«អាណិត» ព្រោះលោក ខឹម វាសនា មាន«បញ្ហាផ្លូវចិត្ត»! នេះជាការថ្លែងឡើង របស់អ្នកវិភាគ​បញ្ហា​សង្គម-​នយោបាយ លោក អ៊ូ វីរៈ  ដែលបានសរសេរ​នៅមុននេះបន្តិច លើបណ្ដាញសង្គម។ លោក អ៊ូ វីរៈ ដែល​ជា​ប្រធាន​អង្គការវេទិកាអនាគតផងនោះ បានសរសេរដូច្នេះ ដើម្បីតបទៅនឹងវីដេអូមួយ ដែលគេបានឮលោក ខឹម វាសនា ប្រធានគណបក្សសម្ព័ន្ធដើម្បីប្រជាធិបតេយ្យ (ហៅខ្លួនឯងថា បក្សជួង) និយាយពីការសុំកោះមួយ បង្កើត​ប្រទេស​ដាច់​ដោយ​ឡែក និងលែងចង់នៅ ជាជនជាតិខ្មែរតទៅទៀត។

លោក អ៊ូ វីរៈ បានសរសេរថា៖ «ខ្ញុំមានអារម្មណ៍អាណិតគាត់។ គាត់មានបញ្ហាផ្លូវចិត្ត។ កំហឹង និងការតឹងទ្រូង នាំ​គាត់​ទៅ[ជា]អញ្ចឹង។»។

នៅខាង​ក្រោម​ការលើកឡើង របស់លោក អ៊ូ វីរៈ រហូតមកដល់ម៉ោងនេះ មានសមាជិក និងអ្នកគាំទ្រ​របស់​គណបក្ស​​សម្ព័ន្ធតិចតួច ដែលបានចេញមុខមក ធ្វើប្រតិកម្ម​តបទៅនឹងការលើកឡើង របស់អ្នកវិភាគរូបនេះ។ នោះ ដោយ​ទំនង​ជាក្នុង​ពេលកន្លងមក លោក អ៊ូ វីរៈ មិនសូវបានលើកមកនិយាយ ឬនិយាយដល់ ពី​សកម្មភាព​នយោបាយ ឬការលើកឡើង របស់ប្រធានគណបក្ស«ជួង»នោះឡើយ។

លើកលែងតែកាលពីថ្ងៃទី១២ ខែមិថុនានេះ លោក អ៊ូ វីរៈ បានចែករំលែកទស្សនៈមួយ របស់លោក ជួង ជូងី មេធាវី​ដ៏ល្បីមួយរូប ដែលតែងចេញការពារក្ដី ជាញឹកញយ ឲ្យក្រុមសមាជិក ឬអ្នកគាំទ្រគណបក្សប្រឆាំង នៅ​ក្នុង​ប្រព័ន្ធ​តុលាការកម្ពុជា។ ទស្សនៈនោះ ត្រូវបានលោក ជូង ជូងី បង្ហោះនៅថ្ងៃទី១១ ខែមិថុនា ដែលមាន​សេចក្ដី​ជា​អាទិ៍​ថា៖ «ក្រុម និកាយ LDP អាចនាំគ្រោះថ្នាក់ធ្ងន់ធ្ងរ ដល់សង្គមខ្មែរ ជាងក្រុមខ្មែរក្រហម។ ទ្រឹស្តី​មេ​និកាយ LDP ដាក់ចេញសាហាវពេកហើយ។ តើសភាពផ្លូវចិត្ត របស់គាត់យ៉ាងណា ដែលអាចដាក់ចេញ នូវ​ទ្រឹស្តី​សាហាវ​យ៉ាង​នេះ?»។

ការចែករំលែកនេះ របស់លោក អ៊ូ វីរៈ ក៏ត្រូវបានលោក ខឹម វាសនា ថតជា«ScreenShot» យកមកបង្ហោះ នៅ​លើ​គណនេយ្យហ្វេសប៊ុករបស់លោកដែរ។ ប្រធានបក្សជួង បានសរសេរអមនឹងការបង្ហោះនោះ ជាភាសា​អង់គ្លេស​​ថា៖ «Posted by Chou Chung Ngy and Share[d] by OU Virak. haha haha (បង្ហោះ​ដោយ ជូង ជូងី និង​ចែករំលែក​ដោយ អ៊ូ វីរៈ។ ហាហា ហាហា)»៕