ខ្មាន់កាំភ្លើងដែលបានបើកការបាញ់ប្រហារ នៅក្នុងព្រលានយន្ដហោះនៃទីក្រុងឡូសអេនជឺឡេស ដោយបានសម្លាប់​ភ្នាក់ងារសន្តិសុខមួយរូប របួសជាច្រើននាក់ផ្សេងទៀត និងបង្កឲ្យមានការតក់ស្លុតនៅក្នុងចំណោមអ្នកដំណើរ មាន​គម្រោងចង់សម្លាប់កងរក្សាសន្តិសុខប្រចាំនៅព្រលានយន្ដហោះនោះ ច្រើននាក់ផ្សេងទៀត ដែលសុទ្ធសឹងជាបុគ្គលិក របស់ភ្នាក់ងារសន្តិសុខផ្នែកដឹកជញ្ជូន។ នេះបើតាមចង្អុញបង្ហាញ ពីសំណាក់នគរបាលសហព័ន្ធសហរដ្ឋអាមេរិក។

កន្លែងកើតហេតុ នៅក្នុងព្រលានយន្ដហោះក្រុងឡូសអេនជឺឡេស និងរូបថតខ្មាន់កាំភ្លើង។ (រូបថត AP)

បទល្មើស - ក្រដាសសរសេរដោយដៃមួយសន្លឹក ដែលត្រូវបានរកឃើញនៅក្នុងស្ប៉ោងដែលដាក់កាំភ្លើង ចូលមក​ក្នុង​ព្រលានយន្ដហោះនោះ បង្ហាញថាជនដែលបានបើកការបាញ់ប្រហារ និងបានធ្វើឲ្យជើងហោះហើរជាច្រើន បានជួប​ការ​រអាក់រអួលនោះ បានសម្រេចចិត្តយ៉ាងច្បាស់ ក្នុងការសម្លាប់បុគ្គលិកជាច្រើននាក់នៃភ្នាក់ងារសន្តិសុខ។ នេះជាការ​ប្រកាសឲ្យដឹងរបស់លោក ដេវិដ ប៊ូវដីច (David Bowdich) នាយការិយាល័យស៊ើបអង្កេតសហព័ន្ធ (FBI) ប្រចាំ​នៅទី​ក្រុង​ឡូសអេនជឺឡេស នៅល្ងាចថ្ងៃទី២ខែវិច្ឆិកា បន្ទាប់ពីការបាញ់ប្រហារបានកើតឡើង នៅព្រឹកថ្ងៃទី០១ខែវិច្ឆិកានោះមក។

ក្រុមរដ្ឋអាជ្ញាបានប្រកាស់ ពីទោសកំហុសរបស់ ផូល អេនតូនី សេនស្សា (Paul Anthony Ciancia) អាយុ២៣ឆ្នាំ រស់​នៅ​ក្រុងញ៉ូ ចេស៊ី (ផ្នែកឦសាននៃសហរដ្ឋអាមេរិក) អាចនឹងទទួលទោសប្រហារជីវិត ពីបទធ្វើឃាត់ភ្នាក់ងារសន្តិសុខ​សហព័ន្ធម្នាក់ និងប្រើអំពើហឹង្សា នៅក្នុងព្រលានយន្ដហោះអន្តរជាតិ។ នៅក្នុងហេតុការណ៍នោះ សេនស្សា ត្រូវបាន​បាញ់ឲ្យរបួស។ អាជ្ញាធរមិនចង់ថ្លែងប្រាប់ ពីស្ថានភាពសុខភាពរបស់ សេនស្សា នោះទេ តែបើតាមការសែត​ឡូស​អេនជឺឡេស​ថែម៍ (Los Angeles Time) ខ្មាន់កាំភ្លើងរូបនេះ ត្រូវគ្រាប់កាំភ្លើងចំក្បាល និងចំដៃ កំពុងស្ថិតក្នុង​សភាពដ៏​ធ្ងន់ធ្ងរ។ ការសែតបានរាយការណ៍ទៀត ពីញាតិមិត្តរបស់ សេនស្សា ថា ជននេះអាចជាមានបំណងចង់ធ្វើអត្តឃាត។

លោក ដេវិដ ប៊ូវដីច បានបញ្ជាក់ថា សេនស្សា ចង់បង្កការតក់ស្លុត ក្នុងលក្ខណៈជា«សត្រូវ»របស់ភ្នាក់ងារ​សន្តិសុខផ្នែក​ដឹកជញ្ជូន។ ភ្នាក់ងារ ហ្សេរ៉ាដូ អេណង់ដេស (Gerardo Hernandez) អាយុ៣៩ឆ្នាំ បានស្លាប់ក្រោមគ្រាប់កាំភ្លើងរបស់ សេនស្សា តែបានទ្រាំទ្រជាមួយនឹងរបួសដ៏ធ្ងន់នៅឯមន្ទីរពេទ្យរហូតជិតថ្ងៃត្រង់ថ្ងៃដដែលនោះ។ លោក អេណង់ដេស ជាភ្នាក់ងារដំបូងគេដែលត្រូវបានសម្លាប់ រាប់ចាប់តាំងពីពេលដែលភ្នាក់ងារសន្តិសុខផ្នែកដឹកជញ្ជូននេះ បានបង្កើត​ឡើងក្រោយព្រឹត្តិការណ៍ថ្ងៃ១១ខែកញ្ញា។

ខ្មាន់កាំភ្លើងបានគ្រោងការបាញ់សម្លាប់

ភ្នាក់ងារ៧នាក់ត្រូវបានបាញ់ឲ្យរបួស ក្នុងនោះ៦នាក់ត្រូវបានបញ្ជូនទៅមន្ទីពេទ្យ។ ប៉ុន្តែបើតាមសម្ដីរបស់លោកអេរិក ហ្គាសេទី (Eric Garcetti) អភិបាលក្រុងឡូសអេនជឺឡេស បានថ្លែងឲ្យដឹងថា សេនស្សា បានគ្រោងការបាញ់សម្លាប់មួយ យ៉ាងរង្គាល។ លោកបាននិយាយថា «គ្រាប់កាំភ្លើង នៅក្នុងបង់កាំភ្លើងមានជាង១០០គ្រាប់ ដែលបើតាមទំនង ជននេះ​អាចសម្លាប់ភ្នាក់ងារទាំងអស់ ដែលធ្វើការនៅក្នុងព្រលានថ្ងៃនេះ»។

ប្រព័ន្ធផ្សព្វផ្សាយជាច្រើនបានរាយការណ៍ថា ជននេះបានសម្ដែងពីកំហឹងសងសឹងរបស់ខ្លួន ទល់នឹងភ្នាក់ងារសន្តិសុខ។ នគរបាលបានរកឃើញនៅលើខ្លួនជននេះ នូវពាក្យមួយដែលសម្ដែងពីការខកចិត្តរបស់ខ្លួន ចំពោះរដ្ឋាភិបាល។ នៅក្នុង​សេចក្ដីប្រកាសព័ត៌មានរបស់ការិយាល័យស៊ើបអង្កេតសហព័ន្ធ អេហ្វប៊ីអាយ បាននិយាយថា «វាដូចជាលឿនពេក ក្នុង​ការកំណត់ក្នុងពេលនេះ ពីមូលហេតុពិតប្រាកដនៃខ្មាន់កាំភ្លើង ហើយអ្នកស៊ើបអង្កេតក៏មិនបានបញ្ជៀស ឬចាត់ទុកទាំង​ស្រុងដែរ ពីមូលហេតុ"ភេវរកម្ម"»៕

--------------------------------------------------
ដោយ៖ សុបិន្ត - ថ្ងៃទី០២ ខែវិច្ឆិការ ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ