ស្ថានទូតបារាំងក្នុងរដ្ឋធានីទ្រីប៉ូលីប្រទេសលីប៊ី បានរងនូវការបំផ្ទុះគ្រាប់បែក ថ្ងៃអង្គារនេះ ដែលទំនងជាបណ្ដាលមកពី​រថយន្ដចតចោលនៅក្បែរនោះ បង្កឲ្យកម្លាំងប្រដាប់អាវុធបារាំងពីររូប ដែលរក្សាសន្តិសុខនៅទីនោះបានរងរបួស ក្នុង​នោះ​ម្នាក់រងរបួសធ្ងន់។

រូបថតនៅក្រោយពេលភេវរកម្ម ខណៈរថយន្ដដែលត្រូវបានបំផ្ទុះ នៅកំពុងឆេះនៅឡើយ។

គេនឹងមិនទាន់ដឹងពីមូលហេតុ និងនរណាជាអ្នកទទួលខុសត្រូវនោះនៅឡើយ ហើយក៏នៅមិនទាន់មាន ការ«ចេញមក​ប្រកាស»ទទួលខុសត្រូវណាមួយនោះដែរ។ នាយករដ្ឋមន្ត្រីបារាំង លោកហ្សង់ម៉ាក អារ៉ូល៍ (Jean-Marc Ayrault) បាន​និយាយថា កិច្ចអន្តរាគមន៍នៅប្រទេសម៉ាលីរបស់បារាំង ប្រឆាំងនឹងក្រុមឧទ្ទាមអ៊ីស្លាមនិយម ត្រូវបានគិតថាជាដើមហេតុ​នៃអំពើ​ភេវរកម្មនេះ។

ប្រធានាធិបតីបារាំង លោកហ្វ្រង់ស័រ ហូឡង់ (François Hollande) បានថ្កោលទោសយ៉ាងម៉ឺងម៉ាត់ ប្រឆាំងនឹងអំពើ​ភេវរកម្ម។ នៅក្នុងសេចក្ដីប្រកាសព័ត៌មានមួយ វិមានប្រធានាធិបតីអេលីហ្សេរ បានបញ្ជាក់ថា «បារាំងរងចាំ​ពីអាជ្ញាធរ​នៃប្រទេសលីប៊ី នូវការបកស្រាយមួយ ស្ដីពីអំពើមិនអាចទទួលយកបាននេះ ហើយអ្នកទទួលខុសត្រូវរបស់វា ត្រូវបាន​កំណត់អត្តសញ្ញាណ និងយកទៅកាត់ទោស។ អំពើធ្វើចំពោះបារាំងនេះ មានគោលដៅវាយប្រហារសហគមន៍អន្តរជាតិ ដែលកំពុងប្រយុទ្ធប្រឆាំងនឹងអំពើរភេវរកម្ម។»

ប្រមុខការទូតបារាំង លោក ឡូរ៉ង់ ហ្វាប៊ីយូស (Laurent Fabius) បានដំណើរទៅកាន់ទីកន្លែងកើតហេតុ ហើយបាន​ប្រកាសថា ជាអំពើរ«គួរអោយស្អប់ខ្ពើម»មួយ។  លោកថាប្រសិនបើបុគ្គលិកស្ថានទូត មានវត្ថមាននៅពេលនោះ វា​ប្រាកដជា​វិនាសកម្មមួយ យ៉ាងអាណោចអាធម ឲជាទីបំផុត។ ពីទីនោះដដែល លោកបានប្រកាសពីការពង្រឹកសុវត្ថិភាព នៃគ្រប់ស្ថាប័នបារាំងប្រចាំនៅតំបន់បូព៌ាកណ្ដាល ហើយបញ្ជាក់ថាកងកម្លាំងអន្តរាគមន៍ពិសេសរបស់បារាំងមួយ នឹងត្រូវ​បញ្ជូន​ទៅកាន់រដ្ឋធានីនៃប្រទេសលីប៊ី។

អំពើភេវរកម្មបានកើតឡើង នៅម៉ោងប្រមាណជា០៧ព្រឹកថ្ងៃទី២៣ខែមេសា។ នាយនគរបាលរដ្ឋធានីទ្រីប៉ូលី បាន​និយាយថា គ្រឿងបំផ្ទុះត្រូវបានរៀបចំដាក់នៅក្នុងរថយន្ថ ដែលចតនៅមុខស្ថានទូត។ តុល្យភាពនៃការខូតខាត៖ របង​ស្ថានទូតមួយផ្នែក និងផ្នែកខាងមុខនៃអាគារកំពស់ពីរជាន់របស់ស្ថានទូត ត្រូវបានបាក់ រថយន្ដពីរគ្រឿងបានឆេះ និងមួយ​គ្រឿងទៀតខូត។ ជាលើកទីមួយហើយ ដែលតំណាងកុងស៊ុលបរទេស ប្រចាំនៅទីក្រុងទ្រីប៉ូលី បានក្លាយជាគោលដៅ​វាយប្រហារ បន្ទាប់ពីការស្លាប់របស់មេដឹកនាំផ្ដាច់ការ មូអាម៉ា ហ្គាដាហ្វី (Mouammar Kadhafi) នៅឆ្នាំ២០១១នោះមក។

កាលពីខែកញ្ញាឆ្នាំទៅម៉ិញ ស្ថានទូតអាមេរិកនៅបេនហ្គាស៊ី (Benghazi) ផ្នែកខាងកើតនៃប្រទេសលីប៊ី ធ្លាប់ជាគោលដៅ​មួយដូចគ្នាដែរនៃការវាយប្រហារ ធ្វើអោយមន្ត្រីការទូតអាមេរិកបួនរូបស្លាប់ ក្នុងនោះមានអគ្គរដ្ឋទូតម្នាក់ផង។ ប៉ុន្តែ​រដ្ឋមន្ត្រីក្រសួងមហាផ្ទៃលីប៊ី លោក អាឆួ ជូអៃ (Achour Chouail) នៅមិនទាន់អាចបញ្ជាក់បាននៅឡើយ ថាអំពើភេវរកម្ម​ទាំងពីរ មានការជាប់ទាក់ទិនគ្នានោះ។ លោករដ្ឋមន្ត្រីបានប្រកាសថា គណកម្មាធិការស៊ើបអង្កេតមួយ ត្រូវបានបង្កើត​ឡើង ដើម្បីស្រាវជ្រាវពីសំនុំរឿងទាំងនេះ។

សូមរំលឹកថា កាលពីថ្ងៃសុក្រកន្លងមនេះ បណ្ដាញភេវរនិយម អាលកៃដា (Al-Qaida) ប្រចាំនៅតំបន់អាហ្វ្រិកខាងជើង ហៅកាត់ថា អាកមី (Aqmi) បានគម្រាមវាយប្រហារសងទៅប្រទេសបារាំង ដើម្បីឆ្លើយតបនឹងកិច្ចអន្តរាគមន៍​យោធា​បារាំងនៅប្រទេសម៉ាលី ដែលមកទល់នឹងពេលនេះ បានបណ្ដេញក្រុមឧទ្ទាមអ៊ីស្លាមនិយម សឹងជាស្ថាពរទៅហើយ ពី​ប្រទេសនៅទ្វីបអាហ្វ្រិកកណ្ដាលមួយនេះ៕

-----------------------------------------------------------------
ដោយ សេក មនោរកុមារ - ប៉ារីស​ ថ្ងៃទី២៣ ខែមេសា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ