ក្នុងពេលភ្លាមៗ អ្នករបួសមិនទាន់មានអ្វី ធ្ងន់ធ្ងរនៅឡើយ តែអាការៈចុកក្នុងទ្រូង ដោយសារការប៉ះទង្គិចគ្នានេះ នៅមានបន្ត។ បុរសជាស្វាមី ដែលរងគ្រោះក្នុងហេតុការណ៍ ដែលមានឈ្មោះ កង រ៉ៃ អាយុ៣០ឆ្នាំ រស់នៅឃុំ​ដំរី​ស្លាប់ ស្រុកកំពង់ស្វាយ ខេត្តកំពង់ឆ្នាំង បានឲ្យដឹងថា លោកធ្វើការ នៅរោងចក្រ ហ្វឹងហ្វា ជាមួយប្រពន្ធ ហើយ​កំពុងធ្វើដំណើរទៅធ្វើការ។ លោកបានរៀបរាប់ ពីហេតុការណ៍នេះថា ដំបូងលោកជិះម៉ូតូ ទៅ​តាម​បណ្តោយ​ផ្លូវ ក្នុងភូមិជើងឯក សង្កាត់ដង្កោរ ខណ្ឌដង្កោរ រាជធានីភ្នំពេញ ក្នុងទិសដៅពីជើងទៅត្បូង មកដល់កន្លែង​កើត​ហេតុ ស្រាប់តែរថយន្ដស៊ីនទ្រី ស្លាកសំគាល់ ៣០៦ បើកចេញពីផ្លូវតូច ជ្រុលមកបុកម៉ូតូលោក ពេញទំហឹង​រហូត​ធ្លាក់ទឹក។

ភរិយាជនរងគ្រោះ អ្នកស្រី យឿន រ៉េត អាយុ២៣ឆ្នាំ មានស្រុកកំណើត នៅភូមិញញឹម ស្រុកអង់កែវ ខេត្ត​ត្បួង​ឃ្មុំ បានប្រាប់ឲ្យដឹងថា ប្តីអ្នកស្រីកំពុងសម្រាកព្យាបាល នៅមន្ទីពេទ្យបង្អែកដង្កោរ ដោយអាការៈគាត់​ធ្ងន់ធ្ងរ​ជាង​អ្នកស្រី។ នៅពេលនេះ គ្រូពេទ្យនៅកំពុងតាមដាន អាការៈអ្នករងគ្រោះនៅឡើយ។ ដោយអ្នកបើកបរ រថយន្ដ​របស់​ក្រុមហ៊ុន​ស៊ីនទ្រី ដែលបានបង្កឲ្យកើតជារឿងនេះ មិនមានរងការប៉ះពាល់ ឬរបួសអ្វីនោះទេ។

បច្ចុប្បន្នម៉ូតូ និងរថយន្ដ ត្រូវបានមន្រ្តីប៉ុស្តិ៍ បញ្ជូនទៅកាន់ខណ្ឌដង្កោរ ទុកធ្វើការដោះស្រាយ ជាមួយ​ភាគីទាំង​សងខាង។ រហូតមកទល់ពេលនេះ គេនៅមិនទាន់ដឹងថា អ្នករបួសមានគ្រាំគ្រឿងក្នុងធ្ងន់ធ្ងរ ឬយ៉ាងណា​នោះ​ទេ ដោយអ្នកធ្វើការ នៅមន្ទីពេទ្យបង្អែកខាងលើ មិនអនុញ្ញាតឲ្យចូលជួប លោកវេជ្ជបណ្ឌិត ឈឺម ជីវី ទេដោយ​ប្រាប់ថា ចាំសួរតាមទូរស័ព្ទ ប៉ុន្តែនៅតែមិនអាចសុំការបភ្លឺបាន ដោយទូរស័ព្ទរបស់លោក មិនអាចទាក់ទង​បាន៕