អ្នកស្រាវជ្រាវមួយក្រុម របស់ក្រុមហ៊ុនយក្សខាងបច្ចេកវិទ្យា មីក្រូសូហ្វ៍ ដែលមានការចូលរួម​ពីសកលវិទ្យាល័យ​ជា​ច្រើនផង បានធ្វើការផ្សព្វផ្សាយនូវអត្ថបទមួយ នៅសប្ដាហ៍នេះ ដែលបានរៀបរាប់យ៉ាងលំអិតអំពី ឈុតអាវក្នុង​របស់ស្ត្រី ដែលមានបំពាក់ទៅដោយប្រដាប់ប្រដា សម្រាប់វាស់ចង្វាក់បេះដូងរបស់អ្នកពាក់។ គ្រឿងបំពាក់នេះ មាន​សមត្ថភាពអាចប្រមូលទិន្នន័យ ដែលទាក់ទងនឹងដំណើរបេះដូង និងភាពអត់ធន់នៃស្បែក។

រូបអាវទ្រនាប់ជំនួស របស់ស្ត្រីគំរូមួយរូប។ (រូបថត ឯកសារ)

បច្ចេកវិទ្យា - ដោយភ្ជាប់ដំណើរការទៅនឹងកម្មវិធីពិសេសមួយ គ្រឿងបំពាក់នេះនឹងប្រកាសប្រាប់ជាដំណឹង និង​អាចជួយផ្ដល់ជាយោបល់ ទៅអ្នកប្រើប្រាស់របស់វា នៅពេលជួបនឹងស្ថានភាពតឹងតែងក្នុងអារម្មណ៍។ គោល​បំណង​សំខាន់នៃការបង្កើតថ្មីនេះ ចង់បញ្ជៀសបញ្ហាមួយចំនួន ដូចជាភាពរអៀសចិត្តដែលអាចឈានទៅមានវិបត្តិ​ជាដើម។

ជាមួយនឹងអាវទ្រនាប់ប្រភេទនេះ អ្នកពាក់នឹងមិនចាំខ្វល់នឹងរឿងតម អាហារនោះទេ តែអ្នកពាក់នឹងត្រូវបាន​ជូន​ដំណឹង ដោយកម្មវិធីពិសេសនោះ ថា«អ្នកកំពុងជួបនូវស្ថានភាពតឹងតែងហើយ» ដោយសារតែការវិភាគនៃចង្វាក់​បេះដូង ឬដំណើរឈាម។ កម្មវិធីពិសេសនោះ អាចនឹងជម្រុញឲ្យអ្នកពាក់ ធ្វើការដកដង្ហើមឲ្យវែងៗ ដើម្បីបន្ធូរ​បន្ថយ​ភាពតឹងតែង និងក្នុងករណីខ្លះ «អ្នកត្រូវធ្វើការលំហែកាយ ឲ្យបានលឿនជាទីបំផុត»។

ប្រើមិនបានយូរ ឆាប់អស់ថ្ម

បញ្ហាមួយចំនួនដែលអាវទ្រនាប់នេះ ជួបប្រទះនោះ គឺមិនមានទំហំទៅតាមតម្រូវការនៃទ្រូងមនុស្សស្រីគ្រប់គ្នានោះទេ ហើយគ្រឿងបំពាក់ត្រូវ តែធ្វើការបញ្ចូលអគ្គិសនី (សាកថ្ម) នៅវេលាបួនម៉ោងម្ដង។ តើអ្នកយល់យ៉ាងណា នៅពេលមានមនុស្សស្រីនិយាយថា «សូមរងចាំមួយភ្លែក ខ្ញុំទៅសាកថ្មឲ្យអាវទ្រនាប់ខ្ញុំសិន»? ប្រាកដជាមិនពិរោះស្ដាប់ទេ ហើយថែមទាំងគួរឲ្យខ្មាសអៀនថែមទៀត សម្រាប់​ស្ត្រី​ដែលប្រកាន់នូវអត្តចរិក តាមបែបប្រពៃណីទំនៀមទំលាប់នោះ។

អ្នកវិទ្យាសាស្ត្រទាំងនេះ កំពុងតែធ្វើគម្រោងដែលមានលក្ខណៈស្រដៀងគ្នានេះ សម្រាប់អស់លោកបុរសៗដែរ។ ប៉ុន្តែបើនិយាយពីខោស្លីបរបស់មនុស្សប្រុសវិញ វាដូចជានៅឆ្ងាយពីបេះដូងបន្ដិច ហើយបង្កការលំបាកដោយ​ការ​ស្រាវជ្រាវនោះបន្តិច ឬលើកលែងតែបុរសត្រូវពាក់អាវមួយទៀត។

រូបថតផ្ដល់ដោយមីក្រូសូហ្វ៍

កាលពីសប្ដាហ៍មុន ក្រុមហ៊ុន សូនីរបស់ជប៉ុន ក៏បានបង្ហាញពីសម្លៀកបំពាក់មួយប្រភេទ ដែលអាចឲ្យគេដឹង​ពីទី​កន្លែង នៃដំណើរដើមទងរបស់អ្នកពាក់ តាមរយៈប្រព័ន្ធរុករកកន្លែង នៃផ្កាយរណប (GPS)។ ការបង្កើតនេះ អាច​ជួយដល់ស្ត្រី អាចគេចផុតពីការរំលោភបំពាន របស់មនុស្សចិត្តរហ័សដៃហ៊ាន ដែលមានបំណងអាក្រក់មកលើនាង ដោយនាងឲ្យភ្ជាប់ប្រព័ន្ធនេះដោយផ្ទាល់ ទៅនគរបាល។ បើនិយាយឲ្យខ្លី ស្ត្រីៗគួរតែអរគុណដល់បច្ចេកវិទ្យា ដែលខិតខំយកចិត្តទុកដាក់ គិតខ្វល់ពីពួកនាងច្រើនយ៉ាងនេះ៕

-------------------------------------------------
ដោយ៖ ឈូករ័ត្ន - ប៉ារីស​ ថ្ងៃទី៦ ខែធ្នូ ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ