សំនួរនេះបានចោទឡើង ខណៈពេលដែលក្រុមអ្នកធ្វើនយោបាយ នៅក្នុងព្រះរាជាណាចក្រមួយនេះ កំពុងតែដណ្ដើមគ្នា​ទាញយករូបភាពនៃការគោរពស្រឡាញ់ អតីតព្រះមហាវីរៈក្សត្រ នរោត្ដម សីហនុ ទៅឲ្យក្រុមបក្ស តែរៀងៗខ្លួន។ ប៉ុន្តែ ទោះ​នៅក្នុងបរិបទណាក៏ដោយ ក៏មតិមួយចំនួននៅតែរិះគន់ថា គណបក្សកាន់អំណាច ដូចជាចង់កេងចំណេញយករូបភាព​នេះតែឯង។

ព្រះឆាយ៉ាល័ក្ខ និងការដាក់តាំងបង្ហាញ ដើម្បីឧទ្ទិសដល់​ព្រះវិញ្ញាណក្ខន្ធព្រះបរមរតនកោដ្ឋ។ (រូបថត Wayne Ranney)

រាជធានីភ្នំពេញ - ថ្លែងទៅកាន់អ្នកគាំទ្ររបស់គណបក្សសង្គ្រោះជាតិ នាព្រឹកថ្ងៃទី១៤ ខែតុលានេះ លោក កឹម សុខា ប្រធានស្តីទីគណបក្ស បានលើកឡើងថា «ក្រុមកុម្មុយនីស ក្រុមខ្មែរក្រហមធ្វើអ្វីតែងតែបោកប្រាស់ ដោយគិតថាអ្វីៗ​ទាំង​អស់​ជារបស់ខ្លួនឯង សូម្បីព្រះរាជកោដ្ឋក៏ជារបស់ពួកគេដែរ គេមិនបានទុកឲ្យសម្រាប់ប្រជាពលរដ្ឋខ្មែរទាំងអស់គ្នា មាន​សិទ្ធិស្មើរគ្នាទេ។ (…) ទាំងនេះជាលក្ខណៈបង្ហាញរបស់ពួកផ្តាច់ការ និងកុម្មុយនីស ដែលទាញយកផលប្រយោជន៍ពីអ្វី ដែលជារបស់ទាំងអស់គ្នា មកជារបស់ខ្លួន។» ការដៀមដាម របស់មេដឹកនាំគណបក្សប្រឆាំង ពូកែខាងវោហាស័ព្ទមួយនេះ ទំនងជាចង់សំដៅទៅរក ក្រុមមន្ត្រី«គ្រាក់ៗ»របស់គណបក្សប្រជាជនកម្ពុជា ដែលកំពុងកាន់អំណាចសព្វថ្ងៃ និងមាន​មួយ​ចំនួន សុទ្ធតែជាអតីតកម្មាភិបាល ឬធ្លាប់ជាទាហាន​ខ្មែរក្រហម ដូចយ៉ាងលោក ហ៊ុន សែន នោះជាដើម។

បន្ទាប់ពីពិធីបង្សុកូល គោរពព្រះវិញ្ញាណក្ខន្ធសម្តេចព្រះបរមរតនកោដ្ឋ នរោត្តម សីហនុ នៅទីស្នាក់ការគណបក្ស​ខ័ណ្ឌ​ទួលគោករួចហើយមកនោះ លោក កឹម សុខា បានថ្លែងឲ្យដឹងថា គណបក្សសង្គ្រោះជាតិបានស្នើរសុំ ទៅគណកម្មការ​បុណ្យជាតិ និងព្រះបរមរាជវាំង ដើម្បីទៅគោរពនៅវិមានព្រះបរមរូបដោយផ្ទាល់ នាល្ងាចម៉ោងពីរនេះ តែត្រូវបានបដិសធ ដោយគេបានបញ្ជាក់ថា រង់ចាំក្រោយថ្ងៃទី១៥ ខែតុលា ព្រោះថ្ងៃទី១៥នេះ នឹងមានការប្រារព្វពីធីជាលក្ខណៈថ្នាក់ជាតិ ធ្វើ​រួមតែម្តង។ លោកថា ទោះយ៉ាងណាក៏ដោយ ក៏គណបក្សសង្គ្រោះជាតិ នឹងនៅតែបន្តរដាក់ស្នើទៅទៀត គ្រាន់តែមិនដឹងថា​គេ​នឹង​អនុញ្ញាតិនៅពេលណាមួយនោះទេ។

មន្រ្តីរបស់អង្គការសង្គមស៊ីវិលមួយចំនួន បានវាយតម្លៃថា នោះជាអ្វីដែលជា«ភាពលំអៀងនិងកង្វះតម្លាភាព» នៃរដ្ឋការ​សាធារណៈ​សព្វថ្ងៃ។ ក្រុមមន្ត្រីទាំងនោះបានបកស្រាយថា អតីតព្រះមហាវីរៈក្សត្រ ធ្លាប់ជាព្រះមហាក្សត្រនៃប្រជារាស្ត្រ គ្រប់រូប ដូច្នេះព្រះបរមរូប ឬ​កេរដំណែល​ណាផ្សេង​ទៀត​របស់ព្រះអង្គ មិនអាចជាកម្មសិទ្ធិរបស់នរណាម្នាក់ ឬក៏ត្រូវបាន​ក្រុមណាមួយ យកទៅគ្រប់គ្រងតែឯងនោះឡើយ។ មន្ត្រីមួយរូប ដែលជាប្រធាន​មជ្ឈមណ្ឌល​ប្រជាពលរដ្ឋ​ដើម្បី​អភិវឌ្ឍន៍​និងសន្តិភាព លោក យ៉ង់ គឹមអេង បានចាត់ទុកការហាមឃាត់ មិនឲ្យក្រុមមួយមិនឲ្យទៅគោរពព្រះព្រះបរមរូបនេះ ថាជា​ការមួយ​ខុស​ឆ្គងយ៉ាងធំរបស់ក្រុមអាជ្ញាធរនេះ និងជាការគួរឲ្យសោកស្តាយ ដែលមិនគួរនឹងកើតមាន​ចំពោះសង្គម​ជាតិ​នោះទេ។ លោក​បានពន្យល់ថា «អតីតព្រះមហាក្សត្រ លោកជានិម្មិតរូបជាតិដ៏ខ្ពង់ខ្ពស់ ដែល​មានគុណូបការៈជាច្រើន សម្រាប់ប្រជា​ពលរដ្ឋ​ខ្មែរទូទៅគោរព។»

មិនត្រឹមតែព្រះព្រះបរមរូប ឬព្រះបរមកោដ្ឋ ដែលត្រូវបានគេមើលឃើញថា ការគ្រប់គ្រងពីសំណាក់អាជ្ញាធរ មានភាព​រើស​អើងប៉ុណ្ណោះនោះទេ ប៉ុន្តែជា​រឿយៗ​គេតែងឮមន្ត្រី​របស់រដ្ឋាភិបាល ឬមកពីគណបក្ស​ប្រជាជនកម្ពុជា និយាយលើកអួតអំពី​សមិទ្ធិផលផ្សេងទៀត ដែល​បានកើតឡើង​ក្នុង​អំឡុងពេល​នៃការកាន់អំណាចរបស់ក្រុម​ខ្លួន ថាជាសមិទ្ធផលរបស់ក្រុមខ្លួន ឬថាមានតែក្រុមខ្លួនទេ​ដែលបានសាងសង់សមិទ្ធិផលទាំងនោះ។ ប៉ុន្តែមន្ត្រីទាំងនោះភ្លេចគិតថា សមិទ្ធិផលដែល​មាន​រូប​រាងទាំងឡាយ ទោះ​ស្ថិត​ក្នុងរូបភាពបែប​ណា​ក្ដី វាសុទ្ធតែជាផ្នែកមួយនៃកតព្វកិច្ចរបស់អ្នកកាន់អំណាច ដែលត្រូវធ្វើ។ មិន​ត្រឹមតែប៉ុណ្ណោះ សមិទ្ធិផល​ទាំងនោះ បាន​ចេញជារូបរាង ដោយប្រើប្រាស់ថវិការរបស់ជាតិ និង​ប្រជាជន។ ផ្ទុយទៅវិញ សមិទ្ធិផលដែលជាកម្មសិទ្ធិរបស់ជាតិ និង​ប្រជាជនទាំងនេះ មិនអាចឲ្យក្រុម​ណាមួយ យក​ទៅធ្វើអាជីវកម្ម​កេងចំណេញ ដាក់ឈ្មោះឲ្យតែក្រុមខ្លួន​នោះបានឡើយ។

ទស្សនាវដ្តីមនោរម្យព័ងអាំងហ្វូមិនអាចសុំទំនាក់ទំនង ជាមួយអ្នកនាំពាក្យរដ្ឋាភិបាលលោក ផៃ ស៊ីផាន ដើម្បីសុំប្រតិកម្ម បានទេក្នុងល្ងាចនេះ ដោយទូរស័ព្ទរបស់លោក មិនអាចភ្ជាប់បាន។ តែកន្លងមក រដ្ឋាភិបាល ឬគណបក្ស​ប្រជាជនកម្ពុជា មិនដែលបាននិយាយពាក់ព័ន្ធ នឹងការប្រកាន់ជំហរបែបណា ចំពោះព្រះបរមរូប ឬព្រះបរមរតនកោដ្ឋនោះទេ ដោយគ្រាន់តែ​បាន​ចាត់ចែងសាងសង់ ឬរៀបចំទៅតាមអ្វីដែលរដ្ឋាភិបាលបានសម្រេចប៉ុណ្ណោះ។ លោក ជាម យៀប មន្ត្រីជាន់ខ្ពស់​មួយ​រូបទៀតរបស់គណបក្សប្រជាជនកម្ពុជា បានថ្លែងប្រាប់​ទស្សនាវដ្ដីមនោរម្យព័ងអាំងហ្វូ ក្នុងថ្ងៃនេះដែរថា «រដ្ឋាភិបាល​របស់​សម្តេចតេជោ ហ៊ុន សែន បានប្តេជ្ញាការពាររបប​រាជានិយម ការពារ​រដ្ឋធម្មនុញ្ញឆ្នាំ១៩៩៣ និងការពារព្រះមហាក្សត្រ»។

ប៉ុន្តែសម្រាប់ស្ថាប័នព្រះមហាក្សត្រវិញ ត្រូវបានព្រះអង្គម្ចាស់ស៊ីសុវត្ថិ ធម្មិកោ ទ្រង់បានអះអាងនៅព្រឹកថ្ងៃទី១៤ ខែតុលា​នេះថា ព្រះមហាក្សត្រ​ព្រះបរមនាថ នរោត្តម សីហមុនី និងសម្តេចម៉ែមុនីនាថ សីហនុ បានសព្វព្រះរាជហរទ័យស្វាគមន៍ ចំពោះប្រតិភូ​គណបក្ស​សង្គ្រោះជាតិ ក្នុងការចូលរួមព្រះរាជពិធីបង្សុកូលនៅថ្ងៃទី១៥ ខែតុលា ឆ្នាំ២០១៣នេះ ក្នុង​ព្រះបរម​រាជវាំង ដើម្បីឧទ្ទិសដល់​ព្រះវិញ្ញាណក្ខន្ធព្រះបរមរតនកោដ្ឋ នរោត្តម សីហនុ គម្រប់មួយឆ្នាំ។ ព្រះអង្គម្ចាស់ធម្មិកោ មាន​បន្ទូលទៀតថា តំណាងគណបក្សសង្គ្រោះជាតិចំនួនប្រាំមួយរូប ដែលដឹកនាំដោយលោក កឹម សុខា ហើយ​ព្រះអង្គក៏នឹង​មានវត្តមាន ក្នុងនាមជាសមាជិក​នៃព្រះរាជវង្ស​ដែរនោះ នឹងចូលទៅថ្វាយបង្គំព្រះបរមកោដ្ឋក្នុងព្រះរាជពិធី​។

គួររម្លឹកដែរថា កាលពីថ្ងៃសុក្រ ទី១១ ខែតុលាកន្លងមក ក្នុង​ពិធីសម្ពោធជាផ្លូវការនៃវិមានព្រះបរមរូប ដោយរដ្ឋាភិបាល​កម្ពុជា​នោះ ក្រុមអ្នកតំណាងរាស្រ្ត ក៏ដូចជាសមាជិក សមាជិកា​នៃគណបក្សសង្គ្រោះជាតិ មិនមានវត្តមានចូលរួមទេ។ លោកកឹម សុខា បានថ្លែងបញ្ជាក់តាមវិទ្យុបរទេសមួយថា ការមិនបានទៅចូលរួមនោះ ដោយសារតែលិខិត​អញ្ជើញបានមកដល់​ដៃ​ក្រុម​លោក «យឺតពេល»​ពេកទៅហើយ៕

---------------------------------------------------------
ដោយ៖ អ៊ុម វ៉ារី - ថ្ងៃទី១៤ ខែតុលា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ