ជាលទ្ធផលដែលកម្មករជាង១០០នាក់ មកពីរោងចក្រកាលីស្តូ និងរោងចក្រមូន រងចាំតំណាងរបស់ខ្លួន​ចូល​ចរចា​ជាមួយក្រសួងការងារ លើការទាមទារចំនុចមួយចំនួន តាំងពីម៉ោង៩ព្រឹក ដល់ម៉ោង១២ និង៣៥នាទីនេះ គឺមិន​ទទួល​បានលទ្ធផលអ្វីទាំងអស់។

ក្រុមកម្មការិនីដែលធ្វើកូដកម្ម។ (រូបថត MONOROOM.info/ Nita)

វិបត្តិការងារ - ការចរចាគ្នាជាមួយក្រសួងការងារ ប្រើពេលអស់មួយព្រឹក នៅថ្ងៃទី២០ ខែមិនា នេះ មិនទទួលបាន​លទ្ធផលនិងការព្រមព្រៀងណាមួយទេ ជុំវិញសំណើរទាមទារឲ្យរោងចក្រទទួលយកថ្នាក់ដឹកនាំសហជីព​បីនាក់​ចូល​ធ្វើការវិញ និង១៧ចំនុចផ្សេងទៀត របស់កម្មករនៅរោងចក្រកាលីស្តូ និងរោងចក្រមូន ដែលបានធ្វើ​កូដកម្ម​ទាម​ទារ​អស់រយៈពេលជាងកន្លះខែហើយ។ លោកថោង សឿន អ្នករដ្ឋបាលនិងជាអ្នកសម្រប​សម្រួលនៃ​សហជីព​សហព័ន្ធ​ស្មារតីកម្មករ បានអោយដឹងដែរថា នៅថ្ងៃសុក្រនេះ ខាងក្រសួងការងារ គេនឹងហៅភាគីរោងចក្រ អោយមក​ផ្តល់​ព័ត៌មាន ពីបញ្ហាដែលពាក់ព័ន្ធនេះ។ បន្ទាប់មកទៀតខាងក្រសួង និងខាងនាយកដ្ឋានដោះស្រាយវិវាទការងារ នឹង​ធ្វើសេចក្តីសម្រចមតិរួម ថាតើនឹងដោះស្រាយយ៉ាងម៉េចនៅពេលខាងមុខ។

បើតាមការអះអាងរបស់តំណាងកម្មកររូបនេះ ចំនុចដែលជាការទាមទារសំខាន់បំផុត គឺទាមទារអោយថ្នាក់ដឹកនាំ​សហជីព ដែលក្រុមហ៊ុនបានបញ្ឈប់កាលពីថ្ងៃទី២៨ កុម្ភៈ អោយគាត់មកចូលធ្វើការវិញធម្មតា និងអោយ​ក្រុមហ៊ុន​មិនកាត់លុយ អំឡុងពេលកម្មករធ្វើកូដកម្ម។ លោកបន្តថា «អោយតែក្រុមហ៊ុនអោយថ្នាក់ដឹកនាំសហជីព បានចូល​ធ្វើការវិញ រឿងផ្សេងៗទៀត យើងនឹងអាចដោះស្រាយបាន»។

រីឯមូលហេតុដែលថៅកែរោងចក្រ បញ្ឈប់ថ្នាក់ដឹកនាំសហជីពទាំងបីនាក់នោះ ត្រូវបានលោក ចាន់ ភារម្យ មន្រ្តី​សម្របសម្រួលនៃសហជីពដដែល ប្រាប់ទស្សនាវដ្ដីមនោរម្យ.អាំងហ្វូ ដឹងថា ដោយសារតែគាត់បានឈរឈ្មោះ ជាថ្នាក់ដឹកនាំសហជីព។  លោក ចាន់ ភារម្យ បានថ្លែងឡើងថា ក្រុមហ៊ុនបានរើសអើងសហជីព ហើយក្រុមហ៊ុន​បានយកលេះថា ដល់កិច្ចសន្យាត្រូវបញ្ឈប់អ្នកទាំងបីនាក់ហ្នឹង។

តំណាងសហជីពរូបនេះ បានបន្ថែមទៀតថា «យើងជូនដំណឹង មុនពេលដែលគាត់បញ្ឈប់ តែគាត់យកលេស ហើយ​គាត់ថាគាត់មិនបានទទួលដំណឹងពីខាងយើង។ យើងបានចរចាទាំងជាមួយក្រសួង ទាំងអភិបាលខ័ណ្ឌ តែមិនបាន​លទ្ធផលអីទាំងអស់ គេឆ្លើយតបថា គេមិនទទួលតំណាងយើងចូលធ្វើការ។»

ទស្សនាវដ្ដីមនោរម្យ.អាំងហ្វូ មិនអាចទាក់ទង សុំការបំភ្លឺពីក្រសួងការងារ និងពីភាគីក្រុមហ៊ុនថៅកែរោងចក្របានទេ នៅថ្ងៃទី២០ខែមិនា ឆ្នាំ២០១៤នេះ។

ចំណែកឯ១៧ចំនុចផ្សេងទៀត ដែលកម្មករទាមទារដែរនោះមានដូចជា សូមអោយក្រុមហ៊ុនផ្តល់ប្រាក់រង្វាន់​ទៀង​ទាត់១៥ដុល្លាក្នុងមួយខែ ផ្តល់មធ្យាបាយធ្វើដំណើរ និងស្នាក់នៅ១០ដុល្លាក្នុងមួយខែ ផ្តល់លុយសំរាប់អាហារថ្ងៃត្រង់ ៤០០០រៀល ក្នងមួយថ្ងៃ នៅពេលដែរកម្មករសុំច្បាប់ឈប់សម្រាក ដោយមានជំងឺមានលិខិបញ្ជាក់ត្រឹមត្រូវ ក្រុមហ៊ុន​មិនត្រូវកាត់ប្រាក់ឈ្នួល អនុវត្តការសុំច្បាប់របស់កម្មករ អោយកាន់តែមានភាពងាយស្រួល អនុញ្ញាតអោយស្រ្តី​មាន​ផ្ទៃពោះចេញមុន១៥នាទី និងលក្ខខណ្ឌមួយចំនួនទៀត៕

-----------------------------------------------
ដោយ ក. ចាន់នីតា (ទំនាក់ទំនង៖ [email protected]) -ភ្នំពេញ ថ្ងៃទី ២០ មីនា ២០១៤