ហ្គូហ្គើល (Google) បានប្រកាសជាផ្លូវការ បន្ថែម«ខេមរភាសា» ទៅក្នុងសេវាកម្មបកប្រែរបស់ខ្លួន នៅថ្ងៃទី១៨ខែមេសានេះ ពីលើ​សេវាកម្ម ដែលមាន៦៥ភាសារួចហើយ។

នៅក្នុងសេចក្ដីប្រកាសព័ត៌មាន ចេញផ្សាយនៅល្ងាចថ្ងៃទី១៨ខែមេសា នៅលើគេហទំព័រផ្លូវការរបស់ហ្គូហ្គើល បាន​អោយដឹងថា ក្រុមហ៊ុនចង់ចូលរួមអបអរសាទរ ទិវាបុណ្យចូលឆ្នាំថ្មី ជាមួយនឹងប្រជាជនកម្ពុជា ដោយចោទជាសំនួរថា «តើយើងអាចធ្វើអ្វី បានប្រសើរជាងមុន?» សេចក្ដីប្រកាសព៏ត៌មាននោះបានបន្តថា «យើងសង្ឃឹមថា សេវាកម្មបន្ថែមនេះ នឹងជួយបើកផ្លូវ សម្រាប់អ្នកប្រើប្រាស់ខេមរភាសាទាំងឡាយ និងដើម្បីឲ្យអត្ថបទជាភាសាខ្មែរ កាន់តែមានភាពលូតលាស់ អាចដំណើរការបាន ជាមួយនឹងភាសាផ្សេងទៀតក្នុងពិភពលោក នៅលើបណ្ដាញអាំងធើណែត»។

សេវាកម្មបកប្រែរបស់ហ្គូហ្គើល នឹងមានភ្ជាប់មកជាមួយ នូវក្ដាវាយជាអក្សរខ្មែរ ហើយថែមទាំងមានជំនួយការ សម្រាប់​ត្រួត​ពិនិត្យ​ពាក្យ​ទាំងនោះ ជាមួយនឹងសូរស័ព្ទសម្លេងបានទៀតផង។ តែទោះជាយ៉ាងណាក៏ដោយ ក៏ក្រុមហ៊ុនយក្សខាង​អាំងធើណែត របស់អាមេរិកមួយនេះ បានត្អូញថា ការបញ្ចូលខេមរភាសា ទៅក្នុងប្រព័ន្ធបកប្រែរបស់ខ្លួន មានភាពពិបាក​ច្រើន ដោយសារបញ្ហាកង្វះប្រភព និងឯកសារខ្មែរ មិនមានជាសម្អាងគ្រប់គ្រាន់ នៅលើបណ្ដាញអាំងធើណែត។ ណាមួយ​ទៀត ពាក្យដែលត្រូវយកមករៀបជាឃ្លា ឬជាព្យាង្គ មានភាពស្មុគ្រស្មាញ ដោយសារមិនមានការដកឃ្លា រវាងពីពាក្យ​មួយ​ទៅពាក្យមួយ។

សូមបញ្ជាក់ថា ខេមរភាសា ជាភាសាទី៦៦មួយទៀត បន្ទាប់ពីភាសា«ឡាវ» ដែលក្រុមហ៊ុនទើបនឹងដាក់បញ្ចូល ជាភាសា​ទី៦៥ដែរ កាលពីខែកញ្ញាឆ្នាំ២០១២កន្លងទៅ។ តាមការស្រាវជ្រាវមួយ បានបង្ហាញថា បណ្ដាជនប្រមាណជា ១៦លាននាក់ ក្នុងពិភពលោក បានប្រើប្រាស់ខេមរភាសា ជាភាសារសម្រាប់ឆ្លើយឆ្លង ទាក់ទងគ្នា។ ដោយឡែក ក្រុមហ៊ុនអ័បផល (Apple) របស់​អាមេរិក ក៏បានបន្ថែមអោយស្គាល់ អក្សរនិងភាសាខ្មែរ ទៅក្នុងកម្មវិធីមេ (OS X Lion) របស់ខ្លួន រួចរាល់ តាំងពីឆ្នាំ២០១១​នោះមកដែរ៕

----------------------------------------------------------------
ដោយ សេក មនោរកុមារ - ប៉ារីស​ ថ្ងៃទី១៩ ខែមេសា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ