បោះឆ្នោត​សកល​នៅ​អ៊ីតាលី​(IT)៖ លទ្ធផល ដែល​ឈាន​ទៅ​គ្មាន​រដ្ឋាភិបាល?

បន្ទាប់ពីរស់នៅក្នុងភាពត្បិតត្បៀត អស់រយះពេលមួយឆ្នាំ ក្រោមរដ្ឋាភិបាលលោក ម៉ារីយ៉ូ ម៉ុងទី (Mario Monti) នោះមក ប្រជាជនអ៊ីតាលីបានជ្រើសរើស តាមរយះការបោះឆ្នោតនេះ នូវនយោបាយ«ប្រឆាំងអ៊ឺរ៉ុប» នៃអតីតនាយករដ្ឋមន្ត្រី លោកស៊ីលវីយ៉ូ ប៊ែរលូស្កូនី (Silvio Berlusconi) និងអតីតអ្នកកំប្លែង លោក បេពេ គ្រីយ៉ូ (Beppe Grillo)។ សូមមើលលទ្ធផល នៃការបោះឆ្នោតពីថ្ងៃអាទិត្យនេះ ដូចខាងក្រោម។
Loading...
  • ដោយ: សេក មនោរកុមារ
  • កែប្រែចុងក្រោយ: February 26, 2013
  • ប្រធានបទ:
  • អត្ថបទ: មានបញ្ហា?
  • មតិ-យោបល់

ប្រទេសអ៊ីតាលីកំពុងស្ថិត ក្នុងស្ថានភាពនយោបាយមួយ យ៉ាងពិបាក បន្ទាប់ពីការបោះឆ្នោត កាលពីថ្ងៃអាទិត្យទី២៤កុម្ភះ កន្លងមក។ លទ្ធផលជាបណ្ដោះអាសន្ន បង្ហាញពីជ័យជំនះនៃពួកឆ្វេងនិយមនៅក្នុងរដ្ឋសភា តែមិនឈ្នះមិនចាញ់ នៅឯ​ព្រឹទ្ធសភា ហើយបានបង្កអោយមានឧបសគ្គ សម្រាប់ការបង្កើតរដ្ឋាភិបាលមួយឡើង។


សន្លឹកឆ្នោត នៅពេលបោះឆ្នោត កាលពីថ្ងៃអាទិត្យ ក្នុងប្រទេសអ៊ីតាលី។

បន្ទាប់ពីរស់នៅក្នុងភាពត្បិតត្បៀត អស់រយះពេលមួយឆ្នាំ ក្រោមរដ្ឋាភិបាលលោក ម៉ារីយ៉ូ ម៉ុងទី (Mario Monti) នោះមក ប្រជាជនអ៊ីតាលីបានជ្រើសរើស តាមរយះការបោះឆ្នោតនេះ នូវនយោបាយ«ប្រឆាំងអ៊ឺរ៉ុប» នៃអតីតនាយករដ្ឋមន្ត្រី លោក​ស៊ីលវីយ៉ូ ប៊ែរលូស្កូនី (Silvio Berlusconi) និងអតីតអ្នកកំប្លែង លោក បេពេ គ្រីលឡូ (Beppe Grillo)។ សូមមើលលទ្ធផល នៃ​ការបោះឆ្នោតពីថ្ងៃអាទិត្យនេះ ដូចខាងក្រោម ៖

- លទ្ធផលនៃចំនួនកៅអី នៅរដ្ឋសភា

- លទ្ធផលនៃចំនួនកៅអី នៅព្រឹទ្ធសភា

បន្ទាប់ពីបានរាប់សន្លឹកឆ្នោត ដែលជិតបានបញ្ចប់ជាស្ថារពរនោះ អ្នកនយោបាយកណ្ដាលនិយមឆ្វេង លោក ពីយ៉េ ល្វីជី ប៊េសានី (Pier Luigi Bersani) បានរកបាល ១២៥ពាន់សម្លេង នាំមុខអ្នកនយោបាយកណ្ដាលនិយមស្ដាំ លោកស៊ីលវីយ៉ូ ប៊ែរលូស្កូនី នៅក្នុង​រដ្ឋសភា។ ចលនានយោបាយកណ្ដាលនិយមឆ្វេងនេះ ក៏បាននាំមុខនៅព្រឹទ្ធសភាដែរ តែមិនមានសម្លេង​ភាគច្រើនទេ។

នៅក្នុងស្ថានភាពបែបនេះ ក្រុមលោកពីយ៉េ ល្វីជី ប៊េសានី នឹងត្រូវហុចដៃទៅរក ចលនាផ្កាយប្រាំ របស់លោកបេពេ គ្រីលឡូ ឬចលនាកណ្ដាលនិយមស្ដាំរបស់លោក ស៊ីលវីយ៉ូ ប៊ែរលូស្កូនី ដើម្បីអាចបង្កើតរដ្ឋាភិបាល «កែទម្រង់»មួយឡើង។ ប៉ុន្តែ​ជាចំណាត់ការមួយ ដែលមិនអាចទៅរួច ដោយហេតុពីចលនានយោបាយ មានភាពផ្ទុយស្រឡះពីគ្នាទាំងស្រុង។ នៅក្នុង​លក្ខខ័ណ្ឌ ដែលគ្មានការព្រមព្រៀងណាមួយ កើតឡើងនោះ ការបោះឆ្នោតឡើងវិញ នឹងត្រូវរៀបចំម្ដងទៀត ក្នុងពេលខាង​មុខ។

លទ្ធផលនៃបោះឆ្នោតនេះ បានបង្ហាញយ៉ាងច្បាស់ ពីការត្រឡប់មកវិញ នៃលោកស៊ីលវីយ៉ូ ប៊ែរលូស្កូនី ដែលកាលពីចុង​ឆ្នាំ២០១១ ក្រុមអ្នកប្រឆាំងលោក បានពង្រាបលោកដល់ដីម្ដងហើយនោះ។

គួរអោយចាប់អារម្មណ៍ដូចគ្នា ដែលប្រជាជនអ៊ីតាលីម្ចាស់ឆ្នោត បានដាក់ពិន័យយ៉ាងចាស់ដៃ ទៅរដ្ឋាភិបាលផុតតំណែង របស់លោក ម៉ារីយ៉ូ ម៉ុងទី ។ អតីតស្នងការអ៊ឺរ៉ុបរូបនេះ មិនត្រឹមតែចាញ់ឆ្នោតធម្មតាទេ តែចាញ់នៅក្រោយឆ្ងាយ បន្ទាប់​ពី​លោក បេពេ គ្រីលឡូ ដែលជាអតីតអ្នកសំដែងកំប្លែង តែមានប្រជាប្រិយយ៉ាងខ្លាំង ក្នុងចំណោមប្រជាជនអ៊ីតាលី។ លោក​គ្រីលឡូ បានធ្វើការឃោសនាបោះឆ្នោត ដោយសង្កត់ធ្ងន់តែពីការិះគន់ លើអតីតនាយករដ្ឋមន្ត្រី ម៉ុងទី ដែលស្និតជ្រុលពេក​នឹងអ៊ឺរ៉ុប និងលើពួកអ្នកនយោបាយដែលពុករលួយ។

លទ្ធផលនៃការបោះឆ្នោត នៅប្រទេសអ៊ីតាលី បានទាក់ទាញការយកចិត្តទុកដាក់យ៉ាងខ្លាំង របស់ពិភពលោក ជាពិសេស​បណ្ដាប្រទេសនៅអ៊ឺរ៉ុប។ ទីក្រុងប៉ារីស តាមរយះរដ្ឋមន្ត្រីក្រសួងហិរញ្ញវត្ថុ និងសេដ្ឋកិច្ច លោក ពីជ្យ៉ែ ម៉ូស្កូវីស៊ី (Pierre Moscovici) បានអំពាវនាវអោយប្រទេសអ៊ីតាលី បង្កើតនូវរដ្ឋាភិបាល«ដ៏មានលំនឹង»មួយ។ លោកបានថ្លែងថា លទ្ធផល​នៃការបោះឆ្នោត ដែល«ពិបាកក្នុងការវិន្និឆ្ឆ័យ»នេះ បានធ្វើអោយមាន «ភាពពិបាក»មួយយ៉ាងពិតប្រាកដ តែមិនបាន​រារាំង​អោយតំបន់ចាយលុយ«អ៊ឺរ៉ូ»​ បោះជំហានទៅមុខទេ៕

-----------------------------------------------------
ដោយ សេក មនោរកុមារ - ប៉ារីស​ ថ្ងៃទី២៦ ខែកុម្ភះ ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...