ខណៈស្ថានភាពទឹកជំនន់ ដែលបានជនលិចបណ្តាខេត្តមួយចំនួន របស់កម្ពុជាកំពុងស្រកចុះទៅវិញបណ្តើរៗ ហើយនោះ តុល្យការចុងក្រោយដែលបញ្ចេញឲ្យដឹង ដោយមន្រ្តីជាន់ខ្ពស់របស់គណៈកម្មាធិការជាតិគ្រប់គ្រងគ្រោះមហន្តរាយ បាន​បង្ហាញថា ទឹកជំនន់ឆ្នាំ២០១៣នេះមានលក្ខណៈប្រហាក់ប្រហែលឆ្នាំ២០១១ ហើយយ៉ាងហោចណាស់ក៏មាន​មនុស្ស​១២២​នាក់បានស្លាប់ និងទឹកប្រាក់ច្រើនជាង៥០០លានដុល្លារសហរដ្ឋអាមេរិក អាចត្រូវខាតបង់ ពីគ្រោះទឹកជំនន់ ក្នុងឆ្នាំ២០១៣​នេះ។

ទឹកជំនន់ឡើងពេញផ្សារក្រាម ខេត្តកំពង់ឆ្នាំង។ (រូបថត pkaysour កាលពីឆ្នាំ២០១១)

រាជធានីភ្នំពេញ - អនុប្រធានគណៈកម្មាធិការជាតិគ្រប់គ្រងគ្រោះមហន្តរាយ លោក ញឹម វណ្ណដា ក្នុងកិច្ចសម្ភាស​ជាមួយ​វិទ្យុអាស៊ីសេរី នៅថ្ងៃទី១៥ ខែតុលាឆ្នាំ២០១៣ បានឲ្យដឹងថាស្ថានភាពទឹកជំនន់នៅឆ្នាំ២០១៣នេះ ដែលភាគច្រើនបណ្តាល​មកពីជំនន់ទឹកភ្លៀងនោះ មានលក្ខណៈស្ទើរតែប្រហាក់ប្រហែល ទៅនឹងស្ថានភាពទឹកជំនន់ក្នុងឆ្នាំ២០១១ តែចំនួន​មនុស្ស​ស្លាប់មានចំនួនតិចជាងឆ្នាំ២០១១។

ជនរងគ្រោះចំនួន ១២២នាក់ បានស្លាប់ និងខាងបង់ទឹកប្រាក់ច្រើនជាង ៥០០លានដុល្លារអាមេរិក

អនុប្រធានគណៈកម្មាធិការជាតិ គ្រប់គ្រងគ្រោះមហន្តរាយរូបនេះ បន្តថា យោងតាម​តុល្យការចុងក្រោយបានបង្ហាញថា មានជនរងគ្រោះចំនួន១២២នាក់ និងការខាតបង់គិតជា​ទឹកប្រាក់យ៉ាងតិច៥០០លាន​ដុល្លារអាមេរិក ប៉ុន្តែចំនួននេះ វាគ្រាន់​តែជាការព្យាករណ៍បណ្តោះអាសន្នប៉ុណ្ណោះ។

ចំពោះវិធានការជួយសង្រ្គោះលោក ញឹម វណ្ណដា បានធ្វើអះអាង ដោយយោងទៅលើអនុសាសន៍របស់លោកនាយករដ្ឋមន្រ្តី ហ៊ុន សែន ដែលមានយន្តការជួយសង្រ្គោះផ្សេងៗ ក្នុងនោះរួមមាន ការជម្លៀសប្រជាពលរដ្ឋតាមរយៈ មធ្យោបាយធនធាន​មនុស្ស ទូកចម្លង កាណូត ទៅកាន់ទីសុវត្ថិភាព ឲ្យអស់ពីលទ្ធភាព ជៀសវាងការបាត់បង់ជីវិតប្រជាពលរដ្ឋ។

ទាក់បញ្ហានេះ លោក យ៉ង់ គឹមអេង នាយកមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព បានថ្លែងថា ស្រប​ពេល​ប្រទេសកម្ពុជាកំពុងរងការលិចលង់ ដោយទឹកជំនន់ធ្ងន់ធ្ងរនោះ គេក៏ឃើញមានសកម្មភាពជួយសង្រោះ និងការផ្តល់ជំនួយ​ច្រើន ពីគ្រប់មជ្ឈដ្ឋាន រាប់ទាំង រដ្ឋាភិបាល សង្គមស៊ីវិល គណបក្សនយោបាយ ប្រជាពលរដ្ឋដែលមានលទ្ធភាព និងដៃគូរ​ផ្សេងៗទៀត ដែលវាជាការបង្ហាញថា សង្គមកម្ពុជាមានសាមគ្គីភាពជាមួយគ្នាបានល្អ ក្នុងគ្រាមានអាសន្ន។

តែនាយកមជ្ឈមណ្ឌលប្រជាពលរដ្ឋរូបនេះ អះអាងថា រដ្ឋាភិបាលកម្ពុជាគួរពង្រឹង និងធ្វើឲ្យប្រសើរឡើង ចំពោះវិធានការ​ជួយសង្រ្គោះ ប្រកបដោយប្រសិទ្ធិភាព ព្រោះក្នុងពេលបច្ចុប្បន្ននេះ រដ្ឋាភិបាលកម្ពុជា ពុំទាន់មានសមត្ថភាព​ពេញ​លេញ​ក្នុងការជួយសង្រ្គោះ និងផ្តល់ជំនួយគ្រប់គ្រាន់ដល់ប្រជាពលរដ្ឋនៅឡើយទេ។

គួរម្លឹកថាគ្រោះទឹកជំនន់នៅកម្ពុជា កាលពីឆ្នាំ២០១១កន្លងទៅ បានបណ្តាលឲ្យស្លាប់បាត់បង់ជីវិតប្រជាពលរដ្ឋ២៤៧នាក់ មានប្រជាពលរដ្ឋច្រើនជាង១លាន៥សែននាក់រងផលប៉ះពាល់ និងដីស្រែជាង១លានហិកតាត្រូវបានលិចលង់ ខណៈ​ទឹក​ប្រាក់៥២២លានដុលា្លរអាមេរិកត្រូវបានខាតបង់ ពីគ្រោះទឹកជំនន់។

លោក យ៉ង់ គឹមអេង បានលើកឡើងថា មូលហេតុដែលនាំឲ្យមានគ្រោះទឹកជំនន់ គឺដោយសារការគ្រប់គ្រងធនធាន​ធម្មជាតិ​មិនបានល្អ និងការសាងសង់ហេដ្ឋារចនាសម្ព័ន្ធមិនបានត្រឹមត្រូវ រួមទាំងប្រព័ន្ធបង្ហូរទឹកទាំងនៅក្នុងទីក្រុង និងជនបទ។ ទន្ទឹមនឹងនេះលោក សម រង្ស៊ី ប្រធានគណបក្សសង្រ្គោះជាតិ ជាគណបក្សជំទាស់ ធ្លាប់អះអាងថា បញ្ហាទាំងនេះគឺជាកំហុស​របស់រដ្ឋាភិបាល ដែលបណ្តោយឲ្យមានការកាប់ព្រៃឈើ និងបំផ្លាញធនធានធម្មជាតិយ៉ាងធ្ងន់ធ្ងរ ដែលជាមូលហេតុ​ដែល​នាំឲ្យមានគ្រោះទឹកជំនន់។ តែមូលហេតុនេះ បានត្រូវលោក ញឹម វណ្ណដា បានធ្វើការច្រានចោល និងថាគឺជារឿងមិន​គួរឲ្យ​ជឿ៕

---------------------------------------------
ដោយ៖ អ៊ុំ បូរី - ថ្ងៃទី១៦ ខែតុលា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ