ទន្ទឹមនឹងការអះអាង ថាបេសកម្មចុះមើល បង្គោលព្រំដែនលេខ២០៣ រវាងប្រទេសកម្ពុជា និងវៀតណាម ជា​ភាពជោគជ័យមួយនោះ តែតំណាងរាស្រ្ត មណ្ឌលស្វាយរៀង មកពីគណបក្សសង្គ្រោះជាតិ នៅតែបាន​អះអាង​ថា ដំណើរឆ្ពោះ ទៅត្រួតពិនិត្យ បង្គោលព្រំដែន បានរងនូវការរារាំង ឬការប៉ុនប៉ងបង្កហិង្សា ពីសំណាក់មនុស្ស របស់អាជ្ញាធរខេត្តទាំងនោះក្តី។

លោក រៀល ខេមរិន្ទ្រ បានថ្លែងអះអាង ដូច្នេះ ទៅកាន់ក្រុមអ្នកសារព័ត៌មាន សកម្មភាពត្រៀមហិង្សា ត្រូវ​បាន​ត្រៀមរៀបចំ រួចជាស្រេច ហើយមនុស្សទាំងនោះ ត្រូវបានរៀបចំឡើង ដោយអាជ្ញាធរ។ លោកថា នេះមិន​មាន​អ្វី គួរឲ្យភ្ញាក់ផ្អើលឡើយ ព្រោះវាជារូបភាពចាស់ ធ្លាប់កើតមាន ហើយអ្នកណាក៏គេបានដឹង និងបានលឺដែរ។ លោកថា អ្វីដែលខុសនោះ នៅត្រង់ថា វាខុសមុខមនុស្ស ទីតាំង និងចំនួនមនុស្សប៉ុណ្ណោះ។

តំណាងរាស្ត្រ មកពីគណបក្សប្រឆាំង បានបន្តថា បើទោះជាមានមនុស្សមួយក្រុមនោះ មករារាំងដំណើរ របស់​ពួកលោក តែលោកនៅតែអាចបន្តរ ដំណើររបស់ខ្លួន បានដោយជោគជ័យជាថ្មី ទៅដល់បង្គោលព្រំដែន លេខ​២០៣ ដែលអ្នកបោះបង្គោលព្រំដែន របស់កម្ពុជាខ្លួនឯង មិនទាំងហ៊ានទៅដល់ផងនោះ។

សូមរំលឹកថា កាលពីប៉ុន្មានថ្ងៃមុន គណកម្មការចម្រុះព្រំដែន បានចុះទៅដើម្បីពិនិត្យ លើបញ្ហា​បង្កោល​ព្រំដែន​នោះ។ តែមកទល់ពេលនេះ នៅមិនទាន់មានរបាយការណ៍ណាមួយ បង្ហាញពីសកម្មភាព ដែលក្រុម​គណៈ​កម្មការ​ទាំងនោះ បានចុះទៅឡើយ។

បើតាមការអះអាងរបស់លោក រៀល ខេមរិន្ទ្រ បានអះអាងថា គណកម្មការចម្រុះព្រំដែននោះ មិនបានទៅ​ដល់​បង្គោលផ្ទាល់ឡើយ ព្រោះតែភាគីវៀតណាមមិនអនុញ្ញាត។ លោកបញ្ជាក់ទៀតថា៖ «មិនបានចុះទៅ​ពិនិត្យ​ទេ។ គេមិនទាំងហានចូលទៅផង។ ខ្លួនឯងជាអ្នកបង្កើតបង្គោល ខ្លួនឯងមិនហានចូល យួនមិនទាំងឲ្យ​ចូល​ផង។ យួនមិនឲ្យចូល មិនហានចូលដែរ។ តែយើងជោគជ័យ ព្រោះយើងបានចូលដល់ទីនោះ។»

តាមសកម្មភាព និងរូបភាព ដែលផ្តិតដោយទស្សនាវដ្តីមនោរម្យ.អាំងហ្វូ កាលពីថ្ងៃអាទិត្យ ទី១៩ ខែកក្កដា ឆ្នាំ​២០១៥នេះ បានបង្ហាញឲ្យឃើញ នូវក្រុមមនុស្សមួយហ្វូងធំ ក្នុងសម្លៀកបំពាក់ស៊ីវិល កាន់ដំបងស្ទើរគ្រប់ដៃ កំពង់ឈររង់ចាំ យ៉ាងសកម្មក្នុងទឹកដីខ្មែរ ក្នុងការរារាំងដំណើរនេះ។ ឯខាងទឹកដីវៀតណាមវិញ ក៏មាន​ប្រជា​ពលរដ្ឋ​របស់គេ ប្រដាប់ដោយដំបង កាំបិត ជាមួយនឹងក្រុមទាហាន ប្រដាប់ដោយអាវុធគ្រប់ដៃ បានឈរត្រៀម​ជាស្រេច ក្នុងទឹកដីរបស់គេ ត្រង់ចំណុចបង្គោលព្រំដែន លេខ២០២ និងលេខ២០៣។

ក្រុមព្រះសង្ឃ យុវជន និងតំណាងរាស្រ្ត ប្រមាណជា១០០នាក់ ពីក្នុងចំណោមពលរដ្ឋប្រមាណជា ២០០០នាក់ ត្រូវបានអនុញ្ញាត ឲ្យចូលទៅដល់ បង្គោលព្រំដែនលេខ២០៣ ក្នុងស្រុកកំពង់រោទិ៍ ខេត្តស្វាយរៀង តែមិនបាន​បន្ត ទៅមើលបង្គោលព្រំដែន លេខ២០២ ទៀតទេ។ លោក ខេមរិន្ទ្រ បានថ្លែងទៀតថា បង្គោលលេខ ២០៣​នេះ បានបោះរំលោភចូលក្នុងទឹកដីខ្មែរ យ៉ាងពិតប្រាកដ។

ទាក់ទងនឹងការចោទប្រកាន់ខាងលើនេះ ទស្សនាវដ្តីមនោរម្យ.អាំងហ្វូ នៅមិនទាន់​អាចសុំការ​បញ្ជាក់ណា​មួយ​ពីលោក ជៀង អំ ងភិបាលខេត្តស្វាយរៀងបានឡើយ។ តែយោងតាមលិខិតរបស់លោក ចុះថ្ងៃទី១៩ ខែកក្កដា ឆ្នាំ២០១៥ ដែល​បានសរសេរ មកកាន់រដ្ឋមន្រ្តីក្រសួងមហាផ្ទៃ លោក ស ខេង បានបញ្ជាក់ថា ក្រោមកិច្ច​សម្រប​សម្រួល និងការពារសន្តិសុខ សណ្តាប់ធ្នាប់របស់លោក ពុំមានហិង្សាណាមួយកើតឡើងឡើយ៕