្នកនាំពាក្យសាលារាជធានីភ្នំពេញ ដើម្បីឆ្លើយតបនឹងការលើកឡើង របស់ប្រជាពលរដ្ឋ​ទាំងនេះ បាននៅឡើយ នៅថ្ងៃអាទិត្យទី១ ខែមិថុនានេះ។

បញ្ហាកកស្ទះចរាចរក្នុងតំបន់នេះ បានកើតមានសឹងរហូតមក តាំងពីមុនបើកការដ្ឋាធ្វើស្ពានអាកាស ហើយបង្ក​ឲ្យ​មាន​ភាពមិនសប្បាយចិត្ត ពីពលរដ្ឋដែលរស់នៅតំបន់ជុំវិញ ដែលតែងតែប្រើប្រាស់ផ្លូវថ្នល់នេះ។ លោក វី មន្ត្រីរាជការ​មួយរូប រស់នៅខាងលិចវត្តសាមគ្គីរង្ស៊ី បាននិយាយថា «វាមិនមែនស្ទះតែនៅត្រឹមស្ពានស្ទឺងមានជ័យនេះទេ តែវា​បានស្ទះតាំងពីមួយគីឡូដី ខាងលិចស្ពានស្ទឺងមានជ័យនេះទៅទៀត»។ លោក វី បានពន្យល់ថា ចង់សាលារាជធានី​ធ្វើផ្លូវក្រោមដី១០កំណាត់ផ្លូវទៀត ក៏នៅតែបញ្ជៀសបញ្ហាមិនបានដែរ ព្រោះវាមិនមែនជាដំណោះស្រាយ​សម្រាប់​រយៈពេលវែង។ លោកថាអ្នកប្រើប្រាស់ទ្រូងផ្លូវសព្វថ្ងៃ មិនគោរពច្បាប់​ចរាចរ ជាពិសេសការចតរថយន្ដម៉ូតូ និងការ​ដាក់តាំង​លក់ធ្វើអាជីវកម្មមកលើទ្រូងថ្នល់ មាន​លក្ខណៈយ៉ាងអាណាធិបតេយ្យ ពាស​វាលពាលកាល៕

រូបភាពពីគម្រោងប្លង់នៃស្ពានអាកាសនៅស្ទឺងមានជ័យ៖

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...