មេដឹកនាំសមាគម និងសហជីពដ៏ល្បីឈ្មោះ លោក រ៉ុង ឈុន បានប្រកាសថា នៅថ្ងៃទី២៦ មករា ឆ្នាំ២០១៤ខាង​មុខនេះ លោកនិងធ្វើបាតុកម្មជាថ្មី ដើម្បី​អោយមានការដោះលែងអ្នកដែលបានឃាត់ខ្លួនទាំង២៣នាក់ និងទាមទារ​តម្លើងប្រាក់ខែគោល១៦០ដុល្លារ។

លោក រ៉ុង ឈុន ប្រធានសហភាពសហជីបកម្ពុជា និងជាប្រធានសមាគមគ្រូបង្រៀនឯករាជ្យ។ ( រូបថត MONOROOM.info/ O.vary)

បាតុកម្ម - លោក រ៉ុង ឈុន ប្រធានសហភាពសហជីពកម្ពុជា និងជាប្រធានសមាគមគ្រូបង្រៀនឯករាជ្យ បានប្រកាស​នៅថ្ងៃទី២២ ខែមករា ឆ្នាំ២០១៤ នេះថានៅថ្ងៃទី២៦ មករាខាងមុខនេះ លោក​នឹងដឹកនាំធ្វើបាតុកម្ម​ជាថ្មី នៅទីលាន​ប្រជាធិបតេយ្យ ដើម្បីទាមទារឲ្យមានការដោះលែង អ្នកដែលត្រូវបានឃាត់ខ្លួនទាំង២៣នាក់ និងទាមទារឲ្យមានការ​តម្លើងប្រាក់ខែគោល ១៦០ដុល្លារ។

ការប្រកាសនេះធ្វើឡើង ក្នុងពេលលោកចូលរួមកម្មវិធីរលឹកខួបដប់ឆ្នាំ របស់សពលោក ជា វិជ្ជា អតីតប្រធាន​សហជីព​សេរីកម្មករនៃព្រះរាជាណាចក្រកម្ពុជា ជិតវិមានឯករាជ្យ នៅមុខរូបសំណាក់អតីតប្រធានសហជីព​សេរី​កម្មករ​នៃព្រះរាជាណាចក្រកម្ពុជារូបនេះ។

ថ្លែងក្នុងឱកាសនោះដែរ លោក រ៉ុង ឈុនបានធានាអះអាងនៅមុខរូបសំណាក់ លោក ជា វិជ្ជា ថា «យើងជាមិត្តរួម​អាជីព រួមទាំងកម្មករ កម្មការនីទាំងអស់ នៅតែចងចាំ វីរភាពរបស់លោកជានិច្ច ហើយយើងនឹងបន្តកាងារនេះ យើង​នូវតែមានសង្ឃឹមមានសង្ឃឹមជានិច្ច។ ខ្ញុំ រ៉ុង ឈុន នឹងដើរតួដឹកនាំស្វែងរក ថាធ្វើម៉េចដើម្បីសម្រេចគោលបំណង​របស់លោក។»

សំរាប់ការធ្វើបាតុកម្ម ថ្ងៃ២៦ កមរា ខាងមុខនេះដែរ លោករ៉ុង ឈុន បានអះអាងថា «យើងបានជួនដំណឹងទៅ​សាលារាជធានីភ្នំពេញរួចរាល់ហើយ ថានឹងធ្វើនៅទីលានប្រជាធិបតេយ្យ»។ តែមកដល់ពេលនេះ បើតាមការបញ្ជាក់​របស់លោក​ មិនទាន់ឃើញមានការឆ្លើយតបថាយ៉ាងម៉េចពីសាលាក្រុងនោះទេ។

ក្នុងកិច្ចសម្ភាសន៍មួយជាមួយទស្សនាវដ្ដីមនោរម្យព័ងអាំងហ្វូលោក រ៉ុង ឈុន បានអោយដឹងថាការធ្វើ​បាតុកម្ម​ថ្ងៃទី២៦ មករានេះ ក្នុងគោលបំណងទាមទារ អោយដោះលែងអ្នកដែលបានចាប់ខ្លួនកាលពីថ្ងៃទី២ និងទី៣ នៅ​តំបន់សេដ្ឋកិច្ចពិសេសភ្នំពេញ និងសួនកាណាឌីយ៉ានៅផ្លូវវ៉េងស្រេង និងទាមទារប្រាក់ខែគោល១៦០ដុល្លា​ សំរាប់​កម្មករនៅកម្ពុជា។

តាមគេហទំព័រក្នុងស្រុកមួយបានអះអាងថា ថ្ងៃទី៥ កុម្ភៈ ឆ្នាំ២០១៤ខាងមុខនេះ ក្រសួងការងារគ្រោង​ជួបប្រជុំ​ថ្នាក់​ជាតិ ដែលមានការចូលរួមពីភាគីពាក់ព័ន្ធ ស្តីពីការតម្លើងប្រាក់ឈ្នួលដល់កម្មករកម្ពុជា។ ពាក់ព័ន្ធនិឹងបញ្ហានេះដែរ ប្រធាន​សហភាពសហជីបកម្ពុជា បានសម្តែងនូវការអបអរសាទរចំពោះគម្រោងចរចារនេះថា «យើងស្វាគមន៍​ទៅ​លើការចរចារ ចំពោះប្រាក់ឈ្នួលហ្នឹង ពីព្រោះយើងកំពុងរងចាំនូវជំនួបចរចារនេះ»។

ថ្លែងទៅកាន់អ្នកចូលរួមប្រហែលមួយពាន់នាក់ ដែលបានមកគោរពវិញ្ញាណក្ខ័ណ្ឌសពលោក ជា វិជ្ជា ប្រធាន​សមាគមគ្រូបង្រៀនឯករាជ្យរូបនេះ បានប្រកាសថា «សូមបងប្អូនកុំអស់សង្ឃឹម យើងជិតបានសម្រចហើយ ឃើញ​ថាទាំងពិភពលោក ទាំងអ្នកបញ្ជាទិញ និងប្រទេសម្ចាស់ជំនួយ បានយកចិត្តទុកដាក់មកលើកម្ពុជាយើង ទាក់ទង​ជាមួយនឹងការរំលោភបាញ់សំលាប់មកលើកម្មក កម្មការិនី។» ការប្រកាសនេះ បានាបង្កឲ្យមានការទះដៃស្វាគម ពីក្រុមអ្នកចូលរួម ដែលទំនងជាជាការលើកទឹកមួយដល់កម្មករ កម្មការិនីក្នុងការមកចូលរួម​ធ្វើបាតុកម្មជាមួយ​លោក។

គួរម្លឹកថា កាលថ្ងៃទី១៤ ខែកមរា ឆ្នាំ២០១៤កន្លងទៅនេះ ប្រធានសហភាពសហជីពកម្ពុជារូបនេះ ធ្លាប់ត្រូវបាន​អយ្យការអមសាលាដំបូងរាជធានីភ្នំពេញ កោះហៅទៅបំភ្លឺរួចម្តងមកហើយ ពីបទពីបទញុះញង់ឲ្យប្រព្រឹត្តបទឧក្រិដ្ឋ ឬអំពើបង្កឲ្យមានភាពវឹកវរធ្ងន់ធ្ងរដល់សន្តិសុខសង្គម ខណៈពេលដែលលោកបានដឹកនាំកម្មករ ធ្វើបាតុកម្ម-កូដកម្ម​កន្លងមក។ តែអំពើហិង្សាបានផ្ទុះឡើងរវាងកម្មករ និងកងកម្លាំងរបស់អាជ្ញាធរ  ដែលបណ្តាលអោយយ៉ាងហោច​ណាស់​មនុស្ស៥នាក់បានបាត់បងជីវិត ជាង៤០នាក់រងរបួសធ្ងន់ និងស្រាល និង២៣នាក់ទៀតត្រូវបានចាប់ខ្លួន៕

-----------------------------------------------
ដោយ ក. ចាន់នីតា (ទំនាក់ទំនង៖ [email protected]) - ភ្នំពេញ ថ្ងៃទី ២២ ខែមករា ឆ្នាំ២០១៤