ខណៈខ្សែភាគយន្តបែបកំប្លែងរឿង «2 brothers» ដែល​ជា​ស្នាដៃ​ដំបូង របស់​នាយ​ពែកមី ទាំង​ក្នុង​ការ​និពន្ធ ដឹកនាំ និង​ទាំង​ការ​សម្តែង កំពុង​ចាក់​បញ្ចាំង​នៅ​ក្នុង​រោង​ភាពយន្ត​នានា​នោះ ប្រិយ​មិត្ត​ជា​ច្រើន​ដែល​បាន​ទស្សនា ខ្សែ​ភាពយន្ត​របស់​តារា​កំប្លែង​រូប​នេះ បាន​សរសើរ​ថា រឿង «2 brothers»​ល្អ​មើល​តាំង​ពី​រហូត​ដើម​ដល់​ចប់។ ពីក្នុង​ចំណោម​ប្រិយមិត្ត​ទាំង​នោះ ក៏​មាន​លោក សុខ ច័ន្ទផល កវី​និពន្ធ​ដ៏​ល្បី​ល្បាញ​មួយ​រូប​ផង​ដែរ។

ក្នុងទំព័រហ្វេសប៊ុករបស់លោក សុខ ច័ន្ទផល កវី​ល្បី​ឈ្មោះ ខាង​រៀបរាប់​ទំនុក​ស្នេហា​ឈឺ​ចាប់ នៅ​ក្នុង​បទ​ចម្រៀង បាន​សរសេរ​ថា បាន​បង្ហាញ​ចំណាប់​អារម្មណ៍ ចំពោះ​ខ្សែ​ភាពយន្ត​ខ្នាត​ធំ ដែល​ដឹកនាំ​សម្ដែង ​ជា​លើក​ដំបូង​ដោយ​ប្រធាន​ក្រុម​កំប្លែង​ស៊ីធីអ៊ិន នាយ​ពែក​មី​ថា៖ «ឡូយ ខ្ញុំ​ចូល​ចិត្ត ធ្វើ​ឱ្យ​ខ្ញុំ​សើច​តាំង​ពី​ដើម​ដល់​ចប់ ហើយ​ហូរ​ទឹក​ភ្នែក តាម​បទ​ចម្រៀង នាយ​គ្រឿន ទៀត» ។

អ្នកនិពន្ធទំនុកច្រៀងរូបនេះ សរសេរសើរតារាកំប្លែងសំបូរវោហា មិនចេះរីងស្ងួតខាងលើ ដោយបានបញ្ជាក់ថា នាយពែកមី ផលិតខ្សែភាពបានល្អ តាមស្តង់ដារបស់ខ្មែរ គុណភាពមិនចាញ់ ខ្សែភាពយន្តខ្នាតធំ​របស់បរទេស​ប៉ុន្មានទេ។ លោក សុខ ច័ន្ទផល បាននិយាយថា៖ «ខ្មែរឥឡូវ ផលិតបានខ្សែភាពយន្តខ្នាតធំប៉ុណ្ណឹង ស្ដង់ដា​ខ្មែរអ៊ីចឹង គេមើលហើយ ព្រោះគុណភាពមិនចាញ់ ខ្សែភាពយន្តខ្នាតធំ របស់របទេសប៉ុន្មានទេ!»។

ចំណែកប្រិយមិត្តមួយចំនួនទៀត ក៏សរសើរមិនដាច់ពីមាត់គ្រប់គ្នាដែរ ដោយសារតែខ្សែរភាពយន្ដ បានធ្វើឲ្យ​ផ្ទុះ​សំណើចគ្រប់ៗគ្នា។ ទស្សនិកជនមួយរូប បានថ្លែងថា «គ្មានឈុតណាមិនសើចទេ ហើយចេះលេងពាក្យ​ឱ្យត្រូវនឹងសាច់រឿង។ រីឯឈុតឆាកបែបកំសត់វិញ ធ្វើឱ្យអ្នកខ្លះ ស្ទើតែស្រក់ទឹកភ្នែកតាមទៀតផង។»

រឿង «2Brother (២នាក់បងប្អូន)» គឺជាខ្សែភាពយន្ដលើកទី១ របស់នាយពែកមី។ ខ្សែភាពយន្តនេះ លាយ​ឡំ​ទៅដោយសាច់រឿងបែបកំប្លែង និងការអប់រំសម្រាប់យុវវ័យ ជាពិសេសអ្នកដែលមានបំណងធ្វើចំណាកស្រុក។ នាយពែកមី បានខិតខំអស់ពីកម្លាំងកាយចិត្ត ដើម្បីសម្រេចគោលបំណងរបស់ខ្លួន ក្នុងនោះលោកជា​អ្នក​និពន្ធ​ផង ជាអ្នកដឹកនាំរឿងដោយផ្ទាល់ផង និងជាតួសម្តែងដ៏សំខាន់ ព្រមជាមួយប្អូនប្រុសរបស់លោកផង គឺនាយ​គ្រឿន។ ខ្សែភាពយន្តស្នាមដៃទី១នេះ លោកពែកមី បានសហការជាមួយផលិតកម្ម អ៊ិលឌី ភិកឈ័រ ក្នុងការ​ផលិត ដើម្បីទទួលបានផ្លែផ្កាគួរជាទីគាប់ចិត្តនេះ៕