ទិដ្ឋភាព នៅក្នុងវីដេអូ (ដាក់ជូនជាព័ត៌មានខាងក្រោម តែវីដេអូនេះអាចប៉ះពាល់អារម្មណ៍) ដែលថតដោយកាម៉េរ៉ាសុវត្តិភាព នៅនឹងផ្លូវខ្វែង បានបង្កភាព​រន្ធត់​ណាស់! រឿងរ៉ាវ​បានកើតឡើង នៅក្នុងទីក្រុង «Zhumadian» ភាគខាងកើតប្រទេសចិន តាំងពីថ្ងៃទី២១ ខែមេសាកន្លងទៅ តែវីដេអូនៃព្រឹត្តិការណ៍ខាងលើ ទើប​នឹង​ត្រូវ​បាន​​យក​មក​បង្ហោះ នៅតាមបណ្ដាញសង្គមចិន «Webo» កាលពីពេលថ្មីៗនេះ ហើយបានបង្កើត ឲ្យមាន​ការខឹងសម្បារជាទូទៅមួយ ពីសំណាក់ប្រជាជនចិន។

ស្ត្រីម្នាក់បានឆ្លងថ្នល់ នៅលើគំនូសសសម្រាប់អ្នកថ្មើរជើង និងបានឈប់រេរាបន្តិច ដើម្បីរង់ចាំឲ្យរថយន្ដ​ជា​ច្រើន​(នៅខាងមុខនាង)​ទៅផុត។ ប៉ុន្តែរំពេចនោះ ស្ត្រីរូបនេះ​ត្រូវបានរថយន្ដតាស៊ី​មួយគ្រឿង បើកបរក្នុងទិសខាង​ក្រោម​ខ្នង​នាង បុកឲ្យដួលដេកនៅលើដី។ ក្នុងរយៈពេលនេះ ស្ត្រីរងគ្រោះទំនង​ជានៅដឹង​ខ្លួន​នៅឡើយ ប៉ុន្តែ​មិន​អាច​​ងើប​ឡើងវិញបាន (ក្នុងវីដេអូ គេឃើញនាង​បាន​សាកល្បងងើបឡើង​ពីដី)។

ប៉ុន្តែអ្វីដែលគួរឲ្យហួសចិត្តបំផុតនោះ គឺមនុស្សនៅជុំវិញ ទាំងអ្នកបើកបរ ទាំងអ្នកដំណើរថ្មើរជើងទាំងឡាយ បាន​ឆ្លងកាត់ទីនោះ ហាក់បីដូចជាគ្មានរឿង​អ្វីកើត​ឡើង​ដូច្នេះ។ គ្មាននរណាម្នាក់ បានចូលទៅជួយយក​អាសារ​ស្ត្រី ដែលកំពុងដេកដួលនៅកណ្ដាលថ្នល់ ម្នាក់នេះទេ។ រហូតជាងមួយ​នាទីក្រោយមក រថយន្ដមួយគ្រៀង​ទៀត ដែលបើកបរ​ដោយស្ត្រីម្នាក់ បានបើក​កិន​បន្ថែម ពីលើស្ត្រីរងគ្រោះ ធ្វើឲ្យខ្លួននាងវិលត្រឡប់​ជាច្រើនជុំ។

គ្រោះថ្នាក់លើកទីមួយ ស្ត្រីអភ័ពអាចមានសង្ឃឹមនៅរស់ ប៉ុន្តែនាងគ្មានសំណាង បានរួចរស់ជីវិតឡើយ បន្ទាប់ពី​រថយន្ដ​ទីពីរ បានបើកកិនពីលើនាងបង្ហើយ ពេញទាំងដងខ្លួន ទាំងកង់មុន​និងកងក្រោយដូច្នេះ។

ចំណោទសង្គមបានផ្ទុះឡើង...

ការមិនយកអាសារ មានលក្ខណៈជាទូទៅ... និងកំពុងក្លាយជាវប្បធម៌? ហេតុអ្វី? ពេលបើកបរមកដល់ផ្លូវខ្វែង ដែលសម្បូរដោយមនុស្ស តែអ្នកកាន់ចង្កូត​យានយន្ដ បែរ​ជា​មិនខ្វល់ខ្វាយ ក្នុងការបង្កើនការប្រុងប្រយ័ត្ន និង​ចាត់​ទុក​ជីវិតមនុស្ស មិនស្មើរនឹងសំឡី? ទាំងនេះ សុទ្ធសឹងជាការចោទសួរឡើង ពីសំណាក់បណ្ដាជនចិន ជា​ពិសេស​​ពី​សំណាក់​​អ្នកប្រើប្រាស់បណ្ដាញសង្គម «Weibo»។

» កំណត់សម្គាល់៖ រូបភាពវីដេអូខាងក្រោម អាចប៉ះពាល់អារម្មណ៍ សម្រាប់ប្រិយមិត្តខ្លះ!

តែការជជែកវែកញែក រហូតដល់ផ្ទុះសង្គ្រាមសំដី ទាក់ទងនឹងប្រធានបទខាងលើ មិនមែនទើបតែកើតមាន នៅ​ថ្ងៃ​នេះទេ ហើយហេតុការណ៍ប្រហាក់ប្រហែលគ្នា ក៏មិនមែនទើប​តែកើតមាន តែម្ដងនោះដែរ។

កាលពីខែតុលា ក្នុងឆ្នាំ២០១១កន្លងទៅ កុមារី «Wang Yue» ដែលមានអាយុទើបតែ២ឆ្នាំ ត្រូវបាន​រថយន្ដ​ដឹក​ទំនិញ​មួយ​បុកឲ្យដួល មុននឹងត្រូវរថយន្ដមួយផ្សេងទៀត កិនឲ្យ​ដាច់​ខ្លួនត្រឹម​ពាក់កណ្ដាល។ នៅក្នុងរយៈ​ពេល​នេះ ទាំងអ្នក​បើកបររថយន្ដ ទាំងអ្នកជិះម៉ូតូ ទាំងអ្នកដំណើរថ្មើរជើង គ្មាននរណាម្នាក់ ចូលមកយកអាសារ​នាង​តូច​នេះឡើយ ខណៈនាង​កំពុងរង​ភាព​វេទនាខ្លោចផ្សារ នៅក្នុងថ្លុកឈាម។ កុមារី «Wang Yue» បានផុត​ដង្ហើម នៅពេលរូបនាង​ត្រូវបានដឹក​ទៅដល់មន្ទីរ​ពេទ្យ។

ក្នុងឆ្នាំទៅម៉ិញ យុវតីម្នាក់ផ្សេង ត្រូវបានរំលោភបំពានលើរាងកាយ នៅក្នុងសណ្ឋាគារមួយកន្លែង។ ហើយ​មិនខុសពីហេតុការណ៍មុនៗទេ គ្មានបុគ្គលិក​របស់​សណ្ឋាគារ​ណាម្នាក់ ឬអតិថិជន​ដែលមានវត្តមាន នៅ​ក្បែរ​នោះ​រូបណាមួយ បានរង្គើខ្លួន ដើម្បីជួយយកអាសារនាងឡើយ។ រហូតដល់ហេតុការណ៍នេះ ត្រូវបាន​នារីរង​គ្រោះ យករូបភាពមកបង្ហោះដោយខ្លួនឯង នៅលើបណ្ដាញសង្គម​ក្នុងពេលក្រោយមក ទើបបណ្ដាជនចិនខ្លះ បាន​ចោទ​សួរជា​សំនួរ​ឡើង...។ តែការចោទសួរនោះ វាមិនគ្រប់គ្រាន់ទេ បើនិយាយ​ធៀបមកករណី​ស្ត្រីរងគ្រោះ ដែលត្រូវបាន​រថយន្ដ​កិន​​សម្លាប់​ពីរដង (ករណីខាងលើ)។ 

លោកសាស្ត្រាចារ្យ «Zhang Ming» មកពីសកលវិទ្យាល័យប្រជាជន ដ៏ធំមួយ ធ្លាប់បានថ្លែងឡើង ទាក់ទង​នឹង​ហេតុការណ៍​ទាំង​នេះថា៖ «នៅកន្លែងខ្លះក្នុងស្រុកយើង (ប្រទេសចិន) ជីវិត​មនុស្ស​មាន​តម្លៃ មិនស្មើនឹង​ជីវិត​សត្វ​ផង»៕