សុវត្ថិភាពក្នុងការងារ មិនមែនជារឿងលេងសើចឡើយ ហើយទាំងនយោជក ទាំងបុគ្គលិកកម្មករ គប្បីមាន​វិធានការបង្កា មុននឹងហេតុការណ៍ដ៏អាក្រក់ បានកើតឡើង។ ដូចក្នុងករណីកម្មករ ដែលបានរងគ្រោះថ្នាក់ ពី​ម៉ាស៊ិនកិនអុស រហូតបាត់បង់ជីវិត នៅក្នុងរោងចក្របោកគក់មួយនេះ ជាដើម។ ហេតុការណ៍នេះ បានកើត​ឡើង​នៅវេលាម៉ោង ៧ព្រឹកថ្ងៃទី ១០ ខែកក្កដា ឆ្នាំ ២០១៥ នៅតាមបណ្តោយផ្លូវជាតិលេខ ០៦ ក្នុង​សង្កាត់​ព្រែកលៀប ខណ្ឌជ្រោយចង្វារ រាជធានីភ្នំពេញ។

កម្មកររងគ្រោះ ត្រូវបានគេស្គាល់ឈ្មោះ ជា សារឿន អាយុ៣៥ឆ្នាំ ស្នាក់នៅ ភូមិខ្ទរ សង្កាត់ព្រែកលៀប ខណ្ឌ​ជ្រោយចង្វារ រាជធានីភ្នំពេញ។

មិត្តភក្កិជនរងគ្រោះ បានរៀបរាប់ថា មុនពេលកើតហេតុ គឺមានកម្មករ៥នាក់ នៅផ្នែកឡកិនអុសនេះ។ ចំណែក​ជនរងគ្រោះ ជាអ្នករុញអុសបញ្ចូលឡ ភ្លាមៗពេលកំពុងបញ្ជូលអុស ស្រាប់តែអ្នក០៤នាក់ផ្សេងទៀត ដើរ​ចេញ​ព្រោះក្តៅ នៅសល់តែជនរងគ្រោះម្នាក់ឯង ស្រាប់តែអុសផ្ទុះចេញ ពីឡត្រូវជនរងគ្រោះតែម្តង។

មន្រ្តីសមត្ថកិច្ចមូលដ្ឋាន ដែលបានចុះពិនិត្យ ដល់កន្លែងកើតហេតុ បានបញ្ជាក់ថា ការផ្ទុះនេះបង្ករឡើង ពី​គម្រប​ម៉ាស៊ិនកិនអុស បោកត្រូវក្បាលជនរងគ្រោះ។ គម្របនោះមាន ទំងន់ប្រមាណជា១០០គីឡូក្រាម (ជា​ដែកសុទ្ធ)។ បច្ចុប្បន្នសពជនរងគ្រោះ ត្រូវបានមន្ត្រីជំនាញ ប្រគល់ជូនគ្រួសារ យកទៅធ្វើបុណ្យតាមប្រពៃណី នៅស្រុកកំណើត៕