សារព័ត៌មានដ៏ល្បី ឈ្មោះ «New York Times» បានលើកឡើង ពីការគាំទ្ររបស់ខ្លួន ជូនទៅអ្នកស្រី ហ៊ីឡារី គ្លីនតុន (Hillary Clinton) បេក្ខនារីមកពីគណបក្សប្រជាធិបតេយ្យ នៅក្នុងដំណើរប្រកួតប្រជែង ដើម្បី​ក្លាយ​ជា​ប្រធានាធិបតីអាមេរិក ដែលអ្នកស្រីកំពុងឈរឈ្មោះ តតាំងជាមួយនឹងបេក្ខជនម្នាក់ទៀត គឺលោក ដូណាល់ ត្រាំ (Donald Trump) មកពីគណបក្សសាធារណរដ្ឋ។ សារព័ត៌មានបានធ្វើអត្ថាធិប្បាយ លើកសរសើរអ្នកស្រី គ្លីនតុន ពី​ប្រាជ្ញា ចំណេះដឹង បទពិសោធន៍ និងសេចក្ដីក្លាហាន របស់អ្នកស្រី នៅក្នុងសកម្មភាព​នាពេល​កន្លង​មក ដែល​អ្នកស្រីបានធ្វើ សម្រាប់សហរដ្ឋអាមេរិក។

«New York Times» បានលើកមកបង្ហាញ នូវគោលនយោបាយជាច្រើន របស់បេក្ខនារីមកពី​គណបក្ស​ប្រជាធិប​តេយ្យ ថាពោរពេញ ដោយភាពប្រាកដនិយម ខណៈគោលនយោបាយ របស់លោក ដូណាល់ ត្រាំ មក​ពី​គណបក្សសាធារណរដ្ឋ មិនមានអ្វី ដែលចេញពីគំនិតផ្ទាល់ខ្លួន ប៉ុន្តែជាការសន្យាមួយ ដើម្បីយក«ព្រះចន្ទ និង​ផ្កាយ» ដែលពោរពេញ ​ដោយភាពស្រមើស្រមៃ។ សារព័ត៌មាន បានហៅលោក ដូណាល់ ត្រាំ ថាជា​បេក្ខជន​ដ៏​អាក្រក់​បំផុត សម្រាប់គណបក្សជាប្រវត្តិសាស្ត្រ ដែលមានវ័យដ៏ចំណាស់មួយ របស់អាមេរិក។

ប៉ុន្តែ សារព័ត៌មានរបស់​ក្រុង​ញ៉ូយក​មួយ​នេះ ដែលបានបោះពុម្ភចេញផ្សាយ តាំងពីឆ្នាំ១៨៥១មកនោះ បាន​សង្កត់​ធ្ងន់​ថា ខ្លួនគាំទ្រអ្នកស្រី ហ៊ីឡារី មិនមែនដោយសារតែអ្នកស្រី មិនមែនជាលោក ត្រាំ នោះឡើយ ប៉ុន្តែ​ដោយ​សារមូលហេតុ នូវអ្វីដែលសហរដ្ឋអាមេរិក ត្រូវប្រឈមមុខ និងពីសមត្ថភាព របស់អ្នកស្រី គ្លីនតុន ដែល​អាច​ធ្វើបាន។

«New York Times» បានសរសេរថា៖ «សង្គ្រាម ភេរវនិយម សំពាធនៃពិភពលោកនីយកម្ម បានរីរូងបន្តិច​ម្ដងៗ អត្ថន័យពិតប្រាកដ នៃលិទ្ធិប្រជាធិបតេយ្យ ធ្វើកម្លាំងរបស់សម្ព័ន្ធភាព ចុះទន់ខ្សោយ និងបំបាក់ឲ្យ​ធ្លាក់​ចុះ នូវឧត្តមគតិ នៃការអត់អោន និងទង្វើល្អ»។

សារព័ត៌មានបានបន្តទៀថា៖ «ក្នុងរយៈពេលជាង៤០ឆ្នាំ នៃ​ជីវិតសាធារណៈ​ អ្នកស្រី ហ៊ីឡារី គ្លីនតុន បាន​សិក្សា​ពីបញ្ហាខាងលើនេះ និងបានបង្ហាញ ពីការឆ្លើយតប ទៅ​ចំណោទ​ដែល​កើត​មាន។ ការគាំទ្ររបស់​យើង ឈរនៅលើមូលដ្ឋាន នៃការគោរព ទៅដល់ប្រាជ្ញាចំណេះដឹង បទពិសោធន៍ ភាពម៉ឺងម៉ាត់ និងសេចក្ដី​ក្លាហាន នៅក្នុងជីវិតរបស់អ្នកស្រី ដែលបានលះបង់ សឹងតែទាំងស្រុង សម្រាប់ជាតិ ដែលមកដល់ពេលនេះ ជាស្ត្រី​លើក​ដំបូង ឬសម្រាប់ប្រវត្តិសាស្ត្រទាំងមូល ជាស្ត្រីតែមួយគត់ ដែលបានឆ្លងកាត់។»៕