លោក ប្រាជ្ញ ច័ន្ទ ដែលបច្ចុប្បន្នជាអភិបាលខេត្តបាត់ដំបង នឹងត្រូវតែងតាំងជាអភិបាលខេត្ត ដែលទើបនឹងបង្កើត​ថ្មី​គឺ«ខេត្តត្បូងឃ្មុំ»។ ហើយតំណែងជាអភិបាលខេត្តបាត់ដំបង ក៏នឹងត្រូវជំនួសដោយលោក ច័ន្ទ សុផល បច្ចុប្បន្នជា​ប្រធានក្រុមប្រឹក្សាខេត្តសៀមរាប។ នេះបើយោងតាមការបញ្ជាក់ របស់លោកនាយករដ្ឋមន្ត្រី ហ៊ុន សែន ក្នុងកិច្ចប្រជុំ​គណៈរដ្ឋមន្ត្រីនាថ្ងៃទី ២៤ ខែមករា ឆ្នាំ២០១៤ នៅវិមានសន្តិភាពកាលពីម្សិលម៉ិញ។

ផែនទីក្រៅផ្លូវការ របស់ខេត្តត្បូងឃ្មុំថ្មី។ (រូបថតពីប្រព័ន្ធផ្កាយរណប ហ្គូហ្គ័ល)

ខេត្តត្បូងឃ្មុំ- នាយករដ្ឋមន្រ្តីនៃព្រះរាជាណាចក្រកម្ពុជា អាណត្តិទីប្រាំលោក ហ៊ុន សែន ក្នុងកិច្ចប្រជុំគណៈរដ្ឋមន្ត្រី ថ្ងៃទី២៤ ខែមករា ឆ្នាំ២០១៤ នៅវិមានសន្តិភាពបានលើកឡើងថា រដ្ឋាភិបាលនឹងស្នើរព្រះរាជតំរិះ ពីព្រះមហាក្សត្រ​ក្នុងការតែងតាំងលោក ប្រាជ្ញ ច័ន្ទ ដែលបច្ចុប្បន្នជា អភិបាលខេត្តបាត់ដំបង ជាអភិបាល«ខេត្តត្បូងឃ្មុំ»។ ឯអភិបាល​ខេត្តបាត់ដំបង នឹងត្រូវជំនួសមកវិញដោយលោក ច័ន្ទ សុផល បច្ចុប្បន្នជាប្រធានក្រុមប្រឹក្សាខេត្តសៀមរាប។

លោកនាយករដ្ឋមន្រ្តីកម្ពុជា ក៏បានស្នើឲ្យគ្រប់ក្រសួងស្ថាប័ន ដែលពាក់ព័ន្ធត្រូវគិតគូររៀបចំ​មន្ទីរអង្គភាព ដែលជា​ខ្សែ​បណ្តោយរបស់ខ្លួននៅកម្រិតខេត្តថ្មីនេះ។ ជាមួយគ្នានេះ លោកក៏បានឲ្យគណៈអភិបាលខេត្តកំពង់ចាម នៅបន្ត​ការងាររបស់ខ្លួនក្នុងការគ្រប់គ្រងដែនសម្ថកិច្ចនៃខេត្តទាំងពីរនេះជាធម្មតា រហូតដល់ថ្ងៃដែលក្រុមប្រឹក្សា និងគណៈ​អភិបាលខេត្តត្បូងឃ្មុំ ចូលកាន់តំណែងជាផ្លូវការនាពេលខាងមុខ។

សូមរម្លឹកថា«ខេត្តត្បួងឃ្មុំ» ដែលទើបនឹងបង្កើតឡើងតាមព្រះរាជក្រឹត្យលេខ នស/រកត/១២០៣/១៤៤៥ របស់​ព្រះ​មហាក្សត្រ​ប្រទេសកម្ពុជាព្រះករុណា ព្រះបាទសម្តេចព្រះបរមនាថ នរោត្តម សីហមុនី ចុះព្រះហស្ថលេខា​កាល​ពី​ថ្ងៃ​ទី៣១ ធ្នូ ២០១៣ តាមសំណើរទូលថ្វាយរបស់លោកនាយករដ្ឋមន្ត្រីហ៊ុន សែន ក្នុងការបង្កើតខេត្តថ្មីនេះ។

«ខេត្ត​ត្បួងឃ្មុំ» ថ្មីមួយនេះបានកាត់យកនូវក្រុងចំនួនមួយ និង ស្រុកចំនួនប្រាំមួយពីខេត្តកំពង់ចាម ដែលបច្ចុប្បន្ន​មាន​ស្រុកបាធាយ, ស្រុកចំការលើ, ស្រុកជើងព្រៃ, ស្រុកតំបែរ, ក្រុងកំពង់ចាម, ស្រុកកំពង់សៀម, ស្រុកកងមាស, ស្រុក​កោះសូទិន, ស្រុកក្រូចឆ្មារ, ស្រុកមេមត់, ស្រុកអូររាំងឪ, ស្រុកពញាក្រែក, ស្រុកព្រៃឈរ, ស្រុកស្រីសន្ធរ, ស្រុក​ស្ទឹង​ត្រង់, ស្រុកត្បូងឃ្មុំ និងក្រុងសួង។ «ខេត្តត្បួងឃ្មុំ» ថ្មីដែលបានកាត់ចេញពីខេត្តកំពង់ចាមរួមមានក្រុងសួង, ស្រុក​ត្បូង​ឃ្មុំ, ស្រុកអូររំាងឪ, ស្រុកមេមត់, ស្រុកក្រូចឆ្មារ, ស្រុកពញាក្រែក និងស្រុកតំបែរ។

សូមបន្ថែមថាក្នុងឆ្នាំ២០១៣ រដ្ឋាភិបាលបានបំបែកដែនដីរដ្ឋបាលរបស់ខ្លួន ជាពីរលើកហើយ ដោយបានបញ្ជាក់​នូវ​ជំហរ និងបំណងរបស់ខ្លួនថា ដើម្បីភាពងាយស្រួលក្នុងការគ្រប់គ្រង។ ពិសេសការគ្រប់គ្រងទៅលើរដ្ឋបាល និង​សន្តិសុខ។ កាលពីលើកទីមួយរាជរដ្ឋាភិបាលបានបង្កើតខណ្ឌចំនួនបីថ្មីក្នុងរាជធានីភ្នំពេញមានដូចជាខណ្ឌច្បារអំពៅ បំបែកចេញពីខណ្ឌមានជ័យ, ខណ្ឌជ្រោយចង្វារបំបែកចេញពីខណ្ឌទួលគោកនិងខណ្ឌប្ញស្សីកែវ, និងខណ្ឌ​ព្រែក​ព្នៅ​បំបែកចេញពីខណ្ឌសែន សុខ និងខណ្ឌប្ញស្សីកែវ។

ទោះយ៉ាងណាក៏ដោយការបំបែកនូវដែលដីរដ្ឋបាល ជាបន្តបន្ទាប់របស់រដ្ឋាភិបាលថ្មីនេះ ត្រូវបានរិះគន់ដោយ​ប្រជា​ពលរដ្ឋមួយចំនួន ពិសេសអ្នកដែលកំពុងរងនូវការរំលោភបំពានចាងដីធ្លី ថា ជាការងាយក្នុងការគ្រប់គ្រងនោះ (វា)គ្រាន់តែជាលេសដើម្បីនិយាយឲ្យសមតែប៉ុណ្ណោះ ជាក់ស្តែងជាការចែកអំណាចគ្នានៃគណបក្សប្រជាជនកម្ពុជា ក្រោយការបោះឆ្នោតនេះទៅវិញទេ។

អ៊ុំប្រុសម្នាក់ក្នុងលក្ខខ័ណ្ឌសុំមិនបញ្ចេញឈ្មោះ អតីតមន្រ្តីរាជការចូលនិវត្ត​ បានប្រាប់ទស្សនាវដ្តីមនោរម្យ.អាំងហ្វូថា ក្នុងពេលឃោសនាបោះឆ្នោតម្តងៗ សកម្មជននៃគណបក្សប្រជាជន​កម្ពុជា បានចំណាយប្រាក់មិនតិចទេ ក្នុងការ​រៀបចំនូវការឃោសនានោះ។ ដូច្នេះក្រោយការឈ្នះឆ្នោត ពួកគេត្រូវ​តែ​មាន​តួនាទីក្នុងស្ថាប័ន ក្រសួង ឬតំបន់​ណា​មួយសម្រាប់គ្រប់គ្រង ជាជំនួសនឹងការចំណាយប្រាក់ក្នុង​ការឃោសនា​នោះ។

អ៊ុំប្រុសរូបនេះបានបញ្ជាក់បន្ថែមថា «បើមិនបែងចែក ឬឲ្យតួនាទីទៅអ្នកទាំងនោះទេ អាចនឹងមានជំលោះផ្ទៃក្នុង។ ពេលបោះឆ្នោតម្តងៗអ្នកធំៗមិនជាចំណាយប្រាក់ប៉ុន្មានទេ តែអ្នកតូចៗល្មមទើបខំខ្នះខ្នែងចេញមុខចំណាយ ក៏​ព្រោះ​តែចង់បានតួនាទីណាមួយដែរ។ (…) ពួកគេតែងធ្វើឡើងជាប្រព័ន្ធ ទៅតាមមន្រ្តីថ្នាក់ធំដែលពួកគេអាចទុកចិត្តបាន និងក៏ជាខ្សែរយៈមួយមាំមួនដែរ។ គេមិនចេះតែធ្វើ និងចំណាយមិនមានប្រយោជន៍នោះទេ។ (…) ក្នុងនោះក៏មានអ្នក​ជំនួញធំៗដែរ ដែលមានឈ្នោះក្នុងការចំណាយប្រាក់ ហើយបានមកត្រឡប់វិញនូវការរកស៊ីដោយមិនចាំបាច់បង់ពន្ធ ឬអាចធ្វើអ្វីទៅតាមចិត្តដោយមិនខ្លាចច្បាប់ និងក៏គ្មានវិធានការណាមួយលើអ្នកទាំងនោះដែរ។ (…) ឧទាហរណ៍ដូច​ករណីបឹងកក់ បូរីកីឡា ដីក្រហម និងតំបន់ផ្សេងៗនៅស្ទើរទូទាំងប្រទេសកម្ពុជាជាដើម៕»

--------------------------------------------------
ដោយ អ៊ុម វ៉ារី (ទំនាក់ទំនង៖ [email protected]) - ភ្នំពេញថ្ងៃទី២៥ ខែមករា ឆ្នាំ២០១៤