បើទោះជាមានការលើកឡើង ពីភាពមិនប្រក្រតី រវាងការចេញលទ្ធផលបឋម របស់គណៈ​កម្មាធិការជាតិ​រៀបចំ​ការ​បោះឆ្នោត (គ.ជ.ប) និងទម្រង់១១០៥ក៏ដោយ ក៏គណបក្ស​សង្គ្រោះជាតិ ពិតជាបានឈ្នះឆ្នោត នៅក្នុង​ឃុំ​ស្វាយពោធ៍ ខេត្តកំពង់ចាម សម្រាប់ការបោះឆ្នោត ជ្រើសរើសក្រុមប្រឹក្សា ឃុំសង្កាត់ អាណត្តិទី៤នេះ។

កាលពីព្រឹកថ្ងៃសុក្រនេះ ក្រុមអ្នកប្រើប្រាស់បណ្ដាញសង្គម បានលើកឡើងថា គេហទំព័រ VoterList.org.kh របស់គ.ជ.ប បានប្រកាស​លទ្ធផល​បឋម«ខុស» ក្នុងឃុំស្វាយពោធិ ខេត្តកំពង់ចាម ដោយផ្ដល់ជ័យជំនះ ទៅ​ឲ្យ​គណបក្សសម្បុកឃ្មុំសង្គម​ប្រជាធិបតេយ្យ ជាមួយនឹងសម្លេងឆ្នោត ២០៩៥សម្លេង ពីលើ​គណបក្ស​សង្គ្រោះ​ជាតិ ដែលមាន ១៤៣៥សម្លេង និងឈ្នះដាច់ឆ្ងាយ ពីលើគណបក្សប្រជាជនកម្ពុជា ដែលសរសេរ​នៅក្នុង​គេហទំព័រ ទទួល​បាន​តែ ៧២សម្លេងប៉ុណ្ណោះ។

ការលើកឡើងខាងលើ របស់ក្រុមអ្នកប្រើប្រាស់បណ្ដាញសង្គម ក៏បានភ្ជាប់មកជាមួយដែរ នូវឯកសារ​ទម្រង់​១១០៥ ដែលបានបង្ហាញពីទិន្នន័យថា គណបក្សសង្គ្រោះជាតិ​ទទួលបាន ២០៩៥សម្លេង ពីលើ​គណបក្ស​​ប្រជាជន​កម្ពុជា ដែលទទួលបាន ១៤៣៥សម្លេង ខណៈគណបក្សសម្បុកឃ្មុំ​សង្គម​ប្រជាធិបតេយ្យ​វិញ នៅ​លេខ​រៀង​លេខ៤ ទទួលបានតែ ៩២សម្លេង ប៉ុណ្ណោះ (លេខ​រៀង​ទី៣ គឺគណបក្សហ្វុនស៊ិនប៉ិច ទទួលបាន ៩៩​សម្លេង)។

ប៉ុន្តែនៅរសៀលថ្ងៃសុក្រនេះ គេហទំព័រ VoterList.org.kh ដែលទស្សនាវដ្ដីមនោរម្យ.អាំងហ្វូ ចូលទៅ​ពិគ្រោះ​ បាន​បង្ហាញ​ឲ្យ​ឃើញ​ពីតួលេខ ដូចមាននៅក្នុង​ឯកសារ​ទម្រង់ ១១០៥ ខាងលើ។ យ៉ាងណា អ្នកនាំ​ពាក្យ គ.ជ.ប លោក ហង្ស ពុទ្ធា បានថ្លែងទៅកាន់​សារព័ត៌មានក្នុងស្រុកមួយ ឲ្យដឹងថា ក្រុមការងារ​របស់គ.ជ.ឞ កំពុង​​ពិនិត្យ​​និង​​ផ្ទៀងផ្ទាត់​​ទិន្នន័យ​​ឡើងវិញ សម្រាប់​ឃុំ​សង្កាត់ ដែលមាន​ភាពមិនប្រក្រតី។ លោក​ថា គ.ជ.ប នឹង​​ស្រាវជ្រាវ ​ដោះ​ស្រាយ​​បញ្ហា​​មិន​​ប្រក្រតី​​ទាំង​អស់​នេះ ទោះបីជា​ប្រភព ឬ​កង្វល់​នោះ ចេញពី​បណ្ដាញ​សង្គម​ក៏ដោយ។

» ទម្រង់ ១១០៥ នៅក្នុងឃុំស្វាយពោធិ ខេត្តកំពង់ចាម៖