ព្រះសង្ឃ ប៊ុត ប៊ុនតិញ៖ ខឹម វាសនា ប្រើ​សកម្មជន​បក្ស​ដើម្បី​ប្រយោជន៍​ផ្ទាល់​ខ្លួន

សង្គ្រាមសំដី កំពុងបន្តឆេះឆាបទៅមុខ។ បន្ទាប់ពីបានលើកឡើង នៅក្នុងរយៈពេល​ប៉ុន្មាន​ថ្ងៃ​កន្លង​មក ពី​ករណី «លក់​សន្លឹក​ឆ្នោត» របស់​ក្រុម​ប្រឹក្សាឃុំ ចំនួន៧អសនៈរួចមក នៅថ្ងៃនេះ ព្រះសង្ឃ ប៊ុត ប៊ុនតិញ នៅបាន​បន្ថែម​សាំង មួយ​តំណក់​ទៀត ទៅ​លើ​ភ្លើង ដែល​កំពុង​ឆេះ​ស្រាប់។ នោះ គឺ​ព្រះអង្គ​បាន​ចាត់​ទុក ការ​ប្រកាស​របស់​លោក ខឹម វាសនា ថា​នឹង​ធ្វើ​បាតុកម្ម ដោយ​បោះ​ជំរុំ នៅលើដី​មាន​ជម្លោះ ក្នុង​ខេត្ត​កំពត ថាជា​«ការ​ប្រើ​កម្លាំង​សកម្មជន​បក្ស ដើម្បី​ផល​ប្រយោជន»​ផ្ទាល់​ខ្លួន និង​ជា​រឿង​«ស្មោក​គ្រោក»។
ព្រះសង្ឃ ប៊ុត ប៊ុនតិញ៖ ខឹម វាសនា ប្រើ​សកម្មជន​បក្ស​ដើម្បី​ប្រយោជន៍​ផ្ទាល់​ខ្លួន
លោក ខឹម វាសនា ប្រធានគណបក្សសម្ព័ន្ធ ដើម្បីប្រជាធិបតេយ្យ។ (រូបថតលើហ្វេសប៊ុក)
Loading...
  • ដោយ: ដារី ([email protected]) - ភ្នំពេញ ថ្ងៃទី០៧ កុម្ភៈ ២០១៧
  • កែប្រែចុងក្រោយ: February 08, 2017
  • ប្រធានបទ: ជម្លោះដីធ្លី
  • អត្ថបទ: មានបញ្ហា?
  • មតិ-យោបល់

រឿងរ៉ាវចុងក្រោយ ដែលបានកើតឡើង នៅក្នុងរង្វង់គណបក្សសម្ព័ន្ធដើម្បីប្រជាធិបតេយ្យ ដែល​ហៅ​ខ្លួន​ថា គណបក្សជួង បានបង្កឲ្យមានប្រតិកម្មចម្រុះចូលគ្នា មកពីគ្រប់ទិសទី។ ប្រសិនជាការលើក​ឡើង​ជា​ច្រើន​នោះ បង្ហាញគំនិតស្រប ឬប្រឆាំង ទៅនឹងចំណាត់ការរបស់អាជ្ញាធរ ដែលបានចាប់ខ្លួន ក្រុមយុវជន​សមាជិក​គណបក្ស​«ជួង» ចំនួន ១៣នាក់ យកទៅឃុំខ្លួន កាលពីរសៀលថ្ងៃទី៤ ខែកុម្ភៈ​នោះ តែ​ចំពោះ​ព្រះសង្ឃ ប៊ុត ប៊ុនតិញ ស្ថាបនិក​និង​ជា​ប្រធាន «បណ្ដាញ​ព្រះសង្ឃ​ឯករាជ្យ»វិញ បានសំដែង​ការយល់​ឃើញ​របស់​ព្រះអង្គ ​ផ្សេង​ទៅវិញ។

នៅចំពោះ​ការប្រកាស របស់ប្រធាន​គណបក្ស​សម្ព័ន្ធ ដើម្បីប្រជាធិបតេយ្យ លោក ខឹម វាសនា ដែល​ថា​នឹង​ធ្វើ​បាតុកម្ម ដោយ​បោះ​ជំរុំ នៅ​លើ​ដី​មាន​ជម្លោះ ក្នុងខេត្តកំពត ដើម្បីទាមទារឲ្យដោះលែង សមាជិក​របស់​គណ​បក្ស​ខ្លួន​មក​វិញ​នោះ ព្រះសង្ឃ ប៊ុត ប៊ុនតិញ បានមាន​ថេរដីកា​ថា លោក​ប្រធាន​គណបក្ស កំពុង​ប្រើប្រាស់​កម្លាំង​សកម្ម​ជន​គណបក្ស ដើម្បី​ផល​ប្រយោជន៍​ផ្ទាល់​ខ្លួន និងចាត់ទុក​រឿង​នេះ ថា​ជា​«រឿង​ស្មោក​គ្រោក»។

អមជាមួយរូបថត ផ្តិតពីអេក្រង់ (PrintScreen - រូបខាងក្រោម) ដែលមានរូបថត លោក ខឹម វាសនា ប្រធាន​គណបក្ស​«ជួង» មក​ជា​មួយ​នោះ ព្រះតេជគុណ​ប្រធាន​បណ្ដាញ​ព្រះសង្ឃ​ឯករាជ្យ បាន​សរសេរ​បង្ហោះ នៅ​លើ​គណនេយ្យ​ហ្វេសប៊ុក​របស់​ព្រះអង្គ​ថា៖ «ចេះ​(ប្រើ)​ទេពកោសល្យ​របស់​ខ្លួន ដេីម្បី​ការពារ​ផល​ប្រយោជន៍​​ផ្ទាល់​​ខ្លួន។ (ការ)​ប្រេី​​កំលាំង​សកម្ម​ជន​បក្ស ដេីម្បី​ការពារ​ផល​​ប្រយោជន៍​​មេ​​បក្ស ជារឿង​ស្មោក​គ្រោក។»។

ប៉ុន្តែចំពោះលោក ខឹម វាសនា វិញ បានលើកឡើងថា ការធ្វើបាតុកម្មនេះ ជាការជួយ​ឈឺឆ្អាល​គ្នា ទៅ​វិញ​ទៅ​មក ក្នុង​នាម​ជា​​«គ្រួសារ​​បក្ស»​​តែ​មួយ។ ប្រធាន​គណបក្ស«ជួង» បាន​លើក​ឡើង នៅ​លើ​បណ្ដាញ​សង្គម​ដែរ​ថា៖ «វា​មិន​អាច​ទៅ​រួច​ទេ​ ដែលមនុស្ស​មាន​ចិត្ត ជាបងប្អូន​ក្រុម​គ្រួសារតែមួយ​ ហើយ​ពេល​សមាជិក​​គ្រួសារ​យើង​មាន​ទុក្ខ​ ពួកគេ​ដែល​ជា​សមាជិក​គ្រួសារ ដែល​កំពុង​មាន​ទុក្ខ អាច​មាន​ចិត្ត​សប្បាយ​បាន​ វា​មិន​អាច​ទៅ​រួច​ជា​ដាច់​ខាត»។​

សម្រាប់ក្រុមអ្នកតាមដានដទៃទៀត បានគិតថា បាតុកម្មជាសិទ្ធិសំដែងមតិ របស់ពលរដ្ឋ ដែល​ត្រូវ​បាន​ការពារ​ ដោយ​រដ្ឋធម្មនុញ្ញ និង​ច្បាប់​ស្ដី​ពី​បាតុកម្ម របស់​កម្ពុជា។ គេគ្រានតែ​ត្រូវ​ដឹង​ថា តើ​បាតុកម្ម​នោះ នឹង​ត្រូវ​រៀបចំ​បែប​ណា ហើយ​បុព្វហេតុ​នៃ​បាតុកម្ម ចង់​បាន​អ្វី មាន​ទិសដៅ ឬ​ផល​ប្រយោជន៍​​ចុង​​ក្រោយ​​ដូចម្ដេច​​ប៉ុណ្ណោះ។

ផល​ប្រយោជន៍​ចុងក្រោយ នៃបាតុកម្ម ដែលព្រះសង្ឃ ប៊ុត ប៊ុនតិញ ទំនងជា​បាន​ដឹង​ច្រើន ពី​អាថ៌កំបាំង នៅ​ពី​ក្រោយ​បាតុកម្ម របស់​គណបក្ស​សម្ព័ន្ធ ដើម្បី​ប្រជាធិបតេយ្យ។ ព្រះតេជគុណ បានបន្ត​សំណេរ នៅ​ផ្នែក​ដាក់​យោ​បល់​ទៀត​ថា៖ «ដេីមហេតុ​នៃបញ្ហា (ដែល)​ចាប់ (ជនទាំង)១៣នាក់ ដោយ​សារ​រឿង​ដីធ្លី ២០ហិតា។ ដេីម​ហេតុ​នៃ​បញ្ហា ដោយ​សារ វាសនា មាន​ដី​នៅក្នុង​នោះ​ដែរ។»៕​

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...