គំនុំអស់រយៈពេលជាង ២ ឆ្នាំមកនេះ បានធ្វើឲ្យបុរសម្នាក់ ឈ្មោះ ធូ ពៅ ហៅ ចាន់ លើកដៃវាយ គូជម្លោះ​របស់ខ្លូន រហូតបែកក្បាលស្លាប់ ក្នុងថ្លុកឈាម ខណៈជនរងគ្រោះ កំពុងដេកលក់លើកៅអីបង្អែក ក្នុងវត្ត​ថ្វាយដង្គំ សង្កាត់មនោរម្យ ខណ្ឌ៧មករា កាលពីថ្ងៃទី០២ ខែកក្កដា ឆ្នាំ២០១។

ករណីមនុស្សឃាតនេះ ត្រូវបាននគរបាល ការិយាល័យព្រហ្មទណ្ឌកំរិតធ្ងន់ តាមឃាត់ខ្លូនជនសង្ស័យបាន នៅយប់ថ្ងៃទី ០៥ ខែកក្កដា ក្រោយពេលធ្វើសកម្មភាព បាន០៣ថ្ងៃ ស្ថិតក្នុងមជ្ឈមណ្ឌល ម៉ុងឌីយ៉ាល់ សង្កាត់​ផ្សារដើមគ ខណ្ឌទួលគោក រាជធានីភ្នំពេញ។

ជនរងគ្រោះ ដែលបានស្លាប់ក្នុងរណីគំនុំគ្នា អស់រយៈពេលពីរឆ្នាំមកនេះ ត្រូវបានគេស្គាល់ឈ្មោះ កឺ អាយុ​ប្រមាណជាង ២០ឆ្នាំ។ រីឯជនសង្ស័យ ដែលធ្លាប់ជាអតីតជនរងគ្រោះនោះ ត្រូវបានកម្លាំង​នគរបាល​រាជធានី​ភ្នំពេញ បញ្ជូនខ្លូនទៅកាន់តុលាការ ក្នុងព្រឹកថ្ងៃទី៦ ខែកក្កដានេះ។

មន្រ្តីនគរបាលព្រហ្មទណ្ឌកំរិតធ្ងន់មួយរូប បានបញ្ជាក់ជាចុងក្រោយថា មូលហេតុដែលនាំឲ្យជនសង្ស័យ វាយ​សម្លាប់​ជនរងគ្រោះ ព្រោះដោយសារតែខឹងជនរងគ្រោះ ធ្លាប់បានចាក់ជនសង្ស័យមួយកាំបិត កាលពី០២ ឆ្នាំ​មុន ហើយ​ព្យាយាមសងសឹក ជាមួយជនរងគ្រោះរហូតបានសម្រេច៕