ទូរទស្សន៍រដ្ឋរបស់ប្រទេសលីប៊ី បានផ្សាយរូបភាពកូនប្រុសមួយរូប របស់អតីតមេដឹកនាំផ្ដាច់ការ លោក មូអាម៉ា កាដាហ្វី (Mouammar Kadhafi) ដែលកំពុងជាប់ឃុំឃាំង នៅក្នុងពន្ធនាគារនៃរដ្ឋធានីទ្រីប៉ូលី។ កូនប្រុសរបស់អតីត​បុរសខ្លាំង បានបង្ហាញនូវការសុំទោស និងសុំឲ្យមានការអភ័យទោស ពីសំណាក់ជនរួមជាតិខ្លួន។

លោក សាអាឌី កាដាហ្វី កូនប្រុស លោក មូអាម៉ា កាដាហ្វី។ (រូបថតផ្ដិតពីទូរទស្សន៍)

អវសាន្ដនៃរបបផ្ដាច់ការ - លោក សាអាឌី កាដាហ្វី (Saadi Kadhafi) ដែលត្រូវបានតុលាការប្រទេសលីប៊ី ចាប់​ទោសកំហុស ពីបទថាបានប្រព្រឹត្តិឧក្រិដ្ឋកម្ម ដើម្បីរក្សាអំណាចឲ្យឪពុករបស់ខ្លួននោះ ត្រូវបានធ្វើបត្យាប័ន​មក​កាន់រដ្ឋធានី ទ្រីប៉ូលី កាលពីថ្ងៃទី៦ ខែមីនាកន្លងទៅ ពីប្រទេសនីហ្សេ។ កូនប្រុសរបស់អតីតជនផ្ដាច់ការ កាដាហ្វី រូបនេះ បានរត់នៅជ្រកកោន នៅក្នុងប្រទេសភូមិផងរបងជាមួយ ចាប់តាំងពីខែកញ្ញាឆ្នាំ២០១១ នៅមុនការដួលរលំ​នៃរបបរបស់ឪពុកលោក។

លោក សាអាឌី កាដាហ្វី នៅក្នុងសម្លៀកបំពាក់ជាអ្នកទោសពណ៌ខៀវ បានអង្គុយនៅក្នុងបន្ទប់មួយ ដែលទំនង​ដូច​ជាការិយល័យនៅក្នុងពន្ធនាគារ។ លោកបាននិយាយ«សោកស្ដាយ» ពីរាល់ការខូចខាតទាំងឡាយ តែមិនបាន​ថ្លែង​បញ្ជាក់លំអិតឲ្យបានច្រើននោះទេ។

«ខ្ញុំសុំទោសប្រជាជន និងរដ្ឋាភិបាលលីប៊ី។ (...) ខ្ញុំចង់អះអាងទៅដល់ក្រុមគ្រួសារខ្ញុំថា ខ្ញុំមានសុខទុក្ខធម្មតា មាន​សុខភាពល្អ និងមិនមានការធ្វើបាបអ្វីឡើយ។» នេះជាសម្ដីជាអាទ៌ របស់លោក។

ការចាក់ផ្សាយវីដេអូនេះ អាជ្ញាធររបស់ប្រទេសលីប៊ី មានបំណងចង់ច្រានចោល នូវពាក្យចចាមអារាមទាំងឡាយ ដែលនិយាយថា កូនប្រុសរបស់អតីតជនផ្ដាច់ការ មានសុខភាពមិនល្អា និងកំពុងរងនូវទារុណកម្ម ដែលប៉ះពាល់​យ៉ាងធ្ងន់ធ្ងរដល់សិទ្ធិមនុស្ស។ នៅក្នុងវីដេអូនោះ អ្នកទោសរូបនេះ បានបញ្ជាក់ថារូបរបស់ខ្លួន ត្រូវបានថតនៅ​យប់​ថ្ងៃព្រហស្បត្តិ៍ មុនមួយថ្ងៃនៃការចាក់ផ្សាយ គឺយប់ថ្ងៃសុក្រទី២៨ ខែមីនាម្សិលម៉ិញនេះ៕

លោក មូអាម៉ា កាដាហ្វី ដែលជាប់ឈ្មោះជាជនផ្ដាច់ការ នៅក្នុងប្រវត្តិសាស្ត្រ។ (រូបថត Wikipedia)

-----------------------------------
ដោយ សេក មនោរកុមារ (ទំនាក់ទំនង៖ [email protected]) - ប៉ារីស​ ថ្ងៃទី២៩ មីនា ២០១៤