ទោះបីជាតុលាការខេត្តស្វាយរៀង បានចេញដីការចាប់ខ្លួនលោក ឈូក បណ្ឌិត អតីតអភិបាលក្រុងបាវិត អស់រយៈពេល​ជាជិតមួយឆ្នាំហើយក៏ដោយ ក៏មកទល់ពេលនេះ អាជ្ញាធរនៅតែមិនទាន់អាចចាប់ខ្លួន ជនមានពិរុទ្ធរូបនេះយកមក​ផ្តន្ទា​ទោសបានដែរ។ អង្គការសង្គមស៊ីវិល ដែលធ្វើការផ្នែកសិទ្ធិមនុស្សនៅកម្ពុជា និងដែលតាមដានករណីនេះ បានសម្តែងការ​អស់​សង្ឃឹមថា អាជ្ញាធរទំនងជាមិនអាចចាប់ខ្លួនលោក ឈូក បណ្ឌិត បាននោះទេ។

ផ្លាកសញ្ញាបញ្ជាក់ពីយុត្តិធម៌ ពីខាងក្រៅសាលាឧទ្ទរណ៍។ (រូបថត MONOROOM.info/ O. Vary)

រាជធានីភ្នំពេញ - បន្ទាប់ពីបានបើកសវនាការលើសំណុំរឿង ទាក់ទងនឹងអតីតអភិបាលក្រុវបាវិត បាញ់កម្មករិនី នៅ​ខេត្ត​ស្វាយរៀងកាលពីថ្ងៃទី ៣១ខែតុលា ម្សិលមិញរួចមក។ តុលាការឧទ្ធរណ៍ នឹងសម្រេចប្រកាសសាលដីការជុំវិញរឿងក្តីនេះ នៅថ្ងៃទី ៤ ខែ វិច្ឆិកា ខាងមុខ។ ការប្រកាសនៅពេលខាងមុខនេះ បើទោះបីសាលដីការរបស់សាលាឧទ្ធរណ៍ សម្រេច​បង្គាប់ឲ្យចាប់ខ្លួនលោក ឈូក បណ្ឌិត យកមកឃុំក្នុងពន្ធនាគារដូចសាលក្រមរបស់តុលាការខេត្តស្វាយរៀងក៏ដោយ ក៏សាធារណៈជនទូទៅគ្មានជំនឿថា អជ្ញាធរអាចចាប់ខ្លួនលោក ឈូក បណ្ឌិត យកមកផ្តន្ទាទោសបាននោះដែរ។

ប្រធានមជ្ឈមណ្ឌលសិទ្ធិមនុស្ស លោក អ៊ូ វីរៈ បានថ្លែងប្រាប់ទស្សនាវដ្តីមនោរម្យព័ងអាំងហ្វូថា លោក​មិនសូវមានសង្ឃឹម​សោះឡើយ ដែលអជ្ញាធររដ្ឋាភិបាលអាចស្វែងរកចាប់ខ្លួនលោក ឈូក បណ្ឌិត បាននោះ។ លោក អូ វីរៈ បន្តថា ប្រសិន​បើរដ្ឋាភិបាលកម្ពុជាមានឆន្ទៈពិតប្រាកដក្នុងការចាប់ខ្លួនលោក ឈូក បណ្ឌិត នោះ គេប្រាកដជាអាចចាប់​ខ្លួនបាន​ជាក់ជា​មិនខាន ព្រោះលោកឈូកបណ្ឌិតជាមនុស្សមានមុខមាត់«ធម្មតា» មិនមែនទេវតានោះទេ។

មេដឹកនាំអង្គការសិទ្ធិមនុស្សរូបនេះ បាននិយាយជាការប្រហាក់ប្រហែលថា ម្លេះពេលនេះលោកឈូក បណ្ឌិត ទំនងអាច​រត់ទៅដល់​ប្រទេសវៀតណាមបាត់ទៅហើយក៏មិនដឹង តែលោកថា ប្រសិនបើរដ្ឋាភិបាលចង់ចាប់នោះ គឺអាចធ្វើបាន​ដោយស្រួលគ្រាន់តែសហការជាមួយរដ្ឋាភិបាលវៀតណាមទៅ ព្រោះប្រទេសនេះជាប្រទេសកុំម្មុយនីស​ងាយស្រួលក្នុង​ការចាប់ខ្លួនណាស់។ ក៏ប៉ុន្តែលោក អូ វីរៈ បានបញ្ជាក់ជាថ្មីទៀតថា រដ្ឋាភិបាល«គ្មានឆន្ទៈ»នោះទេ។

លោក អំ សំអាត មន្រ្តីមួយរូបទៀតនៃអង្គការសិទ្ធិមនុស្សលីកាដូ បានលើកឡើងថា លោកមានសង្ឃឹមតិចតួចណាស់ ដែលអជ្ញាធរអាចចាប់ខ្លួនលោក ឈូក បណ្ឌិត បាន បើទោះបីណាជាតុលាការ​សាលាឧទ្ធរណ៍សម្រេចតម្កល់​សាលក្រម​សាលាដំបូងនាពេលខាងមុខក៏ដោយ។ លោកថា ករណីលោកឈូក បណ្ឌិតនេះ តុលាការនិងអាជ្ញាធរគ្រាន់តែធ្វើជា​ល្បែង​លេងតែប៉ុណ្ណោះ គឺគ្មានចេតនាសោះឡើយក្នុងការស្វែងរកចាប់ខ្លួនពិតប្រាកដ។ លោក អំ សំអាត បញ្ជាក់ថា​មូល​ហេតុ​ដែលអាជ្ញាធរមិនអាចចាប់ខ្លួនលោក ឈូក បណ្ឌិត បាននោះ ដោយសារតែជនជាប់ចោទរូបនេះ មានខ្នងនៅពីក្រោយ«ធំ» ដែលធ្វើឲ្យអជ្ញាធរញញើត។

ចំណែកមន្រ្តីអង្គកាអាដហុក លោក ចាន់ សុវ៉េត បានសង្ឃឹមខ្លះៗដែលថា ប្រសិនបើរដ្ឋាភិបាលអាណត្តិថ្មីនេះ ប្រាកដ​ជា​ចង់កែទម្រង់ប្រព័ន្ធតុលាការ ឬការដឹកនាំរដ្ឋដូចការអះអាង របស់លោកនាយករដ្ឋមន្រ្តី ហ៊ុន សែន នោះ ក្នុងនាមលោកជា អង្គការសិទ្ធិមនុស្សយល់ថា រដ្ឋាភិបាលពិតជាអាចចាប់ខ្លួនលោក ឈូក បណ្ឌិត បាននៅក្នុងអាណត្តិថ្មីនេះ។ លោក ចាន់ សុវ៉េត ក៏ស្នើឲ្យរដ្ឋាភិបាលនីតិកាលថ្មីនេះ បង្ហាញនូវសកម្មភាពកែទម្រង់ភាពនិទណ្ឌភាពនៅក្នុងប្រទេសកម្ពុជា តាមរយៈ​ការចាប់ខ្លួនលោក ឈូក បណ្ឌិត ដំបូងគេនេះផងដែរ។

អតីតអភិបាលក្រុងបាវិតលោក ឈូក បណ្ឌិត បានបាញ់ទៅលើក្រុមកម្មករ-កម្មការិនី ខណៈពេលដែលពួកគេបាន​ធ្វើ​កូដកម្មនៅមុខរោងចក្រមួយកន្លែង ស្ថិតនៅក្រុងបាវិត ខេត្តស្វាយរៀង កាលពីឆ្នាំ ២០១១ កន្លងទៅ។ នៅក្នុងហេតុការណ៍​នោះ បានបណ្តាលឲ្យកម្មការិនី ៣ នាក់បានរងរបួសជាទម្ញន់។ បន្ទាប់ពីសាលាឧទ្ទរណ៍បានបង្គាប់ឲ្យយកសំនុំរឿងនេះ ទៅ​កាត់ក្ដីជាលើកទីពីរនោះ តុលាការខេត្តស្វាយរៀងបានបើកការជំនុំជម្រះសារជាថ្មី ដោយសម្រេចបង្គាប់​ឲ្យចាប់ខ្លួន​លោក ឈូក បណ្ឌិត យកមកដាក់ពន្ធនាគារចំនួនមួយឆ្នាំកន្លះ និងបង់សំណង់ជំងឺចិត្តដល់កម្មការិនី​រងគ្រោះជាទឹកប្រាក់​ប្រមាណ​ជាជាង ៤០ លានរៀល។ ក៏ប៉ុន្តែមកទល់ពេលនេះ លោក ឈូក បណ្ឌិត បានរត់គេចខ្លួនបាត់គ្មានស្រមោល ហើយអជ្ញាធរ​មិនអាចស្វែងរកចាប់ខ្លួនជនជាប់ចោទរូបនេះបានទេ។

លោក ឈូក បណ្ឌិត ត្រូវបានគេស្គាល់ជាទូទៅថា មានខ្នងនៅពីក្រោយធំ គឺលោកស្រី មែន សំអន ដែលបច្ចុប្បន្នជា​ឧបនាយករដ្ឋមន្រ្តីប្រចាំការ និងជាមនុស្សស្និទជាមួយលោក នាយករដ្ឋមន្ត្រីហ៊ុន សែន ផងដែរ។ កាលពីដើមខែតុលា​កន្លងទៅ មានសាក្សីបានថ្លែងប្រាប់ទស្សនាវដ្ដីមនោរម្យព័ងអាំងហ្វូ ថាបានឃើញជនជាប់ពិរុទ្ធរូបនេះ នៅក្នុងផ្ទះរបស់​លោកស្រីម៉ែន សំអន។ ប៉ុន្តែលោកស្រីអ្នកជំនួយការឲ្យ លោកស្រី ម៉ែន សំអន បានច្រានចោលការលើកឡើងនោះ ថាជារឿងមិនពិត៕

---------------------------------------------------
ដោយ៖ ជា ធីរិទ្ធ - ថ្ងៃទី០១ ខែវិច្ឆិកា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ