រកឃើញពន្លឺចម្លែកនៅភពព្រះអង្គារ៖ ជាពន្លឺរបស់មនុស្សពិភពក្រៅ?
ទីភ្នាក់ងារស្រាវជ្រាវអាវកាសរបស់អាមេរិក ហៅកាត់ថា ណាស្សា (Nasa) បានបង្ហាញនូវសេចក្ដីអត្ថាធិប្បាយមួយ ស្ដីពីពន្លឺដ៏ចម្លែកត្រូវបានថតឃើញដោយ មនុស្សយន្ដ កួរីយ៉ូសស៊ីធី (Curiosity) តាំងពីដើមខែនេះមក។ សម្រាប់ទីភ្នាក់ងារអាវកាស ពន្លឺនោះវាគ្រាន់តែជាចំណាំងផ្លាត របស់ពន្លឺព្រះអាទិត្យ នៅលើផ្ទាំងថ្ម ឬក៏ជាកាំរស្មីតារាសាស្ត្រ ដែលប្រតិកម្មតបមកម៉ាស៊ីថតរូបវិញប៉ុណ្ណោះ។
រូបភាពដែលថតដោយមនុស្សយន្ដ កួរីយ៉ូសស៊ីធី បង្ហាញពីចំណុចពណ៌ សរ។ (រូបភាព Nasa)
វិទ្យាសាស្ត្រ - បន្ទាប់ពីរូបថតត្រូវបានយកមកផ្សព្វផ្សាយ ចំណុចនៅក្នុងរូបថត ដែលចេញជាពន្លឺនៅលើភពព្រះអង្គារនេះ បានបង្កការភ្ញាក់ផ្អើល ដោយគេនាំគ្នាគិតថា ផែនដីមិនមែនជាភពតែមួយឡើយ ដែលគេអាចរស់នៅបាន។ រូបភាពដែលថតដោយមនុស្សយន្ដ កួរីយ៉ូសស៊ីធី ត្រូវបានផ្សាយចេញនៅដើមខែមេសា បន្ទាប់ពីមនុស្សយន្ដនេះ ត្រូវបានដាក់ឲ្យដើរស្រាវជ្រាវ នៅលើភពព្រះអង្គារកាលពីខែសីហា ឆ្នាំ២០១២កន្លងមក។ នៅក្នុងរូបថត គេឃើញមានស្នាមពណ៌សរមួយ បានផុសចេញមក ពីចំណោមស្បៃធម្មជាតិពណ៌ខ្មៅ និងប្រផេះ។ អ្នកដែលបានឃើញរូបនេះបានគិតថា នោះវាគ្រប់គ្រាន់ហើយនឹងអាចបញ្ជាក់បាន ពីវត្តមាននៃមនុស្សពិភពខាងក្រៅ។
ដោយហេតុនេះហើយ ទើបទីភ្នាក់ងាវិទ្យាសាស្ត្រជំនាញខាងអាវកាស របស់អាមេរិកមួយនេះ មិនអាចនៅស្ងៀមបាន ដោយបានចេញនូវសេចក្ដីប្រកាសព័ត៌មានប្រតិកម្មមួយ បញ្ជាក់ថា «ចំណុចដែលគួរឲ្យសង្ស័យនោះ វាជាចំណាំងផ្លាតនៃពន្លឺព្រះអាទិត្យ នៅលើផ្ទាំងថ្ម ឬក៏ជាកាំរស្មីតារាសាស្ត្រ ដែលប្រតិកម្មតបមកម៉ាស៊ីថតរូបវិញប៉ុណ្ណោះ»។
អ្នកវិទ្យាសាស្ត្ររបស់ទីភ្នាក់ងារ ណាស្សា បានពន្យល់តបនឹងពាក្យចចាមអារាមដ៏ផ្ដេសផ្ដាសខាងលើថា «នៅកណ្ដាលរូបភាពជាច្រើន ដែលថតដោយមនុស្សយន្ដ កួរីយ៉ូសស៊ីធី យើងតែងតែឃើញមានចំនុចពណ៌សរ សឹងតែរៀងរាល់សប្ដាហ៍»។ ប៉ុន្តែការពន្យល់នេះ ទីភ្នាក់ងារ ណាស្សា នៅតែនិយាយដែរថា នេះជាការពន្យល់បញ្ជាក់ ដែលត្រឹមត្រូវជាងគេ ទាក់ទងនឹងចំណុចពណ៌ សរ នោះ។ ជាអ្វីដែលគេអាចយល់បានថា ករណីវត្តមានរបស់មនុស្សពិភពខាងក្រៅ នៅតែជាការសង្ស័យមួយនៅឡើយ។
សម្រាប់បណ្ដាជន ដែលនៅតែជឿជាក់ពីវត្តមានរបស់មនុស្សពិភពខាងក្រៅនោះ មិនបានយកចិត្តទុកដាក់ នឹងការពន្យល់របស់ទីភ្នាក់ងាវិទ្យាសាស្ត្រនោះឡើយ។ ប៉ុន្តែគេនឹងចាំមើលជាបន្តទៅទៀត នូវអ្វីដែលមនុស្សយន្ដ កួរីយ៉ូសស៊ីធី អាចនឹងរកឃើញជាបន្តទៅទៀត ហើយការពិតប្រហែលជាអាចពន្យល់ចេញ ទៅជារឿងផ្សេងផងក៏មិនដឹង៕
--------------------------------------------------
ដោយ ឈូករ័ត្ន (ទំនាក់ទំនង៖ [email protected]) - ប៉ារីស ថ្ងៃទី១០ ខែមេសា ឆ្នាំ២០១៤