តាមមើលទៅ មិនមែនជាការច្រឡំទេ ហើយក៏មិនមែន ជាកំហុសអក្ខរាវិរុទ្ធនោះដែរ ព្រោះពាក្យ​«ប្រធានាធិបតី»​នេះ ត្រូវបានអត្ថបទនោះ សរសេរឡើងវិញ ចំនួនដល់ទៅ៣ដង ដោយរាប់ទាំង​ចំណងជើង​អត្ថបទផង។ អត្ថបទរបស់គេហទំព័រ វិទ្យុបារាំងអន្តរជាតិ ជាភាសាបារាំងនោះ ដាក់ចំណងជើងដូច្នេះថា «អូស្ត្រាលី៖ បាតុកម្មប្រឆាំងដំណើរទស្សនកិច្ច របស់ប្រធានាធិបតីកម្ពុជា»។

អត្ថបទនោះ មិនបានបញ្ជាក់ ពីឈ្មោះអ្នកសរសេរទេ ដោយគ្រាន់តែដាក់ថា សរសេរដោយ «RFI» នៅផ្នែកខាងលើ នៃអត្ថបទប៉ុណ្ណោះ។ ក្នុងតួអត្ថបទ អ្នកសរសេរ បានហៅលោក ហ៊ុន សែន ជាប្រធានាធិបតី ជាលើកទីពីរថា៖ «នៅអូស្ត្រាលី ការបើកជំនួបកំពូលអាស៊ាន ត្រូវបានកត់សម្គាល់ នៅថ្ងៃសុក្រទី១៦ ខែមីនានេះ ដោយបាតុកម្ម របស់សហគមន៍ខ្មែរ នៅទីនោះ។ មនុស្សច្រើនរយនាក់ បានប្រមូលគ្នីគ្នា ដើម្បីបរិហារពីដំណើរទស្សនកិច្ច របស់ប្រធានាធិបតីកម្ពុជា លោក ហ៊ុន សែន - ការគម្រាមរបស់លោក ប្រឆាំងនឹងពលរដ្ឋដើមកំណើតខ្មែរ និងបរិហារពីជំហាន​ទៅរកភាពផ្ដាច់ការ នៃរបបដឹកនាំ នៅពេលការបោះឆ្នោតជាតិ ជិតឈានមកដល់ នៅខែកក្កដាខាងមុខ។»។

@RFI ចេញផ្សាយអត្ថបទ ពីបាតុកម្មខ្មែរនៅអូស្ត្រាលី ដោយហៅលោក ហ៊ុន សែន ថាជា«ប្រធានាធិបតី» @RFI_Khmer #ម៉េចក៏វេទនាម្លេះ pic.twitter.com/dfAu5hi1ia

— MONOROOM.info (@monoroominfo) 17 mars 2018

ខណៈការហៅ ជាលើកទីបី គឺនៅត្រង់ការដកស្រង់សំដី របស់លោក ហ៊ុន សែន ដែលថ្លែងការពីមួយខែមុន គម្រាម«តាមវាយដល់ផ្ទះ» ទៅលើនរណាក៏ដោយ ដែលហ៊ានធ្វើបាតុកម្ម និងដុតរូបទីងមោង ដែលតំណាងឲ្យរូបលោកនោះ។ អត្ថបទរបស់វិទ្យុបារាំងអន្តរជាតិ បានសរសេរបន្តថា៖ «ពាក្យសំដីប៉ុណ្ណេះ មិនបានបំបាក់ទឹកចិត្ត ពលរដ្ឋ​ខ្មែរច្រើនរយនាក់ មិនឲ្យធ្វើបាតុកម្ម ក្នុងថ្ងៃសុក្រនេះ ដើម្បីបរិហារពីដំណើរទស្សនកិច្ច របស់ប្រធានាធិបតីកម្ពុជា នៅលើកោះអូស្ត្រាលីនោះទេ»។

ឱ! អ្នកសារព័ត៌មានអើយ មិនថាខ្មែរ ឬបារាំងទេ ហេតុម្ដេចឡើយ ក៏វេទនាម្លេះ? ហើយនេះ វាត្រឹមតែជាឋានៈ របស់មនុស្សម្នាក់សោះ... ព្រោះបើគេ​ធ្វើការរុករក​ស្រាវជ្រាវ តែមួយវិនាទី នៅលើ «Google» ឬ «Bing» គេនឹងដឹងភ្លាម ថាលោក ហ៊ុន សែន ជា«នាយករដ្ឋមន្ត្រី» ដែលអ្នកសារព័ត៌មាន​«ច្បាស់លាស់»​ខ្លះ ដាក់នាមបន្ថែមឲ្យថា ជានាយករដ្ឋមន្ត្រី​«ដ៏ចាស់វស្សា» «មិនរង្គើពីអំណាច» «ចាក់ឫស» ឬ​«ដែលកាន់អំណាច​យូរជាងគេ នៅអាស៊ី»​​នោះឯង៕