«តើរដ្ឋធម្មនុញ្ញសំខាន់ ច្បាប់ទាំងនោះសំខាន់ ឬជាការអនុវត្តទៅលើសារាចរណ៍ណែនាំបន្តិចបន្តួច របស់សាលា​រាជធានីភ្នំពេញ ឬអាជ្ញាធរផ្សេងៗសំខាន់ជាង?» នេះជាការលើកឡើងរបស់លោក ស ម៉ូរ៉ា ដែលលោកមើលឃើញ ពីការអនុវត្តន៏យ៉ាងខ្ជាប់ខ្ជួន របស់សន្តិសុខខ័ណ្ឌចំពោះសារាចរណ៍របស់ក្រសួងមហាផ្ទៃ ជាងច្បាប់ដែល​ចែងក្នុង​រដ្ឋធម្មនុញ្ញ។

លោក ស ម៉ូរ៉ា ប្រធានសហព័ន្ធសហជីព កម្មករ​ចំណី​អាហារ និងសេវាកម្មកម្ពុជា។ (រូបថត MONOROOM.info/ O.Vary)

ច្បាប់ - បន្ទាប់ពីផ្ទុះហិង្សាកាលពីថ្ងៃទី២និងទី៣មករា ឆ្នាំ២០១៤រួចមក ក្រសួងមហាផ្ទៃបានចេញ​សារាចរណ៍​ណែនាំ​មួយ ហាមមិនអោយមានការជួបជុំលើសពី១០នាក់ឡើងទៅ ដើម្បីរក្សាសភាពការណ៍សន្តិសុខ សណ្តាប់ធ្នាប់​សាធារណៈអោយ មានភាពប្រក្រតី។ ដែលចាប់តាំងពីពេលនោះមក រាល់ការជួបជុំតវ៉ាតែងតែមានការបង្រ្កាប និង​ការចាប់ខ្លួនពីសមត្ថកិច្ចរបស់ខ័ណ្ឌនៅក្នុងរាជធានីភ្នំពេញ។ យ៉ាងណាមិញកាលពីថ្ងៃទី១៩ ខែមករា ឆ្នាំ២០១៤ ក្នុង​ខណៈពេលដែលសមាគមប្រជាធិបតេយ្យសេដ្ឋកិច្ចក្រៅប្រព័ន្ធ ធ្វើពិធីបួងសួងនៅមុខព្រះអង្គដងកើនោះ ក៏ត្រូវ​បាន​អាជ្ញាធរធ្វើការបណ្តេញចេញ និងចាប់ខ្លួនដែរ។

ករណីនៃការចាប់ខ្លួននេះ បានធ្វើជាបន្តបន្ទាប់ទៅលើស្រ្តីអ្នកតវ៉ានៅតំបន់បឹងកក់ដូចគ្នាដែរ កាលពីថ្ងៃទី០៦ និង​ថ្ងៃ​ទី២១ មករាឆ្នាំកន្លងទៅ ។ ចំពោះការអនុវត្តន៍នៃសារាចរណ៍នេះ លោក ស ម៉ូរ៉ា ប្រធានសហព័ន្ធសហជីព កម្មករ​ចំណី​អាហារ និងសេវាកម្មកម្ពុជា បានសង្កេតឃើញថា «កន្លងឃើញមានខ័ណ្ឌដូនពេញ ដែលជាខ័ណ្ឌមួយ​ចូលចិត្ត​ប្រើនូវអំពើហិង្សា និងការរិតត្បិតនូវសេរីភាព ក្នុងការបញ្ចេញមតិរបស់ពលរដ្ឋ។ ជាក់ស្តែងដូចកាលពីថ្ងៃ​អាទិត្យ​ពេលដែលយើងបានព្យាយាមជួបជុំគ្នានៅមុខវត្តឧណ្ណាលោម ដែលស្ថិតនៅខ័ណ្ឌនេះ ឃើញមានសុទ្ធតែ​សន្តិសុខ​ពាក់អាវខ្មៅ ហើយចុងក្រោយសូម្បីតែអុជធូប នៅមុខព្រះអង្គដងកើក៏គេមិនអោយធ្វើអោយដែរ។»

ការហាមឃាត់ការប្រមូលផ្តុំ របស់ប្រជាពលរដ្ឋដោយសន្តិសុខខ័ណ្ឌ កាលពីពេលកន្លងមកជាការអនុវត្តន៍​ត្រឹមត្រូវ​ដែរឬទេ? ពាក់ព័ន្ធបញ្ហានេះដែរ ប្រធានសហព័ន្ធសហជីព កម្មករចំណីអាហារ និងសេវាកម្មកម្ពុជា​រូបនេះបាន​បញ្ជាក់​ថា «អ្វីដែលសំខាន់ បើយើងយករដ្ឋធម្មនុញ្ញ កតិកាសញ្ញាអន្តរជាតិ និងច្បាប់អន្តរជាតិមួយចំនួនយកមកពិនិត្យមើល ដែលរដ្ឋាភិបាលអោយសច្ចាប័ននោះ ហើយគាត់ចេះវាយតម្លៃមើលនោះថា តើរដ្ឋធម្មនុញ្ញសំខាន់ ច្បាប់ទាំង​នោះ​សំខាន់ ឬជាការអនុវត្តទៅលើ សារាចរណ៍ណែនាំបន្តិចបន្តួច របស់សាលារាជធានីភ្នំពេញ ឬអាជ្ញាធរផ្សេងៗ​សំខាន់​ជាង?»

បើទោះបីជាមានការអនុវត្តន៍យ៉ាងខ្ជាប់ខ្ជួន របស់សន្តិសុខសាលាខ័ណ្ឌ ទាំងអស់របស់សាលារាជធានីភ្នំពេញ ជា​ពិសេសខ័ណ្ឌដូនពេញយ៉ាងណាក៏ដោយ លោកយល់ថាការហាមឃាត់មិនអោយប្រជាពលរដ្ឋ មកជួបជុំគ្នា នៅ​កម្ពុជាឥលូវនេះ វាមិនមែនជាដំណោះស្រាយនោះទេ រដ្ឋាភិបាលគួរមើលអ្វីជាកង្វល់របស់ប្រជាពលរដ្ឋពិតប្រាកដ ហើយព្យាយាមដោះស្រាយវា នោះទើបជាដំណោះស្រាយពិតប្រាកដ។

គួរបញ្ជាក់ថា ច្បាប់ស្តីពីបាតុកម្មដោយសន្តិវិធី មាត្រា៩ បកស្រាយថា អាជ្ញាធរដែនដីរាជធានី ឬខេត្តមានសមត្ថកិច្ច​ត្រូវឆ្លើយតបជាវិជ្ជមាន ចំពោះលិខិតជូនដំណឹងជាលាលក្ខណ៍អក្សរ លើកលែងតែ ការធ្វើចំថ្ងៃបុណ្យជាតិសំខាន់ៗ និងមានព័ត៌មានច្បាស់ថា ការធ្វើបាតុកម្មនេះនឹងអាចបង្កគ្រោះថ្នាក់ណាមួយ ឬនឹងអាចប៉ះពាល់ធ្ងន់ធ្ងរដល់សន្តិសុខ សុវត្ថិភាព និងសណ្តាប់ធ្នាប់សាធារណៈ។ មាត្រា១៧ នៃច្បាប់ដដែលនេះបានចែងថា អាជ្ញាធរមានសមត្ថកិច្ច ត្រូវ​បានចាត់វិធានការការពារដល់ក្បួនបាតុកម្មដោយសន្តិវិធី ដើម្បីធានារក្សាសន្តិសុខអោយបានល្អប្រសើរ ហើយ​មិន​ត្រូវជ្រៀតជ្រែកដល់ការប្រព្រឹត្តិទៅ នៃការធ្វើបាតុកម្មដោយសន្តិវិធីនោះឡើយ៕

-----------------------------------------------
ដោយ៖ ក. ចាន់នីតា (ទំនាក់ទំនង៖ [email protected]) - ភ្នំពេញ ថ្ងៃទី ២៥ ខែមករា ឆ្នាំ២០១៤