លោកនាយករដ្ឋមន្រ្តីហ៊ុន សែន បានអះអាងថាគណបក្សប្រជាជនកម្ពុជា និងគណបក្សសង្រ្គោះជាតិ បានឯកភាពគ្នា លើចំណុចគន្លឹះច្រើនហើយ ក្រោយការសន្ទនាផ្ទាល់រវាងលោក និងលោកសម រង្ស៊ី តែនៅមានបញ្ហាមួយចំនួន នៅ​បន្តខ្វែងគំនិតគ្នានៅឡើយ ហើយបញ្ហាទាំងនោះអាចបន្តជាប់គាំង ប្រសិនបើលោកកឹម សុខា បង្ហាញឥរិយាបថ​រឹង​ទទឹង។ ជាការលើកឡើង ដែលធ្វើឲ្យយល់ថា លោកនាយករដ្ឋមន្ត្រីកំពុងអនុវត្តន៍ យុទ្ធវិធីបំបែកបំបាក់ រវាងមេដឹកនាំ​ប្រឆាំងទាំងពីររូប។

លោក ហ៊ុន សែន នៅពេលលោកនៅជកបារីនៅឡើយ។ (រូបថត ឯកសារ)

នយោបាយ - លោកហ៊ុន សែន បានលើកឡើងថា លោកបានស្នើទៅលោកសម រង្ស៊ី ប្រធានគណបក្សសង្រ្គោះជាតិ ជំរុញឲ្យលោកកឹម សុខា អនុប្រធានគណបក្សសង្រ្គោះជាតិ គម្បីកុំមានការរឹងរួសខ្លាំងពេកក្នុងការចរចា ខណៈលោក​សម រង្ស៊ី ជាប្រធានគណបក្ស ឬថ្នាក់ដឹកនាំ ហេតុអ្វីមិនអាចសម្រេចបាន ហើយចាំបាច់សុំការសម្រេចពីថ្នាក់ក្រោម?

ក្នុងពិធីចែកសញ្ញាបត្រដល់និស្សិត នៅវិទ្យាស្ថានអប់រំថ្ងៃទី១០ មេសា នេះ លោកនាយករដ្ឋមន្រ្តីហ៊ុន សែន បាន​អះអាង​ថាក្រោយការចរចារតាមទូរស័ព្ទរវាងរូបលោក និងលោកសម រង្ស៊ី គណបក្សប្រជាជនកម្ពុជា និងគណបក្ស​សង្រ្គោះជាតិ បានឯកភាពគ្នាលើការកែទម្រង់ប្រព័ន្ធផ្សព្វផ្សាយ និងការកែទម្រង់ការបោះឆ្នោត។ តែចំណុចសំខាន់​គឺការកំណត់ពេលបោះឆ្នោតឡើងវិញ នៅជាបញ្ហានៅឡើយ ដោយមិនទាន់មានការបរិច្ឆេតច្បាស់លាស់នៅ​ឡើយ។

ទន្ទឹមនឹងនេះលោកនាយករដ្ឋមន្រ្តីហ៊ុន សែន ក៏បានសម្តែងការព្រួយបារម្ភថា ប្រសិនបើការចរចារវាងគណបក្ស​ប្រជាជនកម្ពុជា និងគណបក្សសង្រ្គោះជាតិ ដើរដល់ភាពទាល់ច្រកជាថ្មី នោះមិនមែនជាកំហុសរបស់លោកសម រង្ស៊ី និងលោកនោះទេ តែអាចជាកំហុសរបស់លោកកឹម សុខា អនុប្រធានគណបក្សសង្រ្គោះជាតិ ដែលបង្ហាញ​អាកប្បកិរិយា​រឹងទទឹង។

ភ្លាមៗនេះ គេនៅមិនទាន់ឃើញប្រតិកម្មត្រូវបានធ្វើ ពីសំណាក់គណបក្សសង្គ្រោះជាតិ ដើម្បីឆ្លើយតបនឹងការ​លើក​ឡើង​របស់លោក ហ៊ុន សែន នោះនៅឡើយ។

តែក្នុងកិច្ចសន្ទនាជាមួយទស្សនាវដ្តីមនោរម្យ.អាំងហ្វូ ក្នុងលក្ខខណ្ឌមិនបញ្ចេញឈ្មោះ មន្រ្តីមួយរូបរបស់គណបក្ស​សង្រ្គោះជាតិបានថ្លែងថា គណបក្សសង្រ្គោះជាតិមិនមែនជាក្រុមហ៊ុនឯកជននោះទេ តែជាគណបក្ស​ប្រជាធិបតេយ្យ​មានតម្លាភាព តាមរយៈការពិគ្រោះយោបល់គ្នា ហើយគណបក្សនេះ ក៏មិនមែនជាកេរដំណែលរបស់លោក កឹម សុខា និងលោក សម រង្ស៊ី ដែរ។

មន្រ្តីដដែលនោះបន្ថែមថា ដូច្នេះរាល់ការសម្រេចិត្តរបស់គណបក្ស គឺត្រូវឈរលើគោលការណ៍«កុងសង់ស៊ីស» គឺ​ការឯភាពគ្នា រវាងថ្នាក់ដឹកនាំកំពូលៗរបស់គណបក្ស ដែលមានសិទ្ធិធ្វើសេចក្តីសម្រេចចិត្តផ្នែកនយោបាយ។ មន្រ្តី​រូបនេះបញ្ជាក់ថា៖ «វាទៅទាំងបាច់ ទាំងចង្កោម ក៏ត្រូវមកសួរគណៈអចិន្រ្តៃយ៍ដែរ ទាំងកម្លាំងផ្ទៃក្នុង និងមហាជន បើ​គេមិនជួយ ក៏គណបក្សហ្នឹង លោក សម រង្ស៊ី និងលោក កឹម សុខា ធ្វើតែឯងមិនបានដែរ៕»

-------------------------------------
ដោយ អ៊ុំ បូរី (ទំនាក់ទំនង៖ [email protected]) - ភ្នំពេញ ថ្ងៃទី១០ មេសា ២០១៤