មើល​ក្រុង​អសុរា ថ្លែង​«ស»​ដាក់​គ្នា​តាម​ហ្វេសប៊ុក ម្ដងមើល៍!

ថ្វីត្បិតតែភាពស្ងប់ស្ងាត់ ដូចជាបានកើតឡើងក្នុងរយៈពេលចុងក្រោយនេះ ដែលធ្វើឲ្យមានមន្ទិលពីការលបលួច​ចរចាគ្នាស្ងាត់ៗ​នោះក៏ដោយ តែនៅតាមបណ្ដាញសង្គម បណ្តាថ្នាក់ដឹកនាំនៃគណបក្សធំៗទាំងពីរ បានធ្វើឲ្យក្រុម​អ្នក​គាំទ្រមិនបានសម្រាកនៅស្ងៀមនោះឡើយ ជាពិសេសប្រតិកម្មជុំវិញការបង្ក្រាប​លើបាតុករអហិង្សាកាលពី​ពេលថ្មីនេះ។ ប្រតិកម្មដែលបើសូម្បីក្រុមអ្នកវិភាគឯករាជ្យ ក៏បានប្រើប្រាស់ទំព័រហ្វេសប៊ុករបស់ពួកគេ ដើម្បី​លូក​មាត់​ចូល​មកបកស្រាយនឹងគេដែរ។
Loading...
  • ដោយ: អ៊ុម វ៉ារី
  • កែប្រែចុងក្រោយ: February 04, 2014
  • ប្រធានបទ:
  • អត្ថបទ: មានបញ្ហា?
  • មតិ-យោបល់

ថ្វីត្បិតតែភាពស្ងប់ស្ងាត់ ដូចជាបានកើតឡើងក្នុងរយៈពេលចុងក្រោយនេះ ដែលធ្វើឲ្យមានមន្ទិលពីការលបលួច​ចរចាគ្នាស្ងាត់ៗ​នោះក៏ដោយ តែនៅតាមបណ្ដាញសង្គម  បណ្តាថ្នាក់ដឹកនាំនៃគណបក្សធំៗទាំងពីរ បានធ្វើឲ្យក្រុម​អ្នក​គាំទ្រមិនបានសម្រាកនៅស្ងៀមនោះឡើយ ជាពិសេសប្រតិកម្ម ជុំវិញការបង្ក្រាប​លើបាតុករអហិង្សាកាលពី​ពេលថ្មីនេះ។ ប្រតិកម្មដែលបើសូម្បីក្រុមអ្នកវិភាគឯករាជ្យ ក៏បានប្រើប្រាស់ទំព័រហ្វេសប៊ុករបស់ពួកគេ ដើម្បី​លូក​មាត់​ចូល​មកបកស្រាយនឹងគេដែរ។


កងកម្លាំងប្រដាប់ដោយអាវុធ«គ្រាប់ពិត» ត្រូវបានបញ្ជូនឲ្យមកបង្ក្រាបបាតុករដៃទទេ ថ្ងៃទី០៣ ខែមករា​ ឆ្នាំ២០១៤ នៅតាមបណ្ដោយផ្លូវវេងស្រេង។ (រូបថត MONOROOM.info/ O.vary)

នយោបាយកម្ពុជា - ដោយមិនបានបង្ហើយ ពីការជួបចរចារជាថ្មី ឬដោះស្រាយរាល់បញ្ហាផ្សេងដែល​ទើបនឹង​កើត​ឡើងនោះ ទំព័រហ្វេសប៊ុករបស់លោក កឹម សុខា ប្រធានស្តីទីគណបក្សសង្គ្រោះជាតិ បានសង្កត់ធ្ងន់កាន់តែខ្លាំង​ឡើង នូវការមិនពេញចិត្តរបស់ប្រជាពលរដ្ឋខ្មែរនៅក្រៅប្រទេស ចំពោះការគ្រប់គ្រងរដ្ឋាភិបាលដោយលោក ហ៊ុន សែន ជាមួយនិងការប្រើប្រាស់នូវ«អំពើហិង្សា»លើពលរដ្ឋស្លូតត្រង់។ កាលពីថ្ងៃទី៣ ខេមករា ឆ្នាំ២០១៤ ទំព័រ​ហ្វេសប៊ុករបស់អនុប្រធានគណបក្សប្រឆាំង បានសរសេរថា «ក្រុមពលរដ្ឋខ្មែរអាមេរិកាំងរាប់រយនាក់ មកពីរដ្ឋ​នានារួមគ្នាជាមួយនឹងពលរដ្ឋខ្មែរ មកពីប្រទេសកាណាដាបានមកធ្វើបាតុកម្មតវ៉ា នៅខាងមុខទីស្នាក់ការ​អង្គការ​សហប្រជាជាតិ ដើម្បីទាមទារឱ្យមានការបោះឆ្នោតឡើងវិញនៅកម្ពុជា និងឱ្យបញ្ឈប់ការរំលោភសិទ្ធិ​មនុស្ស​នានា។»

ការរំលោភសិទ្ធិមនុស្ស ទំនងជាមេដឹកនាំគណបក្សសង្គ្រោះជាតិរូបនេះ ចង់សំដៅលើសកម្មភាព​នៃការ​បង្រ្កាប​ដោយគ្មានប្រណីដៃ ពីសំណាក់អាជ្ញាធរមានសមត្ថកិច្ច កម្លាំងបង្ក្រាបកូបកម្ម កម្លាំងចម្រុះរបស់ជាតិ ក៏ដូចជាកម្លាំង​សន្តិសុខក្រុមហ៊ុន«ខុស»ច្បាប់ ដែលជួលដោយសាលារាជធានីភ្នំពេញ មកវាយសំពងសម្លាប់ប្រជាពលរដ្ឋ ​​ក្នុង​អំឡុងធ្វើបាតុកម្មដោយ«អហិង្សា» ដែលគ្រាន់តែទាមទារនូវសិទ្ធិ សេរីភាព និងយុត្តិធម៌ប៉ុណ្ណោះ។ ការបង្ហាញ​សាច់​ដុំជាបន្តបន្ទាប់ របស់កងកម្លាំងអាជ្ញធារទាំងនេះ បានធ្វើឲ្យទំព័រហ្វេសប៊ូក របស់លោក យឹម សុវណ្ណ អ្នកនាំពាក្យ​របស់គណបក្សប្រឆាំង សម្ដែងប្រតិកម្មយ៉ាងខ្លីថា «គ្រាប់កាំភ្លើង មិនអាចបញ្ចប់ការស្រែកឃ្លាន សិទិ្ធសេរីភាព និង​យុតិ្តធម៌សង្គម របស់ប្រជាពលរដ្ឋស្លូតត្រង់បានឡើយ»។

ផ្ទុយពីការលើកឡើងរបស់ក្រុមគណបក្សប្រឆាំង ទំព័រហ្វេសប៊ុកដែលគេជឿថាជារបស់លោក ហ៊ុន សែន នោះ បាន​លើកឡើងដូចជាអេះមិនចំកន្លែងរមាស់យ៉ាងដូច្នេះថា «រាជរដ្ឋាភិបាលពិតជាបានទទួល និង ស្តាប់ មតិយោបល់ សំណូមពរ និងការព្រួយបារម្ភផ្សងៗពីប្រជាពលរដ្ឋដែលចង់ឃើញ និងចង់បានប្រទេសជាតិរីកចម្រើនជឿនលឿន ហើយដែលបានបញ្ជាក់យ៉ាងច្បាស់លាស់ នៅក្នុងកំណែទម្រង់ជាតិក្នុងអាណត្តិទីប្រាំនេះ។»

ការអេះមិនចំកន្លែងរមាស់ នៃទំព័រហ្វេសប៊ុករបស់លោក ហ៊ុន សែន មិនបានធ្វើឲ្យអ្នកវិភាគឯករាជ្យ លោក កែម ឡី បំភ្លេចពីព្រឹត្តិការណ៍ដែលបានកើតឡើងកន្លងមកនោះទេ។ លោកបានប្រើប្រាស់ទំព័រហ្វេសប៊ូករបស់លោក ធ្វើការ​ប្រៀបធៀបព្រឹត្តិការណ៍ទាំងនោះ ជាពីរកណី។ ទីមួយ លោកបានសរសេរថា «គេសង្កេតឃើញ អ្នកកាន់អំណាច​បច្ចុប្បន្ន និពន្ធរឿងល្ខោនដែលមានសុទ្ធតែតួ “យក្ស” ដូច្នេះការសំដែងរឿងនេះ មិនសូវមានកាគាំទ្រពីទស្សនិកជន​ទេ។» ឯករណីទីពីរ លោកបានសរសេរថា «អ្នកដែលមានបទពិសោធន៍លក់តែនំបញ្ចុក ដល់ពេលប្តូរអោយមកលក់​ហ៊តដក (hot dog) គឺពិបាកទទួលបានជោគជ័យណាស់។ ជារួមមានន័យថា អ្នកអោយយោបល់ដដែលៗ ទីប្រឹក្សា​ដដែលៗ មនុស្សដដែលៗ ... គឺគ្មានអ្វីក្រៅពី ការបង្ក្រាប សំឡុត គំរាមកំហែង គាបសង្គាត់។ល។ កាធ្វើរបៀបនេះ ពិបាកនឹងទទួលបានការគាំទ្រពីប្រជាពលរដ្ឋណាស់ រួមទាំងសហគមន៍អន្តរជាតិផងដែរ។»

អ្នកវិភាគរូបនេះ បានផ្ដល់យោបល់ ទៅកាន់អ្នកកាន់អំណាច ឲ្យទុកប្រយោជន៍ជាតិជាធំ គោរពឆន្ទៈប្រជាពលរដ្ឋ៖ «ពួកគេគួរប្រើប្រាស់ ឬស្តាប់យោបល់របស់សង្គមស៊ីវីល បណ្ឌិតបញ្ញាវ័ន្ត ដែលមានគំនិតថ្មីប្រកបដោយ​សន្តិវិធី​និង​អហិង្សា។»

ឯលោក ឡៅ ម៉ុងហៃ អ្នកវិភាគជើងចាស់ម្នាក់ទៀត ក៏បានពន្យល់ក្នុងហ្វេសប៊ូករបស់លោកដែរថា រាល់ការបង្ក្រាប ឬការចាប់ខ្លួនសកម្មជនផ្សេងៗ តាំងពីថ្ងៃទី៣ ខែមករា មកអាចមានបំណងពីរយ៉ាង។ ទីមួយលោកបញ្ជាក់ថា ជាការ​បង្ក្រាប សម្លាប់ ចាប់ខ្លួន ជាទង្វើបំបាក់ស្មារតីធ្វើយ៉ាងណា កុំអោយមានការតវ៉ាបន្តរទៀត។ ករណីទីពីរ លោកបន្ថែម​ថា វាយសង្គ្រប់ សាកល្បងសន្ទះ បើឈ្នះកាន់តែប្រសើរ បើចាញ់លួងលោមជាក្រោយ នេះជាទង្វើដែលលោកហ៊ុន សែន ធ្លាប់អនុវត្តិកន្លងមកបានជោគជ័យជាបន្តរបន្ទាប់។

លោក ឡៅ ម៉ុងហៃ បានផ្ដល់យោបល់ប្រហាកប្រហែលនឹងលោក កែម ឡី ដែរ ដោយបានសរសេរថា «គណបក្ស​ធំៗទាំងពីរ គួររកដំណោះស្រាយឬការចរចារណាមួយ ដែលមានលក្ខខ័ណ្ឌច្បាស់លាស់។ មកដល់ពេលនេះ រដ្ឋាភិបាលនៃគណបក្សប្រជាជនកម្ពុជា គួរតែធ្វើការសម្បទាន ប្រកបដោយស្មារតីទទួលខុសត្រូវ ដើម្បីបញ្ជៀសនូវ​វិបត្តិសង្គម ដែលអាចកើតឡើងក្នុងពេលដ៍ខ្លីខាងមុខ៕»

--------------------------------------------------
ដោយ អ៊ុម វ៉ារី (ទំនាក់ទំនង៖ [email protected]) - ភ្នំពេញថ្ងៃទី៤ ខែកុម្ភៈ ឆ្នាំ២០១៤

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...