បើទោះបីជាក្នុងឆ្នាំ២០១៣ កំណើនសេដ្ឋកិច្ចបានកើនឡើង៧%ក៏ពិតមែន តែបើនយោបាយកម្ពុជានៅតែបន្តជាប់គាំង ហើយមិនត្រូវបានដោះស្រាយនោះ តើកម្ពុជាអាចរក្សាកំណើននេះបានដែរឬទេ? សូមតាមដានកិច្ចសម្ភាសន៍​ខាង​ក្រោម ជាមួយសាស្ត្រាចារ្យជំនាញខាងសេដ្ឋកិច្ចមួយរូប និងការបកស្រាយរបស់អ្នកវិភាគឯករាជ្យ លោក សុខ ទូច។

កម្មការិនីរោងចក្រកាត់ដេរមួយកន្លែង ក្បែររាជធានីភ្នំពេញ។ (រូបថត melty.fr)

សម្ភាសន៏ - កម្ពុជាបានប្រកាសថាកំណើនសេដ្ឋកិច្ច ក្នុងឆ្នាំ២០១៣បានកើនឡើង៧% ដែលនេះជាជោគជ័យមួយ សំរាប់​ប្រទេស​កំពុងអភិវឌ្ឍន៏មួយនេះ ក្នុងទាក់ទាញនិយោជក អោយចាប់អារម្ភណ៏មកបោះទុនវិនិយោគនៅកម្ពុជា។ រយៈកាល​ចុងក្រោយមកនេះ ចាប់តាំងពីក្រោយពេលបោះឆ្នោតរួចមក កម្ពុជាបានជួបនៅបញ្ហាជាច្រើន ដូចជា​ការ​ធ្វើបាតុកម្មរបស់គណបក្សសង្រ្គោះជាតិ និងការធ្វើកូដកម្មរបស់កម្មករក្នុងវិស័យវាយណភ័ណ្ឌកាត់ដេរ ហើយបាន​បង្កឲ្យមានការព្រួយបារម្ភជាទូទៅមួយ ស្ដីពីការធ្លាក់ចុះ នូវកំណើនសេដ្ឋកិច្ច ដែលប្រទេសដ៏តូចមួយនេះ ត្រូវការ​ឲ្យ​ខាងតែបាន នៅមុនសមាហរណកម្មអាស៊ានឆ្នាំ២០១៥ខាងមុខ។

លោក យឹម ពុទ្ធា សាស្រ្តាចារ្យ សេដ្ឋកិច្ចនៃសាកលវិទ្យាល័យភូមិន្ទនិតិសាស្រ្ត និងវិទ្យាសាស្រ្តសេដ្ឋកិច្ច បានយល់​ស្របនឹងសេចក្ដីបារម្ភណ៍ខាងលើ ដោយលោកបានអោយ​ទស្សនាវដ្ដីមនោរម្យព័ងអាំងហ្វូដឹងថា «បញ្ហាការធ្វើ​បាតុកម្ម​កន្លងមក វាអាចនឹងមានផលប៉ះពាល់ដល់​ចរន្តសេដ្ឋកិច្ច»។

លោកបានពន្យល់បន្ថែមទៀមថា បើតាមការវិភាគតាមគោលការណ៏ម៉ាក្រូសេដ្ឋកិច្ច ឃើញថា​ឧស្សាហកម្ម​វាយណភ័ណ្ឌកាត់ដេរ សំលៀកបំលៀកបំពាក់ វាជាចំណែកមួយនៃកំណើនសេដ្ឋកិច្ច។ ដែលកន្លងមកនេះ វាជារដូវ​កាល ដែលអ្នកបញ្ជាទិញត្រូវការទំនិញច្រើននៅលើទីផ្សារ ហើយវារឿងអកុសលមួយ ដែលកម្ពុជាជួបបញ្ហាបែបនេះ ដែលធ្វើអោយកម្ពុជាមិនអាចបំពេញតម្រូវការ របស់អ្នកបញ្ជាទិញបាន ជាងនេះនេះទៅទៀត វានឹងអាច​មានផល​ប៉ះពាល់ដល់អ្នកវិនិយោគ ដែលមករកទទួលទាននៅកម្ពុជា។

«យើងឃើញថាវិស័យសំខាន់ៗមួយចំនួន ដែលបានដើរតួនាទីចំបង សម្រាប់ជម្រុញកំណើនសេដ្ឋកិច្ចកម្ពុជា ក្នុង​នោះ​រួមមាន វិស័យកសិកម្ម វិស័យទេសចរណ៍ វិស័យសំណង់ វិស័យកាត់ដេរ និងវិស័យរួមផ្សំមួយចំនួនទៀត។»

ហើយថ្មីៗបាតុកម្មរបស់កម្មកររោងចក្រ ក្នុងការទាមទារប្រាក់ខែ១៦០ដុល្លា បានធ្វើឡើងស្ទើរពេញផ្ទៃប្រទេស។ បើ​ទោះបីជាកម្មករបានចូលធ្វើការវិញ ស្ទើតែ១០០%ក៏ដោយ នៅតែគ្មានសញ្ញាណណាមួយដែលបញ្ជាក់ថា ពួកគេនឹង​បញ្ឈប់ការធ្វើកូដកម្ម-បាតុកម្មនេះឡើយ ប្រសិនបើគ្មានដំណោះស្រាយលើបញ្ហាប្រាក់ខែ ដែលអាចធ្វើអោយពួក​គេ​រស់នៅដោយសមរម្យបាន។ ពាក់ពន្ធនឹងបញ្ហានេះដែរ សាស្រ្តាចារ្យជំនាញសេដ្ឋកិច្ចរូបនេះ ក៏បានលើកជាក្តីព្រួយ​បារម្ភណ៍​ដែរថា «ប្រសិនបើស្ថានការនេះនៅតែបន្តទៅទៀត វានឹងមានផលប៉ះពាល់ ដល់កំណើនសេដ្ឋកិច្ច​ដែល​យើងរំពឹងទុក៧%នេះ។ វានឹងមានការធ្លាក់ចុះ»។

ទាក់ទិននឹងបញ្ហានេះ ក្នុងកិច្ចសម្ភាសមួយជាមួយទស្សនាវដ្ដីមនោរម្យព័ងអាំងហ្វូ ក្នុងថ្ងៃនេះដែរ លោកបណ្ឌិត សុខ ទូច សាកលវិទ្យាធិការនៃសាកលវិទ្យាល័យខេមរៈ និងជាអ្នកវិភាគនយោបាយឯករាជ្យ បានអោយដឹងថា បើបញ្ហា​នយោបាយនៅកម្ពុជានៅបន្ត មិនមានដំណោះស្រាយទៀត វានឹងមានផលប៉ះពាល់យ៉ាងខ្លាំងដល់សង្គម និង​សេដ្ឋកិច្ច។ លោកបានពន្យុល់ថា «ដូចដែលយើងដឹងហើយថា វិស័យទេសចរណ៍ក៏ជាវិស័យ​ដែលជួយដល់​សេដ្ឋកិច្ច​ដែរ បើបាតុកម្មកើតមានសឹងរាល់ថ្ងៃ ភ្ញៀវទេសចរណ៍ក៏អាចនឹងថយចុះ។ ចំណែកឯរឿងវិស័យកាត់ដេរវិញ រោង​ចក្រ​ជាច្រើនបានផ្អាកផលិតជាច្រើនថ្ងៃ ដែលវាធ្វើអោយប៉ះពាល់ដល់សង្វាក់ផលិតកម្ម រាំងស្ទះដល់ការផលិត កត្តា​នេះ​ដែរ វាធ្វើអោយប៉ះពាល់ដល់សេដ្ឋកិច្ចកម្ពុជា។»

មកទល់ពេលនេះ ជម្លោះរវាងគណបក្សទាំងពីរនៅតែបន្ត និងមិនទានមានការចចារគ្នាណាមួយ សំរាប់​គណបក្ស​ជាប់ឆ្នោតទាំងពីរ។ កត្តានេះហើយវាជាផ្នែកមួយ ដែលធ្វើអោយសេដ្ឋកិច្ចកម្ពុជា នៅជាប់គាំង​មិនអាចឈានដល់​គោលដៅ ដែលរដ្ឋាភិបាលកម្ពុជា បានដាក់ចេញនូវគោលនយោបាយរបស់ខ្លួន នៅក្នុងការអភិវឌ្ឍសេដ្ឋកិច្ច​សម្រាប់​ប្រទេសកម្ពុជានោះឡើយ។ រដ្ឋាភិបាលកម្ពុជា ដែលកន្លងមកបានសន្យាថា នឹងខិតខំសម្រេចឲ្យបាន នូវកំណើន​សេដ្ឋកិច្ច ជាមធ្យម ៧ ភាគរយក្នុងមួយឆ្នាំ។

ប្រសិនបើនូវតែមាផលប៉ះពាល់បែបនេះ តើយើងត្រូវធ្វើដូចម្តេច? ចំពោះដំណោះស្រាយលើបញ្ហានេះដែរលោក យឹម ពុទ្ធា បានបញ្ជាក់ថា «រដ្ឋាភិបាលនឹងមានគោលនយោបាយជំរុញ ព្រោះនៅក្នុងគោលការណ៍​ម៉ាក្រូសេដ្ឋកិច្ច​របស់​យើង វាមិនមែនមានតែវិនិយោគ តែមួយមុខនោះទេ វានៅមានអថេរផ្សេងៗទៀត ដែលអាចធ្វើអោយ​សេដ្ឋកិច្ចកើន​ឡើង»៕

-----------------------------------------------
ដោយ ក. ចាន់នីតា (ទំនាក់ទំនង៖[email protected])-ភ្នំពេញ ថ្ងៃទី១៣ ខែធ្នូ ឆ្នាំ២០១៤