សារព័ត៌មានវៀតណាម ផ្សាយពីខ្លឹមសារសំខាន់ៗនៃកិច្ចប្រជុំបិទទ្វា ទាក់ទងនឹងព្រំដែន
- ដោយ: ដារា រិទ្ធ អត្ថបទ៖ ដារា រិទ្ធ ([email protected]) - ភ្នំពេញថ្ងៃទី១០ កក្កដា ២០១៥
- កែប្រែចុងក្រោយ: July 10, 2015
- ប្រធានបទ: ព្រំដែន
- អត្ថបទ: មានបញ្ហា?
- មតិ-យោបល់
-
បើខ្លឹមសារនៃកិច្ចប្រជុំដោយបិទទ្វា ស្ដីពីព្រំដែនកម្ពុជា-វៀតណាម សម្រាប់រយៈពេល៣ថ្ងៃ (៧-៩ កក្ដដា) នៅកម្ពុជា មិនត្រូវបានប្រកាស ជាសាធារណៈ ឬដល់អ្នកសារព័ត៌មានកម្ពុជានោះ តែនៅប្រទេសវៀតណាមវិញ សារព័ត៌មានវៀតណាម បានដកស្រង់យកខ្លឹមសារសំខាន់ៗ ជាច្រើន ដែលសម្រេចចេញពីអង្គប្រជុំនេះ មកផ្សាយពាសពេញប្រទេស។ ទស្សនាវដ្ដីមនោរម្យ.អាំងហ្វូ សូមធ្វើការដកស្រង់ និងបកប្រែខ្លឹមសារទាំងនោះ ក្រៅផ្លូវការ ដូចខាងក្រោម៖
ភាគីទាំងពីរ បានពិនិត្យទីតាំងព្រំប្រទល់ និងបោះបង្គោលខណ្ឌសីមា លើដីគោក រវាងប្រទេសទាំងពីរ រាប់ពីឆ្នាំ២០០៦ មកទល់បច្ចុប្បន្ននេះ បានលទ្ធផលប្រមាណជា ៩២០ គីឡូម៉ែត្រ នៃប្រវែងព្រំដែនសរុប ដែលមានប្រមាណ ១.១៣៧ គីឡូម៉ែត្រ បានធ្វើការបោះបង្គោលបាន ៣០៥ (ស្មើនឹង ៨២,៧% នៃបង្គោលទាំងអស់ ៣៧១បង្គោល) កំណត់ការដៅចំណុចបង្គោល បានចំនួន ១០៤ ក្នុងនោះចំណុចដៅ ៣៩ ស្ថិតក្នុងទឹកដីវៀតណាម និង ៦៥ ស្ថិតក្នុងទឹកដីកម្ពុជា។ ភាគីទាំងពីរ បានសម្រេចការត្រួតពិនិត្យ ទទួលយកឯកសារចំនួន ១៩១ ស្តីពីបង្គោលព្រំដែន។
ចំពោះការអនុវត្ត នូវរាល់សេចក្ដី ដែលមានចែង នៅក្នុង «កិច្ចព្រមព្រៀងយោគយល់គ្នា (MOU)» ស្តីពីដំណោះស្រាយ លើតំបន់សេសសល់មួយចំនួន នៅតាមព្រំដែនដីគោក រវាងរដ្ឋាភិបាលវៀតណាម និងរដ្ឋាភិបាលកម្ពុជា មកទល់ពេលនេះ ភាគីទាំងសងខាងបានប្តូរយោបល់ សម្រេចនូវការប្តូរដីគ្នា ទៅវិញទៅមក តាមក្របខណ្ឌ ១:១ នាបណ្តាខេត្តជាប់ព្រំដែន ដូចជា ខេត្តតៃនិញ-កំពង់ចាម, តៃនិញ-ស្វាយរៀង, ជុងវាប-ព្រៃវែង, អាងយ៉ាង-តាកែវ, គៀងយ៉ាង-តាកែវ និងគៀងយ៉ាង-កំពត ។
បច្ចុប្បន្ន លើខ្សែបន្ទាត់ព្រំដែនគោក វៀតណាម-កម្ពុជា នៅមានកិច្ចការខ្លះ ដែលភាគីទាំងពីរ ពុំទាន់ឯកភាពពីរបៀបដោះស្រាយ ទាក់ទងនឹងការកំណត់ព្រំដែនចំនួន ៧ ក្នុងនោះ ចន្លោះបង្គោលព្រំដែន ៣០-៤ (ខេត្តយ៉ាឡាយ-រតនៈគីរី) ចន្លោះបង្គោល ៤០-៤៤ (ដាក់ឡាក់-មណ្ឌលគីរី) ចន្លោះបង្គោល ៥៦-៦០ (ដាក់ណុង-មណ្ឌលគីរី) ចន្លោះបង្គោល ១៣៨-១៤៧ (តៃនិញ-ស្វាយរៀង) ចន្លោះបង្គោល ២៤១-២៤៥ និង ២៤៧-២៥៣ (អាងយ៉ាង-កណ្តាល) និងកំណត់ព្រំដែនចន្លោះបង្គោល ២៩៥-៣០២ (គៀងយ៉ាង-កំពត) ។
បោះបង្គោលឲ្យលឿន
ភាគីទាំងពីរ បានឯកភាពនឹងបង្កើនល្បឿន និងអាំងតង់ស៊ីតេការងារ របស់ក្រុមការងារពិនិត្យទីតាំងព្រំប្រទល់ បោះបង្គោល និងកិច្ចប្រជុំ រវាងសហប្រធានគណៈកម្មាធិការចម្រុះ បែងចែកព្រំប្រទល់បោះបង្គោល ដោយប្រតិបត្តិយ៉ាងម៉ឺងម៉ាត់ នូវបណ្តាសន្និសញ្ញា កិច្ចព្រមព្រៀងទ្វេភាគី ស្ដីពីព្រំដែន ដែលបានចុះហត្ថលេខារួច ជំរុញការចរចាដើម្បីសម្រេចឲ្យបានឆាប់ នូវការកំណត់ព្រំប្រទល់ ក្នុងឆ្នាំ២០១៥ ដូចដែលថ្នាក់ដឹកនាំជាន់ខ្ពស់នៃប្រទេសទាំងពីរ បានព្រមព្រៀងគ្នា ដើម្បីព្រំដែន វៀតណាម-កម្ពុជា ក្លាយជាព្រំដែនសន្តិភាព មិត្តភាព ស្ថេរភាពយូរអង្វែង ជាផលប្រយោជន៍ របស់ប្រជាជនប្រទេសទាំងពីរ ។
យោងតាមសន្ធិសញ្ញា កិច្ចព្រមព្រៀងអំពីព្រំដែន ដែលប្រទេសទាំងពីរ បានចុះហត្ថលេខា ពិសេសគឺសេចក្តីប្រកាសព័ត៌មានរួម ថ្ងៃទី ១៧ មករា ១៩៩៥ ភាគីទាំងពី បានប្តូរយោបល់គ្នាត្រង់ៗ អំពីហេតុការណ៍ ដែលបានកើតឡើង ទាក់ទងនឹងព្រំដែន ក្នុងអំឡុងពេលកន្លងមក។ ភាគីទាំងពីរ បានឯកភាពបង្កើនកិច្ចសហប្រតិបត្តិការ រវាងបណ្តាខេត្ត និងបណ្តាស្ថាប័នសមត្ថកិច្ច របស់ភាគីទាំងសងខាង ក្នុងការដោះស្រាយនូវរាល់ហេតុកាណ៍ ដែលកើតឡើង។ ភាគីទាំងពីរចាំបាច់ ត្រូវប្តូរយោបល់ភ្លាមៗ ក្នុងករណី ដែលមានហេតុការណ៍ កើតឡើងលើតំបន់ព្រំដែន ធ្វើយ៉ាងណាសហការដោះស្រាយ ពុំឲ្យហេតុកាណ៍រីករាលដាល និងមានឥទិ្ធពល មកលើទំនាក់ទំនងមិត្តភាព ជាអ្នកជិតខាងដ៏ល្អប្រសើរ រវាងប្រទេសទាំងពីរ ហើយរារាំង ដល់បេសកកម្មកំណត់ព្រំប្រទល់ និងបោះបង្គោលខណ្ឌសីមា។
កិច្ចព្រមព្រៀង (...) ឆ្នាំ១៩៨៣ និង ឆ្នាំ១៩៨៥
ភាគីទាំងពីរ បានឯកភាពបង្កើន កិច្ចសហការ រក្សាសណ្តាប់ធ្នាប់ សន្តិសុខព្រំដែន។ ទន្ទឹមនឹងនោះ បង្កើនការឃោសនា អប់រំ ទៅដល់ប្រជាពលរដ្ឋ នៅតំបន់ព្រំដែន ដូចមានចែងក្នុងកិច្ចព្រមព្រៀង អំពីបទកំណត់ព្រំដែន រវាងវៀតណាម និងកម្ពុជា ចុះហត្ថលេខា ថ្ងៃទី២០ ខែកក្កដា ១៩៨៣ - សន្ធិសញ្ញាកំណត់ព្រំដែនជាតិ រវាងវៀតណាម-កម្ពុជា ចុះហត្ថលេខា ថ្ងៃទី២៧ ខែធ្នូ ១៩៨៥ - សន្ធិសញ្ញាបំពេញបន្ថែម លើសន្ធិសញ្ញាកំណត់ព្រំដែនជាតិឆ្នាំ ១៩៨៥ រវាងវៀតណាម និងកម្ពុជា ចុះហត្ថលេខាថ្ងៃទី ១០ ខែតុលា ២០០៥ - កំណត់ហេតុចងចាំ អំពីដំណោះស្រាយ លើតំបន់សេសសល់មួយចំនួន តាមព្រំដែនដីគោក រវាងរដ្ឋាភិបាលវៀតណាម និងកម្ពុជា ចុះថ្ងៃទី១៧ ខែមករា ១៩៩៥។ តាមស្មារតីនៃកិច្ចព្រមព្រៀង សន្ធិសញ្ញា និងកំណត់ហេតុទាំងនោះ «នៅក្នុងអំឡុងពេលរង់ចាំ ដោះស្រាយបញ្ហានៅសេសសល់ អំពីព្រំដែន ភាគីទាំងពីរព្រមព្រៀង ត្រូវរក្សាការគ្រប់គ្រង នៅក្នុងពេលបច្ចុប្បន្ន ពុំផ្លាស់ប្តូរ រំកិលបណ្តាបង្គោលព្រំដែន អប់រំកុំឲ្យពលរដ្ឋដាំដុះ ស្នាក់នៅ និងរួមគ្នាសហការ រក្សាសន្តិសុខ សណ្តាប់ធ្នាប់ព្រំដែន» ។
នៅចុងបញ្ចប់ នៃកិច្ចប្រជុំ ភាគីទាំងពីរបានចុះហត្ថលេខា លើកំណត់ហេតុអង្គប្រជុំខាងលើនេះ ជាពិសេស បានព្រមព្រៀង ថានឹងប្រជុំបន្ត រវាងប្រធានទាំងពីរ ដែលនឹងប្រព្រឹត្តទៅ នៅវៀតណាមនាខែសីហាខាងមុខ៕