ត្រូវប្រយ័ត្នប្រយែង ឲ្យខ្លាំងឡើង... ជាពិសេសចំពោះនរណាម្នាក់ ដែលចង់សុំប្រាក់ ពីរដ្ឋមន្ត្រីក្រសួងព័ត៌មាន។ ព្រោះបើមិនដូច្នេះទេ អ្នកនោះអាចនឹងជួប«យក្ស» ដោយការជេរ«ម្រាយ»ជាដើម។

បុរសខ្លាំងផ្នែកឃោសនាការ និងព័ត៌មាន តាំងពីជំនាន់​សាធារណររដ្ឋ​ប្រជាមានិត​កម្ពុជា លោក ខៀវ កាញារីទ្ធ បានសំដែងក្ដីក្រេវក្រោធ នៅមុននេះបន្តិច តាមគណនីហ្វេសប៊ុករបស់លោក ដោយ​ប្រតិកម្មទៅ «អាអ្នកសុំលុយ» ពីលោក ដោយសារជននោះ បានផ្ញើរសារមកតន្ថើនលោក ឲ្យផ្ញើរលុយទៅឲ្យ។

លោក បានសរសេរថា៖ «ថ្ងៃនេះ សុំចេញយក្សម្តង ព្រោះមនុស្ស​កាន់តែខ្វះ​សុជីវធម៌ទៅៗ។ តាំងពីព្រឹក ការងារដូចភ្នំ ភ្ញៀវតកន្ទុយ ទើបអង្គុយដកដង្ហើមបន្តិច ស្រាប់តែឃើញអាអ្នកសុំលុយ ផ្ញើសារមកស្តីឲ្យថា ម៉េចក៏មិនបញ្ជូនលុយឲ្យ»។

រដ្ឋមន្ត្រីព័ត៌មាន បានធ្លាយកំហឹងឡើងថា៖ «ម្រ៉ាយវា! សុំលុយឯងហើយ ឲ្យផ្ញើទៅថ្វាយវាទៀត?»។

លោកបានបន្ថែម នៅក្នុងផ្នែកដាក់យោបល់ ឆ្លើយទៅស្ត្រីម្នាក់ ដែលហៅលោក​ជា​«តា» ដូច្នេះថា៖ «ចង់ត្រជាក់ដែរចៅ ទាស់តែថា សុំលុយគេហើយ យឺតឬឆាប់គួរសួរទៅចុះ តែនេះមកស្តីឲ្យ ដូចជាតាអ្នកជំពាក់លុយទៅវិញ!»។ លើកក្រោយ សុំឲ្យរាង!!!