រហូតមកដល់ពេលនេះ បេក្ខជនជាប់ឆ្នោតតំណាងរាស្រ្តទាំង៥៥រូប របស់គណបក្សសង្រ្គោះជាតិនៅមិនទាន់​សម្រេច​ថាទម្លាក់ចោលការធ្វើពហិការ ហើយត្រូវជំនួសដោយការស្បថចូល ទៅបំពេញការងារនៅមន្ទីររដ្ឋសភានៅឡើយ ដោយពួកគេអះអាងថាកំពុងពិចារណា។

រដ្ឋសភានិងអ្នកតំណាងរាស្ត្រពីគណបក្សប្រជាជនកម្ពុជា ថ្ងៃទី២៣ខែកញ្ញា មុនអាគាររដ្ឋសភា។ (រូបថត MONOROOM.info/ O.vary)

នយោបាយ - ប្រធានក្រុមការងារបច្ចេកទេស ខាងគណបក្សសង្រ្គោះជាតិ លោក សុន ឆ័យ បានថ្លែងថា គណបក្ស​ប្រជាជនកម្ពុជា និងគណបក្សសង្រ្គោះជាតិ ត្រូវធ្វើការជាមួយគ្នាច្រើនទៀត ពិសេសលើការកែទម្រង់ការបោះឆ្នោត មុនគណបក្សសង្រ្គោះជាតិ បោះបង់ការធ្វើពហិការ។

លោកសុន ឆ័យ បានបញ្ជាក់ប្រាប់ទស្សនាវដ្តីមនោរម្យ.អាំងហ្វូ នៅថ្ងៃទី១០ ខែមិថុនា ឆ្នាំ២០១៤ ពីគោលជំហររបស់​គណបក្សសង្រ្គោះជាតិ ថាការកែទម្រង់ស្ថាប័នបោះឆ្នោត គឺត្រូវប្រើពេលយូរថែមទៀត ហើយទាល់តែមាន​ការ​ពិភាក្សាគ្នារវាងថ្នាក់ដឹកនាំកំពូល ទើបអាចបញ្ជាក់បាន។ នៅពេលសួរថា តើគណបក្សសង្រ្គោះជាតិ នឹងស្បថចូល​សភានៅពេលណា? លោកសុន ឆ័យ បញ្ជាក់ថា៖ «ខ្ញុំមិនដឹងច្បាស់។ យើងកំពុងតែពិចារណា។»

អនុប្រធានគណបក្សប្រជាជនកម្ពុជាលោកហ៊ុន សែន នៅថ្ងៃទី១០ ខែមិថុនា ឆ្នាំ២០១៤ នេះបានព្រលយឲ្យដឹងថា គណបក្សប្រជាជនកម្ពុជា ឯកភាពឲ្យដាក់ស្ថាប័នបោះឆ្នោតចូលទៅក្នុងរដ្ឋធម្មនុញ្ញ តាមរយៈការធ្វើវិសោធនកម្ម ហើយក៏អនុញ្ញាតឲ្យគណបក្សសង្រ្គោះជាតិ សហការជាមួយក្រុមហ៊ុនឯកជន ដើម្បីបង្កើតស្ថានីយទូរទស្សន៍​មួយ​ផងដែរ។

ក្នុងពិធីសំណេះសំណាលជាមួយយោធិនពិការ លើទឹកដីស្រុកឈូក ខេត្ដកំពត នៅថ្ងៃទី១០ ខែមិថុនានេះ លោក​នាយករដ្ឋមន្ត្រី ហ៊ុន សែន ក៏បានជំរុញដល់បេក្ខជនជាប់ឆ្នោតតំណាងរាស្រ្ត របស់គណបក្ស​សង្រ្គោះ​ជាតិទាំង​៥៥រូប គម្បីស្បថចូល​សភា ដើម្បីធ្វើការកំណែទម្រង់ ជាមួយគណបក្សប្រជាជនកម្ពុជា។ តែលោក ហ៊ុន សែន បាន​បដិសេធ​ដាច់អហង្ការ ចំពោះការទាមទារឲ្យមានការបោះឆ្នោតឡើងវិញ មុនការបញ្ចប់​អាណត្តិ។

គួរកត់សម្គាល់ថា បន្ទាប់ពីគណបក្សសង្រ្គោះជាតិ ច្រានចោលលទ្ធផលបោះឆ្នោតសកល ហើយធ្វើហិការមិនស្បថ​ចូលប្រជុំសភា ដោយទាមទារឲ្យមានការបោះឆ្នោតមុនបញ្ចប់អាណត្តិ ក្រោយការកែទម្រង់ស្ថាប័នបោះឆ្នោតមក ប្រទេសកម្ពុជាមានភាពជាប់គាំងផ្នែកនយោបាយ ជិតមួយឆ្នាំទៅហើយ បើគិតចាប់ពីការបោះឆ្នោតសកលខែកក្កដា ឆ្នាំ២០១៣៕