សម រង្ស៊ី ថាឈ្នះក្ដីលើ ហោ ណាំហុង នៅបារាំងជាថ្មី រឿងបរិហារកេរ្តិ៍តាមហ្វេសប៊ុក
ប្រធានគណបក្សសង្គ្រោះជាតិ ដែលជាគណបក្សប្រឆាំងនៅកម្ពុជា បានប្រកាសតាមទំព័រហ្វេសប៊ុកផ្លូវការរបស់លោកថា តុលាការក្នុងប្រទេសបារាំង បានសម្រេចក្តីឲ្យលោក ហោ ណាំហុង ចាញ់លោកជាថ្មីម្តងទៀត កាលពីថ្ងៃទី០៨ ខែកក្កដា ឆ្នាំ២០១៦ នៅក្នុងបណ្តឹងបរិហារកេរ្តិ៍ ដែលអតីតរដ្ឋមន្ត្រីក្រសួងការបរទេសកម្ពុជារូបនេះ បានប្ដឹងប្រឆាំងលោក។ បណ្ដឹងនោះ មានជាប់ពាក់ព័ន្ធ នឹងរឿងរ៉ាវបរិហារកេរ្ត៍ដដែល នៅជំរំ ឬគុកបឹងត្របែក ក្នុងរបបខ្មែរក្រហម។
លោក សម រង្ស៊ី ខ្លួនលោក ធ្លាប់ប្រាប់ទៅសារព័ត៌មាន ខេមបូឌាដេលី ដែលចេញផ្សាយ កាលពីថ្ងៃទី២២ ខែមីនាថា បណ្ដឹងជាថ្មីមួយនេះ ត្រូវបានលោក ហោ ណាំហុង ប្ដឹងលោកទៅកាន់តុលាការនៃរដ្ឋធានីប៉ារីស ប្រទេសបារាំង ពាក់ព័ន្ធនឹងការបង្ហោះ នៅលើបណ្ដាញសង្គម កាលពីថ្ងៃទី២០ ខែវិច្ឆិកា ឆ្នាំ២០១៥ នូវសារទូរលេខមួយ របស់ស្ថានទូតអាមេរិកប្រចាំនៅកម្ពុជា។
[...]
