ស្ថានទូតវៀតណាមប្រចាំកម្ពុជា បានបន្តរក្សាគោលជំហររបស់ខ្លួនដដែល នោះគឺការបដិសេធមិនទទួលយកញត្តិ របស់ក្រុមអង្គការសង្គមស៊ីវិលដែលបានដាក់ ក្នុងបំណងឲ្យរដ្ឋាភិបាលវៀតណាម ជួយជំរុញការគោរពសិទ្ធិមនុស្ស និងដោះលែងជន២៣នាក់ ដែលត្រូវបានអាជ្ញាធរគ្រប់គ្រងដោយរដ្ឋាភិបាលកម្ពុជាឃុំខ្លួន។

ទង់ជាតិនៃសាធារណរដ្ឋសង្គមនិយមវៀតណាម។

សិទ្ធិ - ជាថ្មីម្តងទៀតតំណាងក្រុមអង្គការសង្គមស៊ីវិលជាង១០០ នៅថ្ងៃទី១០ ខែកុម្ភៈ នេះបានបន្តយកញត្តិទៅដាក់​នៅស្ថានទូតវៀតណាម ដើម្បីស្នើឲ្យប្រទេសវៀតណាម ជម្រុញរដ្ឋាភិបាលកម្ពុជា ឲ្យលើកលែងទោស និងដោះ​លែងសកម្មជនសិទ្ធិមនុស្ស និងកម្មករ ទាំង២៣នាក់។ តែស្ថានទូតនៃប្រទេសកុំមុយនីស្តមួយនេះ មិនបានចាត់មន្រ្តី​ស្ថានទូតណាម្នាក់ឲ្យចេញមកទទួលញត្តិនោះទេ ហើយថែមទាំងមិនបញ្ជាក់មូលហេតុទៀតផង។

ការបន្តដាក់ញត្តិរបស់ក្រុមអង្គការសង្គមស៊ីវិលជាថ្មីនេះ ត្រូវបានគេមើលឃើញថា ចំពេលដែលសាលាឧទ្ធរណ៍​គ្រោងនឹងបើកសាវនាការជំនុំជម្រះជន២១នាក់ នៅថ្ងៃទី១១ ខែកុម្ភៈ ខណៈ២នាក់ផ្សេងទៀត ត្រូវបានសាលាដំបូង​រាធានីភ្នំពេញដោះលែង ឲ្យនៅក្រៅឃុំកាលពីពេលថ្មីៗនេះ។

គួររម្លឹកថា កាលពីថ្ងៃទី២៩ ខែមករា មន្ត្រីអង្គការសង្គមស៊ីវិលជាតិ និងអន្តរជាតិ ប្រមាណ៥០នាក់ តំណាងឲ្យ​ស្ថាប័ន​ចំនួន១៩៧ បានដាក់ញត្តិទៅស្ថានទូតចំនួន៧ រួមមានស្ថានទូត មីយ៉ាន់ម៉ា សិង្ហបុរី ប្រ៊ុយណេ ភីលីពីន ឥណ្ឌូនេស៊ី វៀតណាម ចិន និងអង្គការសហប្រជាជាតិ ស្នើឲ្យមានការដោះលែងអ្នកទាំង២៣ ដែល បានជាប់​ឃុំនៅពន្ធនាគារ​ត្រពាំងផ្លុង ខេត្តកំពង់ចាម។ តំណាងអង្គការសហប្រជាជាតិ និងស្ថានទូតទាំងអស់នោះ បានទទួលយកញត្តិ​ដោយ​មានការស្វាគមន៍យ៉ាងខ្លាំងក្លា។ ប៉ុន្តែមានតែស្ថានទូតវៀតណាមមួយទេ ដែលមិនព្រមទទួលយកញត្តិនោះ ដោយ​លើកហេតុផលថា ជាថ្ងៃសម្រាកបុណ្យចូលឆ្នាំចិន និងវៀតណាម។

ជុំវិញករណីនេះ លោក អ៊ូ វីរៈ ប្រធានមជ្ឈមណ្ឌលសិទ្ធិមនុស្សកម្ពុជា បានពន្យល់ថា អង្គការសង្គមស៊ីវិល និង​ពលរដ្ឋ​គ្រប់រូបមានសិទ្ធិសេរីភាពបញ្ចេញមតិ និងការដាក់ញត្តិទាមទារអ្វីមួយដែលស្របនឹងច្បាប់។ ដូច្នេះ សកម្មភាព​របស់​អង្គការសង្គមស៊ីវិល គឺជារឿងត្រឹមត្រូវ និងគួរតែមានការលើកទឹកចិត្ត នៅក្នុងប្រទេសដែលគោរពលិទ្ធិ​ប្រជាធិបតេយ្យ ដូចជាកម្ពុជា។

លោក អ៊ូ វីរៈ បានបញ្ជាក់ថា៖ «ស្ថានទូតវៀតណាម តំណាងឲ្យប្រទេសកុំមុយនីស្តវៀតណាម ខ្ញុំគ្នានសង្ឃឹមជឿជាក់ ថាប្រទេសនេះ ជួយ ឬលូកដៃ ឲ្យមានការគោរពសិទ្ធិមនុស្សនៅកម្ពុជា នោះទេ ព្រោះប្រទេសនេះ ជាប្រទេស​កុំមុយនីស្តផ្តាច់ការដែរ។ ហើយការដែលប្រទេសចិនទទួលញត្តិ ក៏មិនប្រាកដថាប្រទេសចិន ជម្រុញការគោរពសិទ្ធិ​មនុស្សដែរ ព្រោះចិនជាប្រទេសកុំមុយនីស្ត ដែលកំពុងរំលោភសិទ្ធិមនុស្សនៅកម្ពុជា តាមរយៈក្រុមហ៊ុនរបស់ខ្លួន​នៅកម្ពុជា»។

សូមបញ្ជាក់ថា លោក វន់ ពៅ ជាប្រធានសមាគមប្រជាធិបតេយ្យឯករាជ្យ នៃសេដ្ឋកិច្ចក្រៅប្រព័ន្ធ និងមនុស្ស​ចំនួន​២២នាក់ទៀត ត្រូវបានសមត្ថកិច្ចគ្រប់គ្រងដោយរដ្ឋាភិបាលគណបក្សប្រជាជនកម្ពុជា ចាប់ខ្លួន កាលពីថ្ងៃទី០២ និង​ទី០៣ ខែមករា ឆ្នាំ២០១៤ ក្នុងអំឡុងពេលនៃការប៉ះទង្គិចគ្នា យ៉ាងហិង្សារវាងកម្លាំងសមត្ថកិច្ច និងក្រុមបាតុករ នៅ​រោងចក្រយ៉ាកជីង និងសួនឧស្សាហកម្ម កាណាឌីយ៉ា ផ្លូវវេងស្រេង។

ក្រោយពីការចាប់ខ្លួនជនទាំង២៣នាក់ ដែលរដ្ឋាភិបាលចាត់ទុកថាជា«ជនល្មើស» ត្រូវបានសមត្ថកិច្ចបញ្ជូនខ្លួន ទៅ​ឃុំក្នុងពន្ធនាគារ ត្រពាំងថ្លុង លើទឹកដីខេត្តកំពង់ចាម ក្បែរព្រំដែនវៀតណាម ដើម្បីរង់ចាំការផ្តន្ទាទោស។ តែសម្រាប់ ក្រុមអង្គការសង្គមស៊ីវិលជាតិ និងអន្តរជាតិ សកម្មជនដីធ្លី និងគណបក្សសង្គ្រោះជាតិ ដែលជាគណបក្សជំទាស់ បាន​ចាត់ទុកជនទាំង២៣នាក់នោះ ថាជាជនរងគ្រោះដោយ«អយុត្តិធម៌» នឹងកំពុងទាមទារឲ្យដោះលែងពួកគេ ដោយ​បានធ្វើការតវ៉ា និងដាក់ញត្ដិជាបន្ដបន្ទាប់តាមបណ្តាស្ថានទូត និងអង្គការអន្តរជាតិ នានា៕

--------------------------------------
ដោយ អ៊ុំ បូរី (ទំនាក់ទំនង៖ [email protected]) - ភ្នំពេញ ថ្ងៃទី១០ ខែកុម្ភៈ ឆ្នាំ២០១៤