ការលើកពេល ឬអាក់ខាន នៃកិច្ចប្រជុំសំងាត់ ស្តីពីដំណោះស្រាយ ព្រំដែនកម្ពុជា-វៀតណាមនេះ ទំនងជា​បណ្ដាល​មកពី មានការលេចឮព័ត៌មានថា នឹងមានការជួបជុំ នៃក្រុមអង្គការ ព្រះសង្ឃ និងយុវជន ដើម្បីធ្វើការ​តវ៉ាប្រឆាំង ទាំងនៅមុខស្ថានទូតវៀតណាម និងមុខទីស្តីការគណៈរដ្ឋមន្រ្តី។ នេះបើតាមមន្រ្តីមួយរូប នៃ​ទីស្តីការ​គណរដ្ឋមន្រ្តី ដែលសុំមិនបញ្ចេញឈ្មោះ។ ប៉ុន្តែប្រភពច្បាស់ការណ៍មួយទៀត បានអះអាងថា កិច្ចប្រជុំនេះ នៅ​តែ​ប្រព្រឹត្តិ​ទៅ​ដូចការគ្រោងទុក ដោយគ្រាន់តែផ្លាស់ប្ដូរទីកន្លែងប៉ុណ្ណោះ។

ព័ត៌មាន នៃកិច្ចប្រជុំសំងាត់កិច្ចការព្រំដែន ត្រូវបានបែកធ្លាយ ហើយបន្ទាប់មក មានលេចឮព័ត៌មាន​បន្ថែម​ទៀតថា នឹងមានរលកតវ៉ាមួយ ពីសំណាក់ក្រុមយុវជន ព្រះសង្ឃ ជុំវិញបូរណភាពទឹកដី និងបញ្ហានៅព្រំដែន កម្ពុជា-វៀតណាមនេះ។ នៅព្រឹកថ្ងៃចន្ទ ទី៦ ខែកក្កដានេះដែរ គេក៏បានសង្កេតឃើញដែរ ថាមានការដាក់​ពង្រាយយ៉ាងសន្ធឹកសន្ធាប់ នូវកម្លាំងសមត្ថកិច្ចចំរុះកម្ពុជា នៅមុខស្ថានទូតវៀតណាម ប្រចាំកម្ពុជា និងតាម​ចំណុចជាច្រើន ក្នុងរាជធានីភ្នំពេញ ដូចជានៅខាងត្បូង ភ្លើងស្តុបបូកគោ តាមបណ្តោយផ្លូវព្រះមុន្នីវង្ស រហូត​ដល់ចំណុច មុខក្លឹមកំសាន្តរ៉ក់ (មុខកាល់តិចបឹងត្របែក)។ ដោយឡែកក្រុមយុវជន និស្សិត ព្រះសង្ឃ ឬអង្គការ​សង្គមស៊ីវិល មិនឃើញមានវត្តមាន រចលនាតវ៉ា នៅមុខស្ថានទូតវៀតណាម ក្នុងព្រឹកនេះឡើយ។

ចំពោះមូលហេតុច្បាស់លាស់ នៃការលើកពេល ឬការអាក់ខាន នៃកិច្ចប្រជុំសម្ងាត់ មិនត្រូវបានមន្ត្រីខាងលើ បញ្ជាក់ឡើង ដោយគ្រាន់តែលើកឡើងថា មូលហេតុនៃការលើកពេលនេះ ទំនងភាគីខាងវៀតណាម ឃើញ​មានការពុះកញ្ជ្រោលខ្លាំង នូវចលនាតវ៉ា របស់ក្រុមនិស្សិត ព្រះសង្ឃ និងពលរដ្ឋកម្ពុជា។

តាមប្រភព ព័ត៌មានច្បាស់ការណ៍មួយ ដែលទស្សនាវដ្តីមនោរម្យ.អាំងហ្វូទទួលបាន បានអះអាងថា កិច្ចប្រជុំ​គណៈកម្មការចម្រុះ ព្រំដែនកម្ពុជា និងវៀតណាមនេះ នៅតែប្រព្រឹត្តិទៅ ក្នុងព្រឹកថ្ងៃទី៦ ខែកក្កដា និងថ្ងៃ​បន្ត​បន្ទាប់ ដោយគ្មានលើកពេលឡើយ។ កិច្ចប្រជុំនៅថ្ងៃបន្តបន្ទាប់នោះ នឹងធ្វើឡើងជាលក្ខណៈផ្លូវការ មាន​រយៈ​ពេល​បួនថ្ងៃ (ចាប់ពីថ្ងៃទី៧ ដល់ថ្ងៃទី៩ ខែកក្កដា) នៅទីស្តីការគណៈរដ្ឋមន្រ្តីតែម្តង (បើសិនបើគ្មាន​ការ​ប្រែ​ប្រួល​នោះ)។

ទស្សនាវដ្តីមនោរម្យ.អាំងហ្វូមិនអាចទាក់ទងលោក ជុំ សន្ទរី អ្នកនាំពាក្យក្រសួងការបរទេសកម្ពុជា និងលោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្រ្តី ពីបញ្ហាខាងលើនេះបានទេ នាពេលនេះ ដោយគ្មានអ្នកទទួល​ទូរស័ព្ទ។ តែបើតាមការអះអាង របស់មន្រ្តីខាងលើ ដែលស្និតនឹងទីស្តីការគណរដ្ឋមន្រ្តី បានបន្តថា ការប្រជុំ​សំងាត់នេះ ខាងភាគីកម្ពុជាដឹកនាំដោយលោក វ៉ា គឹមហុង ប្រធានគណកម្មការកិច្ចការព្រំដែនកម្ពុជា ឯភាគី​វៀតណាម នៅមិនមានព័ត៌មានច្បាស់នៅឡើយ។

មន្ត្រីដដែល បានលើកឡើងទៀតថា៖ «ដើមឡើយ កិច្ចប្រជុំនឹងត្រូវធ្វើឡើង នៅក្រុងសៀមរាប តែត្រូវបាន​ផ្លាស់ប្តូរ មកកាន់ភ្នំពេញវិញ យ៉ាងតក់ក្រហល់ ព្រោះទទួលព័ត៌មានថា និងការការជួបជុំតវ៉ាយ៉ាងខ្លាំងក្លា របស់​ក្រុម​និស្សិត​កម្ពុជា ព្រះសង្ឃ និងប្រជាពលរដ្ឋកម្ពុជា (និង)ក្នុងគោលបំណង (ដើម្បី)ការពារសុវត្ថិភាព នៃ​មន្រ្តី​ការ​ទូត​វៀតណាម​ផង​នោះ។ (…) ឥឡូវឮថា លើកពេលទៀតហើយ មិនដឹងថ្ងៃណាប្រជុំទេ។ តែ​ប្រហែល​ជាមាន​ប្រជុំ​ផង​មិន​ដឹង គេលាក់ការណ៍ ព្រោះខ្លាចមានការតវ៉ា។»៕