ករណីបង្កការភ្ញាក់ផ្អើលនេះ បានកើតឡើង កាលពីវេលាម៉ោង ៦ ព្រឹក ថ្ងៃទី ០៤ ខែ សីហា ឆ្នាំ២០១៥ នៅក្នុង​ដីឡូតិ៍មួយកន្លែង ក្នុងភូមិប៉ាយ៉ាប សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ដែលជារោង សម្រាប់​កម្មកររបស់បូរី«ពីភពថ្មី»ស្នាក់នៅ។ តាមការបញ្ជាក់ ពីអ្នកនៅក្នុងហេតុការណ៍នេះ បានឲ្យដឹងថា សម្ភារៈ​និង​របស់របរមួយចំនួនធំ ត្រូវបានខូចខាត តែមនុស្សបានរត់ចេញបានភ្លាមៗ ដោយមានរបួស តែពីរនាក់​ប៉ុណ្ណោះ។ អ្នកទាំងពីរ ត្រូវគេស្គាល់ថា ជាឪពុកនិងកូន ឪពុកឈ្មោះ ស្រ៊ុន ចំណែកកូនមិនស្គាល់ឈ្មោះ ជាអ្នកធ្វើការ​នៅ​បូរី​ខាងលើ ជាមួយគ្នា។

សាក្សីនៅកន្លែងកើតហេតុ បានប្រាប់ទស្សនាវដ្តីមនោរម្យ.អាំងហ្វូថា ភ្លើងបានចាប់ផ្តើមឆេះចេញ ជារូបរាង នៅ​ម៉ោង៦ព្រឹក រហូតដល់ម៉ោង ៧ និង៣០ នាទី ទើបពន្លត់បានជោគជ័យ ក្នុងនោះប្រើប្រាស់អស់ឡានទឹក ចំនួន​១២​គ្រឿង។ សាក្សីបន្ថែមទៀតថា ការខូចខាតសរុបរួមមាន៖ ម៉ូតូប្រាំគ្រឿង កង់ ១២គ្រឿង រួមទាំងការខូច​សម្ភារៈ មួយចំនួនធំ និងមានអ្នករបួសពីរនាក់ខាងលើ។

ម្ចាស់សម្ភារៈខូចខាតម្នាក់ យុវជន សម្រេច បានប្រាប់ទស្សនាវដ្តីថា ម៉ូតូរបស់ខ្លួន ម៉ាក ឌ្រីម សេរី២០១៣ ស្លាក​លេខ ព្រៃវែង ១I-៧៨១៩ រងការខូចខាតគ្មានសល់។ ម្ចាស់ម៉ូតូបានឆ្លងឆ្លើយ ទាំងភាពសោកស្តាយថា ភ្លើង​បាន​ឆាបឆេះភ្លាមៗ យ៉ាងសន្ធោសន្ធៅ មានលក្ខណៈទាបចុះមកដី ធ្វើឲ្យអ្នកស្នាក់នៅ ភ័យស្លន់រត់ចេញស្ទើរ​មិន​ទាន់ របស់របរគ្មាននៅសល់ទេ គឺភ្លើងលេបត្របាក់ស្ទើទាំងស្រុង។ កម្មករផ្នែកលាបថ្នាំ វ័យ១៩ឆ្នាំរូបនេះ បាន​បញ្ជាក់​ទៀត​ថា គេនៅមិនទាន់ដឹងថា នរណារជាអ្នកផ្តល់ សំណងខូចខាតនោះទេ នៅពេលភ្លាមៗនេះ ដោយគិតថា​វា​ជា​ឧបទ្ទវហេតុ។

អ្នកនៅក្នុងហេតុការណ៍ ដែលបានរត់ចេញមក ដោយគ្មានរបួសម្នាក់ទៀត លោក សុខ ឃៀង បានរៀបរាប់ថា គ្មាន​នរណាម្នាក់ យកសម្ភារៈចេញមកក្រៅ បាននោះទេ ម្នាក់ៗព្យាយាមរត់ ឲ្យតែរួចជីវិត។ លោក​លើកឡើង​ថា៖ «រត់ចេញមក បានតែខ្លូនមួយ គ្មានយកបានអីទេ»។ អ្នករងគ្រោះរូបនេះ បានបន្ថែមទៀតថា ករណីភ្លើង​ឆេះ​សន្ធោសន្ធៅ បង្កការភ្ញាក់ផ្អើលនៅព្រឹកនេះ បណ្តាលមកពីបញ្ហា ទូស្សេខ្សែរភ្លើង នៅក្នុងរោង (កន្លែង) ស្នាក់​នៅ​របស់កម្មករ តែហេតុការណ៍នេះ មិនមានកម្មករណាម្នាក់ រងគ្រោះដល់អាយុជីវិតនោះទេ៕