ជេកឃី ឆាន់ (ឈិនឡុង) យំ​ហូរ​ទឹក​ភ្នែក ពេលជួបតួរង​ដែលបែកគ្នាតាំងពី៤០ឆ្នាំ

ទទួលការអញ្ជើញ ឲ្យចូលរួម នៅក្នុងកម្មវិធីទូរទស្សន៍ ដែលឧទ្ទិសទាំងស្រុង ជូនជីវិតជាតារាភាពយន្ដ របស់​លោក​​នោះ លោក ជេកឃី ឆាន់ (Jackie Chan - ខ្មែរយើង​ស្គាល់​លោក​ច្រើន នៅក្នុងតួ ឈិនឡុង) បាន​បង្ហូរ​ទឹក​ភ្នែក​របស់​លោក បន្ទាប់ពី​លោក​បាន​ជួប​មក​វិញ នូវតួ​រងច្រើននាក់ ដែល​បាន​សំដែង​​លោត​ហក់ ដំបូង​គេបង្អស់ ជួយ​ក្នុង​​ការ​​សំដែង​​​របស់​​លោក កាល​ពី​បួន​ទសវត្សន៍​មុន។
ជេកឃី ឆាន់ (ឈិនឡុង) យំ​ហូរ​ទឹក​ភ្នែក ពេលជួបតួរង​ដែលបែកគ្នាតាំងពី៤០ឆ្នាំ
កំពូលតារាភាពយន្ដ របស់ពិភពលោក លោក ជេកឃី ឆាន់ បានយំ បន្ទាប់ពីរកឃើញ មិត្តភ័ក្ររួមការសំដែងរបស់លោកឡើងវិញ។ (រូបថតផ្តិតពីវីដេអូ)
Loading...
  • ដោយ: ឈូករ័ត្ន (info[email protected]) - ប៉ារីស ថ្ងៃទី៦ កុម្ភៈ ២០១៧
  • កែប្រែចុងក្រោយ: February 08, 2017
  • ប្រធានបទ: ជីវិតភាពយន្ដ
  • អត្ថបទ: មានបញ្ហា?
  • មតិ-យោបល់

ទឹកភ្នែករបស់លោក ជេកឃី ឆាន់ (Jackie Chan - ខ្មែរយើងស្គាល់លោកច្រើន នៅក្នុងតួ ឈិនឡុង) ដែល​បាន​ស្រក់​ចុះ មិនមែនគ្មានបញ្ហានោះទេ។ ជាទឹកភ្នែក ដែលបានស្រក់ពិតៗ នៅក្នុងការផ្សាយបន្តផ្ទាល់ នៅ​តាម​​កញ្ចក់​​ទូរទស្សន៍ បន្ទាប់ពីលោក​បាន​ប្រទះ​ឃើញ​ ជាថ្មីឡើង​វិញ ដោយ​មិន​បាន​ព្រាងទុក នូវ​តួ​អង្គ​រង​​ជា​ច្រើន​​នាក់ ដែល​បាន​ដើរ​តួ សំដែង​លោត​ហក់ ជាមួយ​រូបលោក តាំងពី៤០ឆ្នាំមុន។ បញ្ហាដែលកាន់​តែរំជួល​ចិត្ត​នោះ ​គឺ​ដោយ​សារលោក ជេកឃី មិនដែលបាន​​ជួប​មិត្តភ័ក្រ​​រួម​​ការ​​សំដែង​​ទាំង​នោះ ជាថ្មីទៀត​​​ទាល់​តែ​សោះ តាំង​ពី​ពេល​នោះ​មក។

ការបង្ហូរ​ទឹកភ្នែក របស់កំពូល​តារា​ភាពយន្ដ​រូប​នេះ បានកើតឡើង នៅក្នុងកម្មវិធី​ទូរទស្សន៍​មួយ កាល​ពី​ចុង​ខែ​មករា​មុន ដែលបានឧទ្ទិស​ទាំងស្រុង ពីឈុតឆាក​លោតហក់​ធំៗ នៃការសំដែង​របស់​លោក ក្នុង​រយៈ​ពេល​កន្លង​មក។ កម្មវិធី​បាន​បង្ហាញ​ជា​ដំបូងៗ នូវឈុតឆាក លោតហក់​កាប់ចាក់ របស់តួអង្គ​ជាច្រើន​នាក់ ដែល​សុទ្ធ​តែ​មាន​វ័យ​ក្មេងៗ ជាពិសេស​ក្រុម​សំដែង ជា​«ប្អូនៗ» ដែល​ចេញ​ពី​ក្រុម «Jackie Chan's Stuntmen Association» របស់​លោក ជេកឃី ផ្ទាល់​តែ​ម្ដង។

ប៉ុន្តែ នៅពេលដល់វគ្គជាមួយ ដែលបង្ហាញ​ពីតួរង ​វ័យ​ចាស់ៗ និងដែលធ្លាប់​ដើរតួ ជា​មួយ​លោក ជេកឃី ឆាន់ តាំង​ពី​ច្រើន​សិប​ឆ្នាំ​មក​នោះ អ្នករៀបចំ​កម្មវិធីទូរទស្សន៍ បានឲ្យ​តួចាស់ៗ​ទាំង​នោះ មកឈរ​ពី​ក្រោយ​លោក​ និង​មិន​ឲ្យ​លោក ជេកឃី បានដឹង​ខ្លួន​ជា​មុន​នោះ​ទេ។ នៅខណៈ​ពេល ដែល​កំពូល​តារា​ភាពយន្ដ​របស់​ពិភព​លោក​រូប​នេះ បាន​បែរ​ខ្នង ងាក​ទៅ​រក​ពួក​គាត់... គឺ​ពេល​នោះ​ហើយ ដែលទឹក​ភ្នែក​បាន​ចាប់​ផ្ដើម​រមៀល​ចុះ ​ជា​មួយ​នឹង​កាយវិការ​របស់​លោក ជេកឃី ដែលស្រវាអោប​​ពួកគាត់​ទាំងនោះ យ៉ាងណែន​នៅក្នុង​រង្វង់​ដៃ។

លោក ជេកឃី ឆាន់ បានថ្លែងទាំងភាពរំជួលចិត្តថា៖ «អរគុណ ៗ !!! អរគុណណាស់បងប្រុស! ខ្ញុំលែង​បាន​ជួបពួកបងៗ តាំងពីច្រើនឆ្នាំមកហើយ។ ជារៀងរាល់ឆ្នាំ ខ្ញុំតែងសង្ឃឹមថា នឹងមានសំណាងបានជួប​ពួក​បងៗ​ជា​ថ្មី។ ប៉ុន្តែ បងៗ​ខ្លះ លែងបាន​​មក​​ទីនេះ​​ទៀត​​ហើយ ដែល​ធ្វើឲ្យ​ឱកាស នៃ​ការ​ជួបគ្នា​ជា​ថ្មីនេះ មាន​សភាព​​កាន់​តែ​ស្ដួច​ស្ដើង​ទៅៗ។»។

វីដេអូ (ខាងក្រោម) នៃទិដ្ឋភាពដ៏«កំសត់»នេះ ត្រូវបានបង្ហោះ​ដោយ ម្ចាស់គណនេយ្យ​ហ្វេសប៊ុក​​ឈ្មោះ «Jared WanFeng Ti» ហើយទទួលបាន​ការចែករំលែក ជាង១៨១ពាន់នាក់ និង​ការ​ចូល​ទៅ​ទស្សនា ជាង​១០លាន​ដង ត្រឹមតែរយៈពេល​៨ថ្ងៃ​ប៉ុណ្ណោះ។ ជាទិដ្ឋភាព ដែលបានធ្វើឲ្យ​មនុស្ស​រាប់សិប​នាក់ ស្រក់​ទឹក​ភ្នែកតាម រាប់ចាប់ផ្ដើម ពីអ្នកដែលបាន​ទស្សនា​ផ្ទាល់ នៅក្នុង​ស្ទូឌីយ៉ោនោះ​តែម្ដង៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...