«ទាហ៊ាន ស» ភាពយន្ដសង្គ្រាមឥណ្ឌូចិនចាប់ផ្ដើមថតនៅកម្ពុជា
សមិទ្ធិករភាពយន្ដបារាំងមួយរូប នឹងសម្រេចជារូបរាង នូវភាពយន្ដមួយខ្សែរនៃសង្គ្រាមនៅឥណ្ឌូចិន ដែលមានចំណងជើងថា «ទាហ៊ាន ស (Le Soldat blanc)»។ ស្ថានីយទូរទស្សន៍បារាំងមួយ ឈ្មោះ កាណាល់ភ្លូស (Canal+) បានបង្ហើបឲ្យដឹងថា ភាពយន្ដខ្នាតតូចនេះ (téléfilm) បានចាប់ផ្ដើមថត នៅកម្ពុជាកាលពីថ្ងៃសុក្រទី៨ខែវិច្ឆិកានេះ តែនឹងត្រូវចាក់ផ្សាយក្នុងកញ្ចក់ទូរទស្សន៍នៅឆ្នាំ២០១៤ ខាងមុខ។
ទាហ៊ានបារាំងកំពុងធ្វើការជាមួយនឹងវិទ្យុទាក់ទង ក្នុងសង្គ្រាមឥណ្ឌូចិននាឆ្នាំ១៩៥២។ (រូបថត ឯកសារ)
ភាពយន្ដ - ចាប់ផ្ដើមថតជាផ្លូវការនៅក្នុងប្រទេសកម្ពុជា កាលពីថ្ងៃសុក្រទី៨ខែវិច្ឆិកានេះ ភាពយន្ដនឹងបកស្រាយពីជីវិតរបស់ទាហ៊ានវ័យក្មេងពីររូប អង់ដ្រេ (André) និងរ៉ូប៊ែរ (Robert) ដែលសុទ្ធសឹងជាទាហ៊ានស្ម័គ្រចិត្ត ចេញទៅប្រយុទ្ធជាបន្តនៅទ្វីបអាស៊ី ក្រោយបន្ទាប់ពីសង្គ្រាមលោកលើកទីពីរបានបិទបញ្ចប់។
ខណៈពេលដែលតួអង្គម្នាក់ ត្រូវសម្រេចចិត្តយ៉ាងប្ដូរផ្ដាច់ ក្នុងការប្រយុទ្ធរហូតតំណក់ឈាមចុងក្រោយនោះ តួអង្គម្នាក់ទៀត បានសម្រេចិត្តផ្សេងពីនេះ ដោយបានរត់ចេញពីជួរទាហ៊ានបារាំង ហើយទៅចុះចូលនឹងជួរកងទ័ពរបស់សត្រូវ។
ភាពយន្ដប្រវត្តិសាស្ត្រ រំលឹកថ្លាថ្លែងយ៉ាងរំជួលចិត្តស្ដីពីកងទ័ពបារាំង ដែលត្រូវបានបញ្ជូនទៅដល់ទីក្រុងព្រៃនគរ (ទីក្រុងហូជីម៉ិញ សព្វថ្ងៃ) ដឹកនាំដោយឧត្ដមសេនីយ៍ ឡឺក្លែ (Leclerc) ដើម្បីយកត្រឡប់មកវិញ នូវ«សន្តិភាព» និង«អំណាចគ្រប់គ្រង»របស់បារាំង នៅឥណ្ឌូចិន។ តែរហូតមកដល់ពេលនេះ អ្វីៗបានកន្លងផុត ហើយវាគ្រាន់តែជាស្រមោលអតីតកាលមួយប៉ុណ្ណោះ នៃប្រវត្តិសាស្ត្រដ៏ជូរចត់។
នៅក្នុងភាពយន្ដ មានតួសម្ដែងល្បីៗ របស់បារាំង ដែលពីក្នុងចំណោមនោះ មួយចំនួនមានដើមកំណើតពីអាហ្វ្រិក និងអាស៊ីផងដែរ។ ដំណើរការថតនឹងប្រើរយៈពេលរហូតដល់ថ្ងៃទី១៨ខែធ្នូរខាងមុខនេះ នៅក្រោមការដឹកនាំរបស់សមិទ្ធិករ លោក អេរិក ហ្សុងកា (Éric Zonka) ដែលធ្លាប់បានបញ្ចេញថ្វីដៃរួចហើយ នៅក្នុងរឿង «សុបិន្តជីវិត នៃពួកទេវតា (La Vie rêvée des anges)» សមិទ្ធផលពិសេស ដែលទទួលបានពានរង្វាន់ សេហ្សា ឆ្នាំ១៩៩៩ (César 1999) ជាភាពយន្ដដែលល្អជាងគេ។ យើងនឹងរងចាំមើល ថាតើភាពយន្ដដែលជាស្នាដៃដឹកនាំថ្មី របស់លោក អេរិក ហ្សុងកា លើកនេះ នឹងបង្កការរំជួលចិត្តបែបណា?
នេះជារូបភាពមួយចំនួន នៃតួអង្គ និងសមិទ្ធិករភាពយន្ដ៖
តារាភាពយន្ដ ដែលសម្ដែងក្នុងតួអង្គទាហ៊ាន។ (រូបថត កាណាល់ភ្លូស)
លោក អេរិក ហ្សុងកា សមិទ្ធិករភាពយន្ដ។ (រូបថត កាណាល់ភ្លូស)
------------------------------------------------
ដោយ៖ ឈូករ័ត្ន - ប៉ារីស ថ្ងៃទី០៨ ខែវិច្ឆិកា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ